လိၵ်ႈပိုတ်ႇပၼ်ပိုၼ်ႉႁူႉ မၢႆသၢမ်/ၸႂ်ႁၵ်ႉၽႂ်ႇ ၵတ်းယဵၼ် ပိုၼ်ႊဝၢၼ်းမႅင်ႇၵူႊၵေႃႉ

ၸႂ်ႁၵ်ႉၽႂ်ႇ (မဵတ်ႉတႃႇ)ဢၼ်ဝႃႈၼၼ်ႉ ပဵၼ်လွင်ႈဢၼ်ၵူၼ်းၵူႊၵေႃႉ ထုၵ်ႇဝႆႉလႆႈမီးၼၼ်ႉဢိူဝ်ႈ။ ပိုၼ်ႊဝၢၼ်း မဵတ်ႈတႃႇ ၸႂ်ႁၵ်ႉၽႂ်ႇၼႆႉ ပဵၼ်တႃႇႁႂ်ႈလႆႈၵတ်းယဵၼ်ဢိူဝ်ႈ။ သင်ထၢတ်ႈႁၵ်ႉၽႂ်ႇၼႆႉ သွၼ်းယမ်းလႆႈတီႈၵူႊၵေႃႉယူႇၸိုင် ဢွၼ်ၵၼ်လႆႈၵတ်းယဵၼ်ၵၼ်ယဝ်ႉဢိူၼ်ႈ။ ပေႃးၶူဝ်းၼုင်ႈလူင်ႁၵ်ႉၽႂ်ႇၼႆႉ ၸၢင်ႊမေႃဢဝ်ၼုင်ႈတိုဝ်းၵၼ်ၵူႊၵေႃႉ ယူႇ ၸိုင် ဢွၼ်ၵၼ်လႆႈတၢင်းၵတ်းယဵၼ်ႁူမ်ႇလူမ်ႈယဝ်ႉဢိူဝ်ႈ။ မဵတ်ႈတႃႇၸႂ်ႁၵ်ႉၽႂ်ႇၼႆႉ ပေႃးပိုၼ်ႊယမ်းပၼ်လႆႈၵူႊတီႈ ႁႂ်ႈၽဵင်ႇလႆႈၼင်ႇ ႁႃႇၾူၼ်ၸိုင် ၽွၼ်းလီမင်ႇၵလႃႇမၼ်းၵူႊၸွင်ႈၸွင်ႈၼႆႉ 🥹တေလႆႈၸၢမ်ႇပူၺ်ႈၵၼ်ယူႇ ဢမ်ႇႁၢင်ႉယဝ်ႉ သႄႈ။

           ပေႃးၵႅမ်းဝႆႉတၢင်းႁၵ်ႉၽႂ်ႇၸင်ႇ လွင်ႈဢွင်ႇပေႉတေပဵၼ်။

           ပေႃးပၼ်လႆႈတၢင်းႁၵ်ႉၽႂ်ႇၸင်ႇ လွင်ႈၵတ်းယှဵၼ်တေပဵၼ်။

           ပေႃးဝႆႈဝၢၼ်းတၢင်းႁၵ်ႉၽႂ်ႇလႆႈၸင်ႇ လွင်ႈၽွၼ်းလီတေၶိုၼ်ႈယႂ်ႇၽေႈၵိုၼ်းလႆႈၼမ်ယဝ်ႉ။

           ပေႃးၸႂ်ႁၵ်ႉၽႂ်ႇၵတ်းယဵၼ်  ပိုၼ်ႊဝၢၼ်းမႅင်ႇၵူႊၵေႃႉ

           လွင်ႈၵတ်းယဵၼ်ၵၢင်းၽေးၶဵၼ်  ပဵၼ်ထိုင်ထၢၼ်ႈလုမ်ႈၾႃႉလႆႈယဝ်ႉ။

           ဢၼ်ၶႂ်ႈဝႃႈတႄႉ တႃႇႁႂ်ႈလုမ်ႈၾႃႉလူင် လူၵ်ႈၶူင်းၵူၼ်းႁဝ်း၊ သိုင်ႇဝႅတ်ႈလွမ်ႉၵူၼ်းၶူင်းၵၢင်ႁဝ်း၊ ၸူဝ်ႊပၢၼ် ၵူၼ်းၶူင်းၵၢင်ႁဝ်းၶဝ်ၸိူဝ်းၼႆႉၵႂႃႇၵူႊလွင်ႈလွင်ႈ ပေႃးတေသၢင်ႇထုၵ်ႇၵိုင်ႇလႅပ်ႈၶႅမ်ႉတီႈတႃသေ သၢင်းဝၢင်းႁၢင်ႊလီသႃႇ ယႃႇ ပဵၼ်လွင်ႈၵိုၵ်းၵႅမ်ၵႂႃႇၼႃႈ လႆႈၶၢဝ်းႁိူင်သေ ဢွၼ်ၵၼ်လႆႈယူႇလီၵတ်းယဵၼ်ၸႂ် တင်းသိူဝ်းသၢင်ႇမူၼ်ႊလီၼၼ်ႉ ပိူင်လူင်မၼ်း ဢၼ်တေလႆႈဢဝ်ဢွင်ႈတီႈယူႇပၼ်ဝႆႉၼၼ်ႉတႄႉ ပဵၼ်ထၢတ်ႈႁၵ်ႉၽႂ်ႇ(မဵတ်ႉတႃႇ)ၵွၺ်းယဝ်ႉ။ ဢၼ်ဢဝ် တၢင်းႁၵ်ႉၽႂ်ႇ ႁဵတ်းပိုၼ်ႉၶၢမ်ႇသေယဝ်ႉ လွင်ႈႁဵတ်းသၢင်ႈဢၼ်ၸိူဝ်းပဵၼ်ဢွၵ်ႇလၢတ်ႈလႆမႃး တီႈၸႂ်ႁၵ်ႉၽႂ်ႇၸိူဝ်းၼၼ်ႉ ၶဝ်ၼႆႉ လပ်ႉလွင်းဝႆႉဝႃႈ မၼ်းပဵၼ်တႃႇၶႂ်ႈႁႂ်ႈပိူၼ်ႈလႆႈလီလႆႈပဵၼ်၊ ၶႂ်ႈႁႂ်ႈလႆႈၵတ်းယဵၼ်၊ မူၼ်ႊသိူၼ်းသႂၢင်ႇၸႂ်၊ ၶုၺ်ႉ ထူပ်းလီၸႂ်ၶုၺ်ႉႁူႉ ယဝ်ႉၼႆလႆႈဢိူဝ်ႈ။ ပေႃးတေလႆႈဢဝ် ၶေႃႈပွၼ်ႈသင်ႇဢွၼ်လီ ဢၼ်ၸိူဝ်းထၢင်ႇၸႅင်ႈသၵ်းလီ တီႈ  ၸဝ်ႈလူင်တီႉလေႃးၵႃႉၽီႉဝမ်ႇသ တၢင်ႇၶႆႊၼေပၼ်ၽွင်ႈၼႆ---

႑.         တၢင်းႁၵ်ႉၽႂ်ႇၼႆႉ ယိူင်းဢၢၼ်းပၼ်တႃႇမၼ်းသေ ပိုၼ်ႊဝၢၼ်းၵႂႃႇၵႂႃႇၵေႃႈ ၽွၼ်းပၢင်ႈလီတႃႇ တူဝ်ၵဝ်ႇသမ်ႉ         ပိူင်းမႃးၼင်ႇၵဝ်ႇ

႒.        တၢင်းႁၵ်ႉၽႂ်ႇၼႆႉ ဢၼ်လႆႈလူင်းထုၼ်းသႂ်ႇတိုၼ်းလၢင်းမၼ်းဢေႇသေတႃႉၵေႃႈ ၽွၼ်းပၢင်ႈလီ ဢၼ်လႆႈမၼ်း

           သမ်ႉၼမ်ယဝ်ႉ

႓.        ႁူမ်ႊဝႃႈပဵၼ်ဝႆႉ တူၼ်ၵူၼ်းဢၼ်ႁဵတ်းဢမ်ႇလီ တေႃႇတူဝ်ၵဝ်ႇဝႆႉယူႇသေတႃႉ ၊ ပေႃးဝႆႉဝၢၼ်းၸႂ်ႁၵ်ႉၽႂ်ႇ တႃႇႁႂ်ႈ   မၼ်းလႆႈလီၼၼ်ႉ မွၵ်ႇၶိုင်ႈၸူဝ်ႊမူင်းသေ ပိုၼ်ႊထိုင်ယူႇယႂ်းယႂ်းတူၺ်းလူး၊ ပေႃးလႆႈ သွင်သၢမ်ဝၼ်းမႃးၼႆ

           တေလႆႈႁၼ်ႁိူင်ႈၵိူင်းမႃး ပႃးတၢင်းႁဝ်းယူႇ

႓.        ၽူႈၶႂ်ႈပူၵ်းပွင်ထၢတ်ႈမဵတ်ႈတႃႇၼႆႉ တေလႆႈတူၺ်းႁႂ်ႈႁၼ်တေႃႇၽွၼ်းပၢင်ႈလီမၼ်း ဢွၼ်တၢင်းဢိူဝ်ႈ။ၼႆယဝ်ႉ။

           ၸဝ်ႈလူင်ထမ်ႇမရၵ်ႉၶီႉတၼႆၵေႃႈ ၵပ်းၵၢႆႇလူၺ်ႈၸႂ်ႁၵ်ႉၽႂ်ႇသေ လႆႈႁၼ်ပၼ်ၶေႃႈပွၼ်ႈသင်ႇ ထိုင်မႃးၼင်ႇ ၸိူဝ်းတီႈတႂ်ႈၼႆႉယဝ်ႉ။

(ၵ)       ၸႂ်ႁၵ်ႉၽႂ်ႇၼႆႉ ပေႃးဝၢၼ်းသူင်ႇၼႆ ႁွတ်ႈၽႅဝ်ဢိူဝ်ႈ။ ပေႃးႁူမ်ႈႁွမ်းၵၼ်သေသူင်ႇၼႆ တိူဝ်းထိုင်တီႈယဝ်ႉ။ ၶဝ်ႈ        ၵၢၼ်တြုး တူၺ်းလူမ်းၶဝ်လူမ်းဢွၵ်ႇၶဝ်သေယဝ်ႉ ယွၼ်းသူပိုၼ်ႊသူင်ႁၵ်ႉၽႂ်ႇလႄႈ

(ၶ)       ၸဝ်ႈၽြုးၼႆႉ ၽေႈၵိုၼ်းၽႃႇဝၼႃႇ တၢၼ်းႁၵ်ႉၽႂ်ႇယူႇတႃႇသေဢိူဝ်ႈ

(င)       ပေႃးၶဝ်ႈတီႈၼွၼ်းယဝ်ႉၼႆ  တေႃႇပေႃးလပ်းၼွၼ်းၵႂႃႇၼၼ်ႉ ဢွၼ်ၵၼ်ပိုၼ်ႊဝၢၼ်း တၢင်းႁၵ်ႉၽႂ်ႇလႄႈ

(ၸ)     တွၺ်ႇၵင်းတွင်း(ၸီးၸေႇ)သေ ဝူၺ်ႇဝၢၵ်ႈတၢင်းလီ ပၼ်ၵူႊဝၼ်းဝၼ်းလႄႈ။ ၵွပ်ႈပိုၼ်ႊဝၢၼ်းၽေမႅင်ႇ ၽွၼ်း        ပၢင်ႈတၢင်းၵၢၼ်လီလႄႈ တေႃႇတူၼ်ၸိူဝ်း ဢၼ်ဢမ်ႇႁၼ်လႆႈၶဝ်ၼၼ်ႉ ဢေးလူၸွၺ်ႈထႅမ်ပၼ်သေလႄႈ။

(သ)     ပိုၼ်ႊဝၢၼ်းတၢင်းႁၵ်ႉၽႂ်ႇ ယႂ်ႇယႂ်ႇၵႂၢင်ႈၵႂၢင်ႈတေႃႇထိုင်တူဝ်မီးၸႂ် ဢၼ်ဢမ်ႇမီးတီႈသုတ်း တီႈတိူၵ်ႈၶဝ်သေ           လႄႈ။

           တၢင်းႁၵ်ႉၽႂ်ႇၼႆႉ မၼ်းဢမ်ႇမီးလွင်ႈၵွင်ႉၵၢႆႇ ၼွင်ႇၵွင်ႉၵၼ်တင်းလွင်ႈႁၢင်ႊလီမီးမႆႇ တီႈသေၵေႃႉသေၵူၼ်း သင်၊ လွင်ႈၸၼ်ၸႂ်ထုၵ်ႇမႅၼ်ႈလီႁၵ်ႉသင်၊ လွင်ႈၸပ်းပႅၼ်းၶႂ်ႈလႆႈဢီႈသင်သႄႈ။ ဢၼ်ဢမ်ႇမီးဢမ်ႇပဵၼ် ဢၼ်လူဝ်ႇဝႆႉ သႃႊဝႆႉတႃႇၵူၼ်းၶူင်းၵၢင်ႁဝ်းၶဝ်တင်းသဵင်ႈသဵင်ႈမိူၼ်ၼင်ႇ - တႃႇလွင်ႈယူႇလီမူၼ်ႊသိူဝ်း၊ လွင်ႈၼိမ်တဵင်ႈၵတ်းယဵၼ်၊ လွင်ႈႁိူဝ်ႈႁိူင်းသႃႇယႃႇ၊ လွင်ႈၵူၼ်းၼင်ႇၵၼ်မေႃဝူၼ်ႉသွၼ်ႇတေႃႇၵၼ်လႂ်၊ လွင်ႈမေႃထတ်းႁၼ်တေႃႇ တၢင်းၽိတ်း တၢင်းၸိုဝ်ႈၸႂ်ႈလႂ်၊ လွင်ႈဢၼ်ယွၼ်ႉလွင်ႈဢၼ်တွၼ်းၶဝ်လႂ်၊ လွင်ႈဢၼ်ၸၢင်ႊႁူႉႁၼ် ၸႅၵ်ႇၽႄလႆႈတေႃႇ တၢင်းလီၵူႉ သူဝ်ႇလႄႈ တၢင်းဢမ်ႇလီဢႃႇၵူႉသူဝ်ႇၶဝ်ၸိူဝ်းၼႆႉလႆႈ၊ လွင်ႈၶႆႈၸႂ် ႁိဝ်ႈၸင်ႊလႆႈတေႃႇ လွင်ႈတၢင်းထုၵ်ႇလႆႈသၢင်ႈၵူႊ ၸွင်ႈၸွင်ႈၶဝ်ၸိူဝ်းၼၼ်ႉ ၸွင်ႇထုၵ်ႇလီလႆႈႁဵတ်းႁိုဝ် ဢမ်ႇလီလႆႈႁဵတ်းၸိူဝ်းၼၼ်ႉၶဝ်လႂ်၊ လွင်ႈဢၼ်မေႃႁူႉတေႃႇ ၵုင်ႇၵေးၸူး (ၽွၼ်းပၢင်ႈလီ) တီႈပိူၼ်ႈၼၼ်ႉလႂ်၊ လွင်ႈမေႃထွမ်ႇဢဝ်ႁဵတ်းၸွမ်း ဢၼ်သင်ႇသွၼ် ဢုပ်ႇလၢတ်ႈပၼ် ၼၼ်ႉ၊ လွင်ႈမေႃဝႆႉတြႃးဝူၼ်ႉသွၼ်ႇတေႃႇပိူၼ်ႈၼၼ်ႉလႂ်၊ ထၢတ်ႈၸႂ်ဢၼ်မေႃ ၸွၺ်ႈထႅမ်ၾႃႁွမ်းၸွမ်းၵမ်ႉပၼ်ပိူၼ်ႈ တၢင်ႇၸိူဝ်းၶဝ် တင်းတၢင်းဢေးလူလီတူၺ်းထိုင်ပၼ် ၼၼ်ႉလႂ်၊ ၸိူဝ်းၼႆႉတင်းသဵင်ႈသဵင်ႈၼႆႉ ဢၼ်ဢမ်ႇမီးဢမ်ႇပဵၼ် တိုၼ်းဝႃႈလူဝ်ႇဝႆႉယူႇတႃႇသေႇၼၼ်ႉၸမ်းပဵၼ် “တၢင်းႁၵ်ႉၽႂ်ႇ”(မဵတ်ႉတႃႇ)ၵွၺ်းယဝ်ႉ။ တၢင်းႁၵ်ႉၽႂ်ႇၼႆႉ ဢမ်ႇမီး တၢင်းၵႂၢင်ႈတၢင်းယၢဝ်း တၢင်းတႅၵ်ႈၼိူင်းပုၼ်ႈယႂ်ႇဢွၼ်ႇမၼ်းသင်သေ ယႂ်ႇဝႃႈယႂ်ႇတေႉတေႉၼၼ်ႉယဝ်ႉ။ လိုၵ်ႉလမ်ႇ ၼႃႇတေႉယဝ်ႉ။ ၶမ်ႇၶိုၵ်ႉပူၼ်ႉတေႉယဝ်ႉ။ ဝၢတ်ႈၵႂၢင်ႈယၢဝ်ၵႆလႆႈၼႃႇတေႉယဝ်ႉၼႆ ဢွၼ်ၵၼ်ဝႃႈၼင်ႇၼႆယဝ်ႉ။ ဢမ်ႇမီး သင်တေမႃးတႅၵ်ႈၼိူင်းမိူၼ်လႆႈ တၢင်းႁၵ်ႉၽႂ်ႇသႄႈ။ ႁူမ်ႊဝႃႈဢမ်ႇမီးတၢင်းပွတ်းတၢင်းယၢဝ်းၼႆသေတႃႉၵေႃႈ သမ်ႉမီး ဢၼ်ၵႂႃႇဢၼ်ၶိုၼ်းဢိူဝ်ႈၼႆၵေႃႈ ဢွၼ်ၵၼ်လၢတ်ႈထႅင်ႈယူႇယဝ်ႉ။ ၵူၼ်းၶူင်းၵၢင်လူၵ်ႈၶူင်းလုမ်ႈၾႃႉႁဝ်း ဝၼ်းမိူဝ်ႈၼႆႉ ၶဝ်ၼႆႉ ၵေႃႉဢၼ် ဢၼ်ဝႃႈ ဢမ်ႇၶႂ်ႈလႆႈတြႃးတၢင်းႁၵ်ႉၽႂ်ႇလႂ်၊ ၵေႃႉၶႂ်ႈလပ်ႉပၢႆႇပႅတ်ႈလႂ်၊ ဢၼ်ၶႂ်ႈလူႊလၢႆႊတေႃႇ ၽူႈၵေႃႉ ၵူၼ်း ဢၼ်ပိုၼ်ႊဝၢၼ်းမႅင်ႇတၢင်းႁၵ်ႉၽႂ်ႇၼၼ်ႉလႂ်၊ ဢၼ်ဝႃႈ ဢၼ်တိုၼ်းဢမ်ႇၶႂ်ႈၸွမ်းဢဝ် တၢင်းသင်ႇသွၼ် ဢွၼ် ၼေ လၢတ်ႈလီပၼ်လွင်ႈတင်း တၢင်းႁၵ်ႉၽႂ်ႇၼၼ်ႉသေ ပဵၼ်ဝႆႉၵူၼ်းမိူၵ်ႈမႂ်ႈဢၼ်ႁဵတ်းလူင်ၵႂႃႇ ၵႃႊပဵၼ်ၼင်ႇထၢင်ႇ ၼင်ႇႁၼ် ၸိူဝ်းၼၼ်ႉၶဝ်လႂ် ထၢင်ႇတေႉဢမ်ႇမီးသႄႈ။ ပေႃးတၵ်းဝႃႈမီးယူႇၼႆၵေႃႈ တေပဵၼ်ၵူၼ်းၸုမ်းဢေဢွၼ်ႇ ဢိတ်းၵွၺ်း  ထၢင်ႇၼင်ႇၼႆ။ ယွၼ်ႉပၼ်တၢင်းႁၵ်ႉၽႂ်ႇယူႇလႄႈ  ဢမ်ႇလႆႈၶိုၼ်းလွင်ႈႁၵ်ႉၽႂ်ႇၼႆၵေႃႈ ၵေႃႈယႃႇသေ လႄႈ။ ပေႃးမီးတၢင်းထုၵ်ႇလႆႈလၢတ်ႈၼႆ ႁူႉၵႃႊတေလႆႈလၢတ်ႈယဝ်ႉဢိူဝ်ႈ။ ၵွပ်ႈပဵၼ်လွင်ႈလီလႆႈလၢတ်ႈလႄႈ တၵ်းလႆႈ လၢတ်ႈၼၼ်ႉဢိူဝ်ႈ။ လႆႈႁၼ်ယူႇယႅၼ်ႉယႅၼ်ႉဝႃႈ ဢမ်ႇလီၼၼ်ႉယူႇသေတႃႇၵေႃႈ၊ ႁၼ်ယူႇဝႆႉဝႃႈ မၼ်းၽိတ်းယူႇဝႆႉၼႆ ၼၼ်ႉ၊ ႁဵတ်းဢမ်ႇလီယူႇၼၼ်ႉ ႁူႉဝႆႉယူႇသေၵေႃႈ၊ ၸူဝ်ႊပၢၼ်တေလူႉၼႆ ႁူႉယူႇဝႆႉသေတႃႇၵေႃႈ ဢမ်ႇတၼ်းဝႆႉဝဵၼ်ႉ ၽဵင်ႈပႅတ်ႈသႄႈ။ ပေႃးႁဝ်းလႆႈႁၼ်ယူႇဝႃႈ ပဵၼ်ဢၼ်ဢမ်ႇလီယူႇၼႆသေတႃႉၵေႃႈ ဢမ်ႇႁဵတ်းႁိုဝ် ၸၢင်ႊဝႆႉလပ်ႉတႃ ႁၼ်ပႅတ်ႈလႆႈသႄႈ။ ၵွပ်ႈပဵၼ်ၵူၼ်းႁၢပ်ႇၵၢၼ်မေႃသွၼ်ၵေႃႉၼိူင်ႈဝႆႉလႄႈ သမ်ႉမီးၸႂ်ၶႂ်ႈႁႂ်ႈ လုၵ်ႈၼွင်ႉတူဝ်ၵဝ်ႇၸိူဝ်း ၼၼ်ႉ ၵတ်ႉၶႅၼ်ႇသႅမ်းၵႃႊ လိူဝ်သေတူဝ်ၵဝ်ႇဢိူဝ်ႈ။ ၶႂ်ႈႁႂ်ႈၶဝ်သၢင်ႇတေႃႇပဵၼ်လီတင်းၸၼ်ႉထၢၼ်ႈတႃႊၶုၼ်မီး ၵုင်ႇၵုၼ်းမုၼ် တင်းဢူဢၢႆႊၸၢၵ်ႈၵႂၢမ်းသေဢိူဝ်ႈ။ ၶႂ်ႈႁႂ်ႈၶဝ်ပဵၼ်ၵေႃႇၵူၼ်းဢၼ် မေႃထွမ်ႇဢဝ်မၢႆမီႈသေ ပဵၼ်ၵေႃႉ ႁၢပ်ႇပေႉပုၼ်ႈၽွၼ်းလီငၢမ်းဢိူဝ်ႈ။ ၶႂ်ႈႁႂ်ႈပဵၼ်ၽူႈၵေႃႉၸိူဝ်းဢၼ်ဢဝ်တၢင်းႁၵ်ႉၽႂ်ႇဝႆႉၼႃႈ ပႃးထႅင်ႈတၢင်းဢေးလူ ႁူမ်ႈပႃးလွင်ႈပၼ်မႅင်ႇႁႂ်ႈပၺ်ႇၺႃႇၼၼ်ႉဢိူဝ်ႈ။ ၶႂ်ႈႁႂ်ႈပဵၼ်ၽူႈၵေႃႉၵူၼ်းဢၼ် ဢွၼ်ၵၼ်မေႃယိပ်းၵႅမ်းတြႃးၽူႈလီ ဢၼ် တၢင်းႁဵတ်းသၢင်ႈႁၢပ်ႇၸွၺ်ႈပၼ်လႆႈ တႃႇၽွၼ်းပၢင်ႈလီ တႃႇၵူၼ်းတင်းလၢႆၶဝ်ၼၼ်ႉလႂ်ဢိူဝ်ႈ။ ၶႂ်ႈႁႂ်ႈပဵၼ်ၽူႈလီၵူၼ်း ၵတ်ႉ ဢၼ်ၶႅၼ်ႇတွၼ်းတိူဝ်းလိူဝ်သေ ၵေႃႉပဵၼ်မေႃသွၼ်ၶဝ်ၼၼ်ႉဢိူဝ်ႈ။ မေႃသွၼ်ဢၼ်ဝႃႈၼႆႉ ငိုၼ်းၼိူင်ႈထႅပ်ႇ ယင်းဢမ်ႇမီးၵေႃႈ၊ လုၵ်ႈႁဵၼ်းတႄႉဢမ်ႇၶႅပ်ႉသႄႈ။ ဢဝ်တၢင်းလွင်ႈၸူမ်းၽႂ်ႇ ႁၢၼ်ႉၸႂ်သေၵေႃႈ ပဵၼ်ႁႅင်းလႆႈယူႇ မီးႁႅင်းဢဵၼ်လႆႈယူႇဢိူဝ်ႈ။ ၵွပ်ႈဝႃႈမေႃသွၼ်ၼႆႉ ပေႃးလႆႈႁၼ်မႅၼ်ႈ လုၵ်ႈၼွင်ႉတပေးတူဝ်ၵဝ်ႇၶဝ် ၶိုၼ်ႈယႂ်ႇမႂ်ႇသုင်မၢၵ်ႈ မုၼ်းမႃးဝႆႉၼႆၵေႃႈ ဢဝ်ပဵၼ်တၢင်းတၢင်းၸူမ်းၽႂ်ႇ သိူဝ်းၸႂ်လႆႈၼၼ်ႉလႄႈဢိူဝ်ႈ။  ၼွၵ်ႈသေၼႆႉ လုၵ်ႈႁဵၼ်းၶဝ်ၼႆၵေႃႈ တေႃႇထိုင်ယၢမ်းလဵဝ်တိုၵ်ႉလႆႈႁၼ်ၵူဝ်ယမ်ၼပ်ႉထိုဝ်တေႃႇမေႃသွၼ်ၶဝ်ဝႆႉယူႇ တင်းၼပ်ႉၼပ်ႉယမ်ယမ် ယူႇယဝ်ႉ။ ဢွၼ်ၵၼ်ထွမ်ႇဢဝ်ၶေႃႈၵႂၢမ်းသင်ႇသွၼ်သေယဝ်ႉ လႆႈႁၼ်လွင်ႈၶဝ်ဢွၼ်ၵၼ်ၶတ်းၸႂ် တႃႇႁႂ်ႈလႆႈၵတ်ႉလႆႈထီႈသုတ်း သေ ႁဵတ်းသၢင်ႈတႃႇတၢင်းၶိုၼ်ႈယႂ်ႇၸူဝ်ႊပၢၼ်တူဝ်ၵဝ်ႇၶဝ်ဝႆႉၵၼ်ယူႇဢိူဝ်ႈ။ လုၵ်ႈၼွင်ႈမၢင်ႊၸိူဝ်းၶဝ်ၼႆ ႁူမ်ႊဝႃႈလႆႈ ၵႂႃႇပဵၼ် ၽူႈမီးၸၼ်ႉလူင်ၶဝ်သေ သမ်ႉဢွၼ်ၵၼ်လႆႈၵႂႃႇႁၢပ်ႇထၢမ်းဝႆႉပုၼ်ႈၽွၼ်းယႂ်ႇလူင်ၼၵ်းၼႃ ဢၼ်လိူဝ်သေ၊ ဢၼ်သုင်သေ၊ ဢၼ်ယႂ်ႇသေတူဝ်ၵဝ်ႇဝႆႉယူႇသေတႃႉၵေႃႈ သမ်ႉလႆႈႁၼ်ၶဝ်ဢွၼ်ၵၼ်မေႃႁၵ်ႉ၊ မေႃၼပ်ႉထိုဝ်ထိုင် မေႃသွၼ်ၶဝ် မေႃထွမ်ႇဢဝ်ၶေႃႈၵႂၢမ်းမေႃသွၼ်ၶဝ်ဝႆႉယူႇလႄႈ တၵ်းလႆႈပဵၼ်တၢင်းႁူမ်ၸူမ်းသိူဝ်းၸႂ်ၸွမ်းယူႇတေႉယဝ်ႉ ဢိူဝ်ႈ။ မေႃသွၼ်ဢၼ်ဝႃႈၼႆႉ ပဵၼ်ၵေႃႉၵူၼ်းဢၼ် ဢမ်ႇယိပ်းတိုဝ်းၵမ်ယုၼ်ႈ (သူၵ်ႉတၢၼ်ႇ)သင်၊ ဢမ်ႇၸႂ်ႉတိုဝ်း ၼမ်ႉယႃႈယွမ်ႉသင်သေ ဢၼ်ဢွၼ်ၵၼ်မေႃႁၢင်ႈၶိူင်ႈတႅင်ႇႁၢင်ႊပၼ်  တင်းႁၢင်ႊလီတီႈ မၢၵ်ႇႁူဝ်ၸႂ်ၼၼ်ႉဢိူဝ်ႈ။ ၼင်ႇ ႁိုဝ် ၸူဝ်ႊပၢၼ်လၢႆၸိူဝ်ႉလၢႆမဵဝ်းၶဝ် ပေႃးတေၸၢင်ႊႁၢင်ႊလီတဵမ်တၢၼ်းၸုမ်ႇၵူႈမႃးလႆႈၼၼ်ႉ ၸွၺ်ႈထႅမ်ပၼ် တင်း ဢမ်ႇၽႂ်ႇတႂ်းတေႃႇၶူဝ်းၶွင် ၵုင်ႇၶူဝ်းၶိူင်ႈသင်ၼၼ်ႉယဝ်ႉ။ ၼင်ႇႁိုဝ်ၵိင်ႇၶႃႊၶဝ် ပေႃးတေဢမ်ႇၵၢၼ်ႉႁၵ်းလူႉလႅဝ်ၵႂႃႇ ၼၼ်ႉလႂ်၊ ၼင်ႇႁိုဝ်တုမ်ႇမွၵ်ႇလႄႈ  မွၵ်ႇလူင်တူၼ်ႈၶဝ်ပေႃးတေဢမ်ဝူင်ႁၢႆ ပိဝ်ႊပႅတ်ႈၵႃႇၼၼ်ႉလႂ်ၵေႃႈ မေႃသွၼ်ၶဝ်ၼႆႉ ဢွၼ်ၵၼ်လႆႈႁဵတ်းသၢင်ႈပၼ်ဝႆႉ တင်းဢဵၼ်တင်းႁဵင်း တင်းႁိုၼ်ႇတင်းၵိုဝ်ႉလူင်ဝႆႉဢိူဝ်ႈ။ ၼႆ့ၵေႃႈပဵၼ် တၢင်းသၢင်ႈ မေႃသွၼ်ယဝ်ႉ။ ထႅင်ႈလၢႆးၼိူင်ႈၵေႃႈ ၸဝ်ႉႁၵ်ႉၽႂ်ႇလူင် ဢၼ်ၵုင်ႇၵုၼ်းမုၼ်ယႂ်ႇၼႃႇသေ ဢၼ်ပဵၼ်မေႃသင်ႇသွၼ် ဢွၼ်လီလူင်၊ မေႃသွၼ်တီႈႁဝ်းၶဝ်တေႉတေႉၸဵမ်ပိုင်း ဢၼ်ပဵၼ်မေႃသွၼ်ငဝ်ႈမိုဝ်း ဢူႈတင်းမႄႈႁဝ်းၶဝ်ၼၼ်ႉၼႆ ၵေႃႈ ယင်းမီးလူးၵွၼ်ႇ မေႃသွၼ် လႄႈ ဢူႈမႄႈႁဝ်းၶဝ်ၼႆႉ ဢမ်ႇၸႅၵ်ႇၽႄတေႃႇၼိူဝ်လုၵ်ႈႁဵၼ်းဝႃႈ ပဵၼ်ၼိူဝ်ႉၼင် ဢူင်ႈမိုဝ်းၾႃႇမိုဝ်းလင်မိုဝ်းသင်သေ  ဢွၼ်ၵၼ်ပၼ်‍ပိုၼ်ႉႁူႉတင်း🌫️ထၢတ်ႈႁၵ်ႉၽႂ်ႇမႃးတင်းၽဵင်ႇၽဵၼ်ႈလီငၢမ်းယဝ်ႉ။ ဢွၼ်ၵၼ်ဢဝ်ၼမ်ႉၸိုမ်းသႅင်ႁၵ်ႉၽႂ်ႇ သွၼ်းယမ်းပၼ်မႃးယူႇယဝ်ႉ။ ဢဝ်တၢင်းသၢႆငဝ်းလႅင်းႁၵ်ႉၽႂ်ႇသေ ပိူင်းၼေ ပၼ်ၶၢဝ်းတၢင်းမႃးယဝ်ႉ။ ဢဝ်တၢင်းသၢႆသီတၢင်းႁၵ်ႉၽႂ်ႇသေ ႁဵတ်းႁႂ်ႈႁိူင်းႁိူဝ်ႈလိူမ်ႈလႆႇမႃႈယဝ်ႉ။ ၵွပ်ႈၼႆသေ ၸင်ႇ ဢွၼ်ၵၼ်ယုၵ်ႉယွင်ႈတၢင်ႇလၢတ်ႈမႃးၵၼ်ဝႃႈ ထၢတ်းႁၵ်ႉၽႂ်ႇၼႆႉ မၼ်းသႂ်ၸၢင်ႇၵတ်းယဵၼ်လီ တၢၼ်ႇၼမ်ႉၸိုမ်းဢွၵ်ႇ သႅင်ႁိၼ်ၼၼ်ႉ ၼႆမႃးယူႇယဝ်ႉ။ တီႈၵူၼ်းႁဝ်းၵူႊၵေႃႉ ၵူႊၵေႃႉၼႆႉ ထုၵ်ႇလီလႆႈဢွၼ်ၵၼ်ဝႆႉမီး ဝႆႉတၢင်းႁၵ်ႉၽႂ်ႇ(မဵတ်ႈတႃႇ)ယူႇဢိူဝ်ႉ။ တီႈၼႆႈၼႆႉ- ဢူႈမႄႈတင်းလုၵ်ႈလၢင်း၊ မေႃသွၼ်တင်းလုၵ်ႈႁဵၼ်း၊ ၽူႈဢုပ်ႉပိူင်ႇၽွင်းငမ်းလႄႈ ၵူၼ်းမိူင်း၊ ၵေႃႉသေႈဢူၺ်းလီၶဝ်ၼင်ႇၵၼ်၊ ဢမ်ႇလိူၵ်ႈၽႄဝႃႈ ၵူၼ်းလူင်ၵူၼ်းဢွၼ်ႇဢီႈသင်၊ ဢမ်ႇလိူၵ်ႈၽေဝႃႈၸၼ်ႉ ထၢၼ်ႈ၊ ဢွင်ႈတီႈ၊ လဵၼ်ႊတွၼ်ႊဢီႈသင်သေ ပိူင်လူင်မၼ်း ဢၼ်ထုၵ်ႇလႆႈဝႆႉဝၢၼ်းပၼ်ၼႆႉၸမ်း ၵူၺ်းပဵၼ်တၢင်းႁၵ်ႉ ၽႂ်ႇ(မဵတ်ႉတႃႇ) ၵွၺ်းယဝ်ႉၼႆ  ႁပ်ႉႁၼ်ထၢင်ႇဢဝ်ဝႆႉၼင်ႇၼႆယဝ်ႉ။

           ၶေႃႈလူပ်းတႃႇၶွတ်ႇယွတ်ႈမၼ်းတႄႉ ၵႃႊဢၼ်ပဵၼ်သေမီးဝႆႉယူႇတီႈ လုမ်ႈၾႃႉလူင် ဝၼ်းမိူဝ်ႈၼႆႉတင်းသဵင်ႈ ၼႆႉ မၼ်းဢမ်ႇၸႂ်ႈတႃႇသေႇတေႃႇသုတ်းပၢၼ်၊ ၵႃႊဢၼ်လႆႈႁၼ်မႃးၼၼ်ႉ မၼ်းပဵၼ် တၢင်းတိုၼ်းလႅၵ်ႈလၢႆႈလွၼ်ႉ လွၼ်ႉယဝ်ႉ။ ၽွင်းၶၢဝ်းမိူဝ်ႈလႆႈႁူပ်ႉထူပ်းမႃး တႃႇၸူဝ်ႊၵႅပ်ႉဢွၼ်ႇၼႆႉၼႆႉ၊ ႁႂ်ႈဢွၼ်ၵၼ်ၸၢင်ႊႁပ်ႉဢဝ်လႆႈ ထၢတ်ႈႁၵ်ႉ ၽႂ်ႇမဵတ်ႉတႃႇၵႂႃႇၽဵင်ႇၽဵၼ်ႈ ၼႂ်းၸူဝ်ႊၸၢတ်ႈပၢၼ်ၵူၼ်းလႆႈသေၵမ်း။ ၽူႈၵေႃႉသူင်ႇဝၢၼ်းပၼ် ထၢတ်ႈႁၵ်ႉၽႂ်ႇ၊ ႁူမ်ႈပႃး ၽူႈႁပ်ႉႁွမ်းဢဝ် တၢင်းႁၵ်ႉၽႂ်ႇၶဝ်တင်းသဵင်ႈသဵင်ႈၼႆႉ ႁႂ်ႈၸၢင်ႊၵၢင်ၸႂ် ၽဵင်ႇလႅပ်ႈတဵမ်လီလႆႈ ၼင်ႇၵၼ် သေၵမ်းၶႃႈ။

           မဵတ်ႈတႃႇၼမ်ႉၸိုမ်းသႅင် သဝ်းၽႅင်တီႈၵူႊၵူၼ်း ႁႂ်ႈသိူဝ်းလူၼ်းၵတ်းယဵၼ်လႆႈ သေၵမ်းၶႃႈၼေႃႈ။

လုင်းၸၢႆးၾႃႈ(ၵဵပ်းႁွမ်တႅမ်ႈ)

(႑႓:႔႘)႑႑.႐႖.႒႐႑႙,ၽႉၽ-ပၢင်ႇလေႃႉ။ဝ.ႁ-႒ လူင်(႔႔႘)

← လိုၼ်း · လမ်းၼႂ်း