လိၵ်ႈပိုတ်ႇပၼ်ပိုၼ်ႉႁူႉ မၢႆသၢမ်/ပႆတၢင်းတူၺ်းတႂ်ႈလႅင်းလိူၼ်

တေႃႇတီႈၵူၼ်းႁဝ်းၵူႊၵေႃႇၵူႊၵေႃႉၶဝ်ၼႆႉ ဢွၼ်ၵၼ်မီးမႃးၼႃႈလိၵ်ႈမိူဝ်ႈၸူဝ်ႊပၢၼ်ဢွၼ်ႇ ဢၼ်ၸိူဝ်းဢမ်ႇ မိူၼ်ၵၼ်ၼၼ်ႉဝႆႉယူႇၵၼ်ဢိူဝ်ႈ ၼင်ႇၼႆယဝ်ႉ တီႈၼိူဝ်ၽိဝ်ၼႃႈလိၵ်ႈၸိူဝ်းၼၼ်ႉၼႆ ငဝ်းႁၢင်ႊဢွၼ်ႇဢၼ်ပဵၼ်လီ မၢႆတွင်း ဢၼ်တၢမ်တူဝ်တူဝ်ၵဝ်ႇလႆႈတႅမ်ႈၶၢၼ်ႇမႃး၊ လႆႈသုၼ်ႇတႅမ်ႈၸၼ်မႃးၸိူဝ်းၼၼ်ႉၼႆႉၵေႃႈ ႁူႉတၵ်းၵႃႊ တေမီး မႃးၵၼ်ယူႇဢိူဝ်ႈ။ ႁူမ်ႊဝႃႈ ၸူဝ်ႊပၢၼ်မိူဝ်ႈဢွၼ်ႇၼႆသေတႃႉၵေႃႈ ဢၼ်ၵဝ်ၶႃႈယိူင်းဢၢၼ်းၼႆႉတႄႉၸမ်း ပဵၼ်ၽွင်း ယၢမ်းၶၢဝ်း ဢၼ်ဢွၼ်ၵၼ်ယၢမ်ႈလႆႈၶတ်းၸႂ်မႃး တႃႇဢၢၼ်ႇၼပ်ႉတူၺ်း လုၵ်ႈလၢဝ်ၸိူဝ်းမီးတီႈ ၼိူဝ်ၵွင်းၵၢင်ႇၵၢင်ႁၢဝ် ၼၼ်ႉၵွၺ်းဢိူဝ်ႈ။ တီႈၼႂ်းၶုၼ်လိူၼ်လူင်ဝူင်းမူၼ်း ဢၼ်တဵမ်တၼ်းလီဝႆႉၼၼ်ႉၼႆၵေႃႈ မီးဝႆႉပၢင်တၢႆးတူဝ်ၼိူင်ႈ တင်းပူႇထဝ်ႈသုတ်ႇတမ်ၶဝ်ႈၵေႃႈၼိူင်ႈတေႉတေႉ ဢၼ်ဝႃႈၼၼ်ႉၵေႃႈ ပဵၼ်ၶၢဝ်းၽွင်းဢၼ်ဢွၼ်ၵၼ် ယုမ်ႇယမ်ဝႆႉယူႇ ၼၼ်ႉဢိူဝ်ႈ။

တီႈတေႉမၼ်းၵေႃႈ ၸဵမ်မိူဝ်ႈၸူဝ်ႊပၢၼ်လုၵ်ႈဢွၼ်ႇ ၽွင်းႁဝ်းၶဝ်လဵၵ်ႉၼၼ်ႉယဝ်ႉ ယၢမ်းလႆႈဢွၼ်ၵၼ်ၶတ်း ၸႂ် ဢၢၼ်ႇၼပ်ႉတူၺ်းတေႃႇ လၢဝ်ဢၼ်လႅင်းမၢပ်ႈယူႇၼိူဝ်ၵၢင်ႁၢဝ်မႃး ယူႇယဝ်ႉ။ “ၼိူင်ႈလုၵ်ႈ - သွင်လုၵ်ႈ - လၢဝ်တင်း သဵင်ႈတင်းလူင်ၼႆႉ ၼိူင်ႈလုၵ်ႈပဵၼ်ၸၢၵ်ႈၸႃႇလုမ်ႈၾႃႉလၢဝ်ၼိူင်ႈဢၼ်” ဢၼ်ဝႃႈၼၼ်ႉ ပွင်ႇဝႃႈဢမ်ႇၸၢင်ႊဢၢၼ်ႇ ၼပ်ႉလႆႈ လၢဝ်ၶဝ်လႆႈသဵင်ႈယဝ်ႉလႄႈ ဝႃႈမႃးၼၼ်ႉၵွၺ်းယဝ်ႉ။ ၼင်ႇၼႆယဝ်ႉ တီႈၼႂ်းလုၵ်ႈလိူၼ်လူင်ၼၼ်ႉသမ်ႉ မီးဝႆႉပူႇထဝ်ႈၵေႃႉၼိူင်ႈတင်း တီႈႁိမ်းၶၢင်ႈမၼ်းမီးပၢင်တၢႆးဢွၼ်ႇတူဝ်ၼိူင်ႈ ၼင်ႈဝႆႉၼၼ်ႉၼႆၵေႃႈ ပေႃးပဵၼ်မိူဝ်ႈၶမ်ႈလိူၼ်လႅင်းၼၼ်ႉၼႆ ႁဝ်းၶႃႈၶဝ်ဢွၼ်ၵၼ် ယၢမ်ႈလႆႈၶတ်းၸႂ်ႁႃတူၺ်းမႃးယူႇ တေႉတေႉယဝ်ႉဢိူဝ်ႈ။ ဢႃႈပုမ်ႇၶဝ်၊ ဢႃႈပုမ်းၶဝ် ၶေႃႈၵႂၢမ်းတေႃႇယုမ်ႇၶဝ် ၸိူဝ်းၼႆႉၼႆၵေႃႈ ဢွၼ်ၵၼ်ယုမ်ႇဢဝ်ၽိတ်းမႃးဝႃႈ မၼ်းပဵၼ်မႃးတေႉတေႉဢိူဝ်ႈ ၼႆလႄႈ ပဵၼ်ၽွင်းၶၢဝ်းဢၼ်လႆႈတွင်းမၢႆယုမ်ႇဢဝ်ၽိတ်းၼႆ ယင်းဝႃႈလႆႈယူႇ။ တေႃႈၽဵတ်ႇၶဝ်ၽီၶဝ်၊ ၵူၼ်းယွင်ႇၵူၼ်း ႁူဝ်ၸႂ်ဢမ်ႇလီ ၶဝ်ၸိူဝ်းၼႆႉၵေႃႈ ပေႃးဢဝ်မႃးယွၵ်ႇမႃးလွၵ်ႇၼႆ ပဵၼ်ၽွင်းဢွၼ်ၵၼ် ၸၢင်ႊမေႃၵူဝ်ႁႄၼၼ်ႉယဝ်ႉ ပေႃးဝႃႈၼႆၵေႃႈ တေတိူဝ်းသေမၢၼ်ႇမႅၼ်ႈယူႇ ထၢင်ႇၼင်ႇၼႆယဝ်ႉ။

တီႈတေႉမၼ်းမႃးၵေႃႈ တေႃႈပဵၼ်ၵူၼ်းလူင် ဢၼ်ၶူၼ်ႁူဝ်ၶဝ်ၽိူၵ်ႇဝႆႉတင်းႁူဝ်ၼၼ်ႉ မႃးလွၵ်ႇၵွၺ်းၵေႃႈ ယင်း ဢွၼ်ၵၼ်ၸၢင်ႊၵူဝ်ႁႄမႅၼ်ႈၵွၼ်ႇလႄႈ ပဵၼ်မိူဝ်ႈဝၼ်းဢၼ်ဢွၼ်ၵၼ် ၵၢင်းယၢၼ်ဝႆႉတင်းတၢင်းၵူဝ်ႈၼုၵ်းဢိူၵ်ႇဢၢၵ်ႇဝႆႉၼၼ်ႉဢိူဝ်ႈ။ “ ၼဵၼ်ႉၵူၼ်းယွင်လူင်မႃးယဝ်ႉ၊ ဢၢႆႈႁူဝ်ၽိူၵ်ႇလူင်မႃးယဝ်ႉၼဵၼ်ႉ”ၼႆသေ ၵူၼ်းလူင်ၶဝ်ႁဵတ်းလွင်ႈလွၵ်ႇၵူဝ်မႃးလႄႈ လႆႈဢွၼ်ႇၵၼ်လႅၼ်ႈပၢႆႊၵၼ်မႃး တင်းၵူဝ်တင်းႁႄယဝ်ႉဢိူဝ်ႈ။ ပဵၼ်မိူဝ်ႈဝၼ်းဢၼ် ဢွၼ်ၵၼ် ၽိူၵ်ႇ ၸိုၼ်ႈၶၢဝ်သႂ်မႃးတေႃႇထၢၼ်ႈၼၼ်ႉယဝ်ႉသႄႈ။ တေႃႈၶေႃႈၵႂၢမ်းၸႂ်ႉတိုဝ်းဢၼ်ဝႃႈ ပူႇပၢတ်ႇၼႆႉၼႆၵေႃႈ လႆႈပဵၼ်မႃး ၶေႃႈၸႂ်ႉတိုဝ်း ဢၼ်လီထီႈသုတ်း တႃႇၵႂၢၼ်းပႂ်းဝႆႉလႆႈ၊ ဢၼ်တႃႇယႃႇႁႂ်ႈလုၵ်ႈဢွၼ်ႇၶဝ် လႆႈႁၢႆၵႂႃႇတႂ်ႈတႃၵူၼ်းလူင်ၶဝ် ၼၼ်ႉမႃးယူႇတေႉဢိူဝ်ႈ။ ပူႇပၢတ်ႇဢၼ်သမ်ႉၵွၺ်း လိူၵ်ႈဢဝ်တႃႇတတ်းၵွၵ်းႁူဝ်လုၵ်ႈဢွၼ်ႇ ဢၼ်ၸိူဝ်းယူႇသဝ်းမႃး တင်းယူဝ်းၽဵင်ႈၽိူၵ်ႇၸိုၼ်ႈၼၼ်ႉၼႆ တေယၢမ်ႈလႆႈငိၼ်းၵၢၼ်မႃးယူႇ ၵူႊၵေႃႉယူႇယဝ်ႉ။ ၼင်ႇၼႆယဝ်ႉ တီႈဢၼ်တေ ၵႂႃႇတိုၵ်းသိုၵ်းၼၼ်ႉ ပေႃးပဵၼ်ၵေႃႉဢၼ်ၶဵမ်ပၵ်းမႄႈမိုဝ်းၼႃႈဢမ်ႇပိူင်ႈ ၸင်ႇလႆႈၶၢမ်ႇလိူၵ်ႈပဵၼ် ၽူႈႁတ်းငၢၼ်သေ ၼၼ်ႉလႂ်၊ တေႃႈၵွၺ်းဢဝ်ၾႃႇမိုဝ်းတူပ်းသႂ်ႇၶႃလူင်သေၵေႃႈ ၸၢင်ႊၵျွၵ်းဝႅၼ်မဝ်လႆႈထိုင်တီႈသုင်သေယဝ်ႉ၊ ယင်းပၢႆ ၸၢင်ႊၵႂႃႇၼွၼ်းလႆႈ တီႈၼိူဝ်တွင်ၵူၺ်းၵွၼ်ႇ ၼင်ႇဢၢႆႈၽူႈလၵ်ႉလူင် ငတႅတ်ႉပျႃး ဢၼ်ဝႃႈၼၼ်ႉ ပဵၼ်လွင်ႈတၢင်းၵူၼ်းလၢၵ်ႇလၢၵ်ႇလၢႆးလၢႆးၶဝ်ၸိူဝ်းၼၼ်ႉ လႆႈမႃးသုမ်ႇငမ်းဝႆႉဢိူဝ်ႈ၊ ပဵၼ်ၽွင်းၶၢဝ်းၸိူဝ်းၸိူဝ်ႉၼင်ႇၼၼ် ၶဝ်ႁူမ်ႇမုင်း ဝႆႉဢိူဝ်ႈ။

တီႈတေႉမၼ်း တေႃႈၶေႃႈထၢမ်ဢၼ်ဝႃႈ “ပေႃးလုၵ်ႈၵဝ်ယႂ်ႇမႃးတေႁဵတ်းဢီႈသင်၊ ပေႃးလၢၼ်ဢွၼ်ႇၵဝ်ယႂ်ႇ မႃးၼႆ တေႁဵတ်းသင်” ၼႆၼၼ်ႉ လႆႈၸွမ်းဢဝ်တၢင်းသူႈၸႂ်တေႃႇ ၵူၼ်းလူင်ၶဝ်သေတွပ်ႇဝႃႈ-“တေႁဵတ်းမေႃယႃလူင်၊ တေႁဵတ်းႁူဝ်သိုၵ်းလူင်၊ တေႁဵတ်းၸၢင်ႊလူင်ၾူးၵၢၼ်ၸၢၵ်ႈ” ၼႆသေတႄႇၵႂႃႇ။ လႆႈလိူၵ်ႈဢဝ်ၵၢၼ်ဢၼ်ၼိူင်ႈ ၼႂ်းၵႃႊ တင်းၼမ် ဢၼ်ၵူၼ်းလူင်မိူင်းႁဝ်းၶဝ် ထုၵ်ႇၸႂ်ၼမ်သေပိူၼ်ႈၼၼ်ႉသေ လိူၵ်ႈတွပ်ႇပၼ်ယဝ်ႉ၊ ၼႂ်းၵႃႊ မၢႆဝၼ်းၸူဝ်ႊ ပၢၼ်လုၵ်ႈဢွၼ်ႇႁဝ်းၶဝ်ၸိူဝ်းၼၼ်ႉ ဢမ်ႇမီးမႃးတၢင်းၽႂ်ႇမွင်းလႄႈယိူင်းဢၢၼ်းသင်ၶႃႈ။ ၼင်ႇၼႆယဝ်ႉ ၼွၵ်ႈသေလွင်ႈ ဢဵၼ်ႈလူၼ်း၊ လွင်ႈသွၼ်လိၵ်ႈ၊ လွင်ႈၼွၼ်းလိုဝ်ႈၸိူဝ်းၼႆႉသေ ဢမ်ႇလႆႈမီးလွင်ႈတၢင်းလီလႆႈမႆႈၸႂ်ဢီႈသင် သေၸိူဝ်ႉ သေပိူင် ၶဝ်မႃးၶဝ်ႈၸိမ်ၶုၺ်ႉႁူႉဢဝ်တီႈ ယူႇသႄႈ။ တီႈတေႉမၼ်းၵေႃႈ မိူဝ်ႈၶၢဝ်းၽွင်းၸိူဝ်းၼင်ႇၼၼ်ၼၼ်ႉၼႆ ႁဝ်းၶႃႈ ၶဝ်ၼႆႉ ၼွၵ်ႈသေလွင်ႈလူၼ်းဢဵၼ်ႈ၊ လွင်ႈသွၼ်လိၵ်ႈၸိူဝ်းၼႆႉသေ ဢမ်ႇမီးမႃးလွင်ႈသူၼ်ၸႂ်ၶဝ်ႈၸႂ်တေႃႇ လွင်ႈတၢင်း ဢီႈသင်သႄႈ။ ပေႃးမီးလွင်ႈတၢင်းဢၼ်ၶႂ်ႈလႆႈမႃးၼႆၵေႃႈ မေႃတုၵ်းယွၼ်းဢဝ်တီႈ ပီႈဢိၵ်ႇၼွင်ႉၶဝ်သေ ပေႃးဢမ်ႇလႆႈ ၼႆၵေႃႈ ၸၢင်ႊႁႆႈ ၸၢင်ႊၸႂ်ငေႃးပႅတ်ႈဢိူဝ်ႈ။ ၼွၵ်ႈသေၼႆႉ ဢမ်ႇမီးတၢင်းႁူႉ၊ မေႃႁူႉတေႃႇတၢင်ႇဢၼ်ဢီႈသင်သႄႈ၊ မိူဝ်ႈၽွင်းၼၼ်ႉၼႆ တီႈၼႂ်းၸႂ်ႁဝ်းၶႃႈၶဝ်ၼႆႉ ဢမ်ႇမီးသီငဝ်းၼမ်ႉယွမ်ႉဢီႈသင်မႃး တႅမ်ႈယွမ်ႉၶၼ်ႇၶဵၼ်ႇဝႆႉၵွၼ်ႇလႄႈ ပဵၼ်ဝႆႉၼင်ႇ ၸေႈပဝ်ႇလွတ်ႈဝႂ်ၼိူင်ႈၼၼ်ႉယဝ်ႉ။ ၼင်ႇၼႆယဝ်ႉၽၢႆႇၼိူင်ႈၵေႃႈ သမ်ႉပေႃးတၢၼ်ႇယုမ်မွၵ်ႇၵုမ်ႈ ဢၼ် တူဝ်ႈတၼ်းဝႆႉတႃႇပိဝ်ႊဝူင်ၶၢႆၸူးပႃးၸွမ်းၵႃႇ ၽၢႆႇပႃႈဢၼ်လူမ်းၶဝ် ပဝ်ႇထူဝ်းထွင်းၽၢႆႇလႂ်ၵေႃႈလီၼၼ်ႉ ဝႆႉၼၼ်ႉ ယဝ်ႉ။ ပဵၼ်ဝႆႉဢူၼ်ႈဢွၼ်ႇၼုမ်ႇလီ ပေႃးတၢၼ်ႇတုမ်ၶီႈၽိုင်ႈၶီႈတဵၼ်းၶဝ် ဢၼ်သွၼ်းၶႅၵ်းမႄးႁၢင်ႊဢဝ်လႆႈငၢႆႈၼၼ်ႉ ဝႆႉဢိူဝ်ႈ။

တီႈတေႉမၼ်းၵေႃႈ ႁဝ်းၶႃႈၶဝ်ၼႆႉ မိူဝ်ႈၽွင်းၼၼ်ႉၼႆဢွၼ်ၵၼ်လႆႈတူၺ်းငဝ်းၵႃးတိုၵ်းသိုၵ်း ၶဝ်သေယဝ်ႉ ဢွၼ်ၵၼ်ၶႂ်ႈပဵၼ်လုၵ်ႈသိုၵ်းလူင်ၶဝ်မႃးၵၼ်ယူႇယဝ်ႉ။ ထႅင်ႈသမ်ႉၽိူဝ်ႇလႆႈႁၼ်မႅၼ်ႈ မေႃယႃလူင်ၶဝ်မႃးၼမ်ယဝ်ႉၼႆ ၵေႃႈ သမ်ႉၶႂ်ႈပဵၼ်မေႃယႃလူင်ၵေႃႉၼိူင်ႈမႃးယဝ်ႉ။ ဢၼ်ၶႂ်ႈဝႃႈတႄႉ မိူဝ်ႈၽွင်းၼၼ်ၼၼ်ႉ ႁဝ်းၶႃႈၶဝ်ၼႆႉ ဢွၼ်ၵၼ် လႆႈ ၶၢမ်ႇတၢင်းလွင်ႈႁူမ်ႇငမ်းငဝ်းသုမ်ႇသိုင်ႇႁိမ်းႁွမ်းႁဝ်းဝႆႉ ၼၼ်ႉဢိူဝ်ႈ။ ပေႃးတၢၼ်ႇၼူၵ်ႉၶဵဝ်ဢွၼ်ႇ ဢၼ်လႆႈၽႅဝ်ၵႂႃႇတီႈ ၽူႈလၵ်ႉၵူၼ်းႁၢႆႉလႄႈ ဢၼ်လႆႈၽႅဝ်ႁွတ်ႈၵႂႃႇတီႈၸဝ်ႈရသေးၶဝ်ၼၼ်ႉယဝ်ႉ။ လႆႈဢွၼ်ၵၼ်ၶၢမ်ႇ တၢင်းလွင်ႈႁူမ်ႇငမ်း ငဝ်းသုမ်ႇဢၼ်ၸပ်းၸမ် တင်းတူဝ်ၵဝ်ႇႁဝ်းၶဝ်ၼၼ်ႉဢိူဝ်ႈ။ လုၵ်ႈဢွၼ်ႇၵေႃႉၼိူင်ႈ ဢၼ်လႆႈယႂ်ႇမႃးၼႂ်းၵႄႊၸုမ်းၸိူဝ်းၵူၼ်းလၢႆ ဢၼ်မီးတၢင်းသူင်လူလိၵ်ႈလူလၢႆးၼၼ်ႉၼႆ တေၸၢင်ႊပႃးမႃး တၢင်းသူင်လူလိၵ်ႈသေယဝ်ႉ၊ ပေႃးပဵၼ်လုၵ်ႈဢွၼ်ႇ ဢၼ်လႆႈယူႇၸမ်ၸပ်းၸွမ်းတင်း ၵူၼ်းသူင်တေႃႇလွင်းၶဝ်ၼႆ တေၸၢင်ႊပဵၼ်မႃး ၵူၼ်းမေႃတေႃႇလွင်း ၼၼ်ႉယဝ်ႉ၊ မၼ်းပဵၼ်ဝႆႉ ၾိင်ႈတႅတ်ႈၼင်ႇၼႆဢိူဝ်ႈၼႆ ၶႂ်ႈမၢႆထိုင်ၼင်ႇၼႆ။ ၼင်ႇၼႆယဝ်ႉ ၽူႈၵေႃႉဢၼ်ၽၢတ်ႇဢွၵ်ႇ တင်း သိုင်ႇႁိမ်းႁွမ်းဢၼ်ၸပ်းၼၼ်ႉသေယဝ်ႉ ပဵၼ်မႃးပိူင်သၢင်ႇဢၼ်ဢမ်ႇမိူၼ်ပိူၼ်ႈ ၸိူဝ်းၼၼ်ႉၼႆၵေႃႈ ၸၢင်ႊမီး လႆႈယူႇၼင်ႇၵဝ်ႇယဝ်ႉ။

ၶႂ်ႈပဵၼ်ၸိူင်ႉႁိုဝ်ၵေႃႈလၢႆး၊ ၶႂ်ႈဝႃႈလႆႈယူႇသၢင်ႈသဝ်းတင်းသိုင်ႇႁိမ်းႁွမ်းမႃးၸိူင်ႉႁိုဝ်ၵေႃႈလီ၊ ယွၼ်ႉၵွပ်ႈပဵၼ် ၸူဝ်ႊပၢၼ် ဢၼ်တၢင်းမေႃၶႆႈၸႂ်ႁိဝ်ႈၸင်ႊလႆႈၼၼ်ႉ တိုၵ်ႉဢေႇဝႆႉၵွၼ်ႇလႄႈ ႁူႉၵႃႊတေၸၢင်ႊပူၼ်ႉပႅၼ်ၽိတ်းမႅၼ်ႈ လႆႈတေႃႇ တၢင်းၽိတ်းပိူင်ႈယူႇ ဢမ်ႇႁၢင်ႉယဝ်ႉ။ ပေႃးတေလႆႈႁပ်ႉယိုၼ်တႃႇ တၢင်းၸိုဝ်ႈၸႂ်ႈတေႉၼႆ တီႈၼႂ်းၼႃႈလိၵ်ႈ ၸူဝ်ႊပၢၼ်မိူဝ်ႈဢွၼ်ၵဝ်ႇၶႃႈၼၼ်ႉ ယၢမ်ႈလႆႈမီးမႃး ႁွၺ်းသႅတ်ႇမၢတ်ႇလမ်မၢင်ႊၸိူဝ်း ဢၼ်ပေႃးယႃႉမွတ်ႇမႄးဢဝ် ဢမ်ႇလႆႈၼၼ်ႉ ၵွၼ်ႇဢိူဝ်ႈ။ ယၢမ်ႈလႆႈမီးမႃးလွင်ႈပၢႆးဝူၼ်ႉတၢင်းႁၼ်ၽိတ်းၽႅၵ်ႇၽွင်ႈယူႇဢိူဝ်ႈ။ မိူဝ်ႈၼၼ်ႉတႄႉ ၵွပ်ႈပဵၼ်လုၵ်ႈဢွၼ်ႇ ၸူဝ်ႊပၢၼ်လုၵ်ႈဢွၼ်ႇလႄႈ ၶႃႈတေလႆႈဝႃႈ ပႆႇႁူႉလွင်ႈလီၸႃႉ ဢၼ်လႂ်ပဵၼ်ယွၼ်ႉ ဢၼ်လႂ်ပဵၼ် တွၼ်းမၼ်းၼႆသေတႃႇၵေႃႈ ပေႃးယၢမ်းၸင်ႇၼႆႉမႃးၼႆတႄႉ တႃႇလွင်ႈတၢင်းပိူင်ပဵၼ်ၸိူဝ်းၼၼ်ႉၼၼ်ႉ ၵဝ်ၶႃႈလႆႈဢၢႆမႅၼ်ႈတူဝ်ၵဝ်ႇၵဝ်ၶႃႈၶိုၼ်းယူႇဢေႃႈ။ ပိူင်ၼၵ်ႉမၼ်းတႄႉ မိူဝ်ႈဢၼ်လႆႈႁူပ်ႉတေႃႇ ၸိူဝ်းဢၼ်လႆႈၵွင်ႉၵၢႆႇၵၼ်မႃးၸိူဝ်း ၼၼ်ႉၶိုၼ်းပေႃးၼႆ ၸႂ်ၵူဝ်ၸႂ်ဢၢႆၵဝ်ၶႃႈၼႆႉ ၸၢင်ႊၶိုၼ်းမႃးသွၼ်ႉသႂ်ႇတီႈသီႇမွမ်ႈၸိၵ်းႁူဝ်ယူႇၵွၼ်ႇယဝ်ႉ။ ၶႂ်ႈပဵၼ်ၸိူင်ႉ ႁိုဝ်သေၵေႃႈလီ ပေႃးသေၵေႃႉသေၵူၼ်းတေမႃးဝႃႈ ႁႂ်ႈလၢတ်ႈၼေလွင်ႈ ၸိူဝ်းမိူဝ်ႈၼႂ်းၸူဝ်ႊပၢၼ် ဢၼ်ပဵၼ်မိူဝ်ႈဝၼ်း လႆႈလီမူၼ်ႊသိူဝ်းၸႂ်သေပိူၼ်ႈထီႈသုတ်းၼၼ်ႉၼႆ ၵဝ်ၶႃႈတႄႉ တေၶပ်းပွင်ၼေ မိူဝ်ႈဝၼ်းလွင်ႈတၢင်းဢၼ်လႆႈဢၢၼ်ႇၼပ်ႉလၢဝ်ၶဝ်မႃးၼၼ်ႉ ပၼ်ယူႇဢမ်ႇႁၢင်ႉယဝ်ႉ။ တေလႆႈၼေလွင်ႈလႆႈလႅမ်းႁႃပၢင်တၢႆးတူဝ်ၼိူင်ႈ ဢၼ်ဝႃႈမီးၼႂ်း လုၵ်ႈလိူၼ်ၼၼ်ႉမႃးၼၼ်ႉ ယူႇယဝ်ႉ။ တေၶူၼ်ႉၶႆႊၶိုၼ်းလွင်ႈတၢင်းၸိူဝ်းမိူဝ်ႈဝၼ်းဢၼ်လႆႈ သုၼ်ႇလူၼ်းလဵၼ်ႈ၊ တင်းလႅၼ်ႈတင်းၵျွၵ်းတင်းဝႅၼ် တႂ်ႈငဝ်းလိူၼ်မႃးၸိူဝ်းၼၼ်ႉယူႇ ၵွၺ်းယဝ်ႉ။

တီႈတေႉတေႉမၼ်းၼႆၵေႃႈ ၶၢဝ်းယၢမ်းႁဝ်းၶႃႈၶဝ် ဢၼ်ပဵၼ်ၸိုၼ်ႈၸၢင်ႇၶၢဝ်သႂ်သေပိူၼ်ႈ၊ ဢၼ်လီလႆႈ မူၼ်ႊသိူဝ်းသေပိူၼ်ႈသုတ်းၸိူဝ်းၼၼ်ႉၶဝ်ၼႆႉ ၵူၺ်းတေၸၢင်ႊႁႃႁၼ်ၶိုၼ်းလႆႈ တီႈၼႂ်းၼႃႈလိၵ်ႈၸူဝ်ႊပၢၼ် မိူဝ်ႈ ဢွၼ်ႇႁဝ်းၶဝ်ၼၼ်ႉၵွၺ်းယူႇယဝ်ႉ။ ၼင်ႇၼႆယဝ်ႉ ငဝ်းႁၢင်ႊဢၼ်ၸိူဝ်းလွတ်ႈၵၢင်းတၢင်းမႆႈၶီသေပိူၼ်ႈ၊ ဢၼ်လႆႈ သုၼ်ႇၶႅင်လႅင်းသိူဝ်းသႃႇၵတ်းယဵၼ်င်ိမ်းလီသေပိူၼ်ႈ ၸိူဝ်းၼၼ်ႉၼႆၵေႃႈ ၵူၺ်းတေၸၢင်ႊႁႃႁၼ်လႆႈ တီႈၼႂ်းၼႃႈလိၵ်ႈ ၸိူဝ်းမိူဝ်ႈၸူဝ်ႊပၢၼ်ဢွၼ်ႇႁဝ်းၶဝ်လႆႈ ၵွၺ်းယဝ်ႉ။ မွၵ်ႈၼႆႉၵွၺ်းႁႃႉပေႃးၼႆ - လၢႆးဝႆႉဝၢင်းၸႂ်၊ လွင်ႈတူင်ႉသၢင်ႈၵႂႃႇပႆ တႄႇၵႂႃႇ လွင်ႈဢၼ်ဢမ်ႇဝႆႉမီးမၢႆသိူဝ်ႉၶွတ်းငေႃးၼႂ်းလႂ်၊ လွင်ႈသိုဝ်ႈယူဝ်းၽဵင်ႈၶဝ်လႂ်၊ လွင်ႈဢမ်ႇမေႃသိူင်ႇလပ်ႉဢမ်ဢၵ်းဝႆႉလႂ်ၸိူဝ်းၼႆႉၼႆၵေႃႈ တၵ်းတေဢဝ်လၢတ်ႈလႆႈယူႇ။ တိုၵ်ႉတွင်းလႆႈယူႇၵွၼ်ႇဢိူဝ်ႈ။ ပဵၼ်မိူဝ်ႈၵၢင်ဝၼ်း ၽွင်းၶၢဝ်းမႆႈဢၼ်ၼိူင်ႈၼၼ်ႉဢိူဝ်ႈ။ မီးၶႅၵ်ႇၵေႃႉၼိူင်ႈ တင်းဢမ်ႇႁွင်ႉဢမ်ႇၼၢႆသင်သေ ၽႅဝ်မႃးတီႈႁိူၼ်းယူႇယဝ်ႉ။ ၵေႃႉပဵၼ်ဢူႈ ၶႃႈသမ်ႉ ဢမ်ႇၶႂ်ႈႁႂ်ႈႁူပ်ႉတင်းၵူၼ်းၶႅၵ်ႇၼၼ်ႉလႄႈ ငိူင်ႉဝႄႈဝႆႉတီႈ ၼႂ်းသူၼ်တီႈၼိူင်ႈယဝ်ႉ။ ၵဝ်ၶႃႈသမ်ႉလႆႈႁၼ်ဝႆႉယူႇ လွင်ႈဢၼ်ဢူႈၶႃႈႁဝ်းငိူင်ႉဝႄႈဝႆႉယူႇၼၼ်ႉလႄႈ ၸင်ႇၸၼ်ဢဝ်မိုဝ်းၶႅၵ်ႇၵေႃႉၼၼ်ႉသေ ၵႂႃႇသူင်ႇၽႅဝ်ထိုင်တီႈဢွင်ႈ ဢၼ်မီးဢူႈႁဝ်းၼၼ်ႉယူႇယဝ်ႉ။ မိူဝ်ႈၼၼ်ႉ ၸူဝ်ႊသၢၵ်ႈၶႃႈတေမီးမွၵ်ႈႁႃႈၶူပ်ႇဢေႃႈ။ ဢၼ်ၵဝ်ၶႃႈၶႂ်ႈလၢတ်ႈၼႆႉတႄႉ ၸူဝ်ႊပၢၼ်မိူဝ်ႈဝၼ်းလုၵ်ႈဢွၼ်ႇၶဝ်ၼႆႉ မၼ်းဢမ်ႇမီးတၢင်းၼုၵ်းၵူဝ်ႈဢိူၵ်ႇၸပ်းဢီႈသင်သႄႈ။ ဢမ်ႇမီးလွင်ႈသုမ်ႇႁူမ်ႇ သိူင်ႇလပ်ႉဢီႈသင် တိုၼ်းဝႃႈသိုဝ်ႈယူဝ်းၽိူၵ်ႇၸိုၼ်ႈၶၢဝ်သႂ်ဝႆႉဢိူဝ်ႈၼႆၼၼ်ႉ ၵွၺ်းယဝ်ႉ။

တီတေႉမၼ်းၼႆၵေႃႈ ၼင်ႇဢၼ်တၢင်းၵုၼ်းမုၼ်လမ်ႉၵတ်ႉၼမ်ႉၼႆႉ ပဵၼ်လွင်ႈသႂ်ၸၢင်ႇ ၵတ်းယဵၼ်လီ ၼၼ်ႉယဝ်ႉ၊ လွင်ႈသိုဝ်ႈယူဝ်းၶၢဝ်ၸၢင်ႇတီႈလုၵ်ႈဢွၼ်ႇၶဝ်ၼႆၵေႃႈ ပဵၼ်လမ်ႉၵတ်ႉ ၵုၼ်းမုၼ်ၶဝ်ယဝ်ႉ။ ၼင်ႇၼႆယဝ်ႉ လွင်ႈဢၼ်ဢမ်ႇမေႃႁဵတ်းၵႅင်ႈသေယူႇၼၼ်ႉလႂ်၊ ဢၼ်ဢမ်ႇမီးလွင်ႈ ၵူတ်ႉငေႃးၶွၵ်းလွၵ်းၼၼ်ႉလႂ်၊ လွင်ႈဢမ်ႇမေႃမၢႆၸႂ် ဝႆႉၶူတ်းၼႂ်းသႆႈၼၼ်ႉလႂ် ၸိူဝ်းၼႆႉၼႆႉ ပဵၼ်ၶေႃႈမၢႆ ဢၼ်ဢမ်ႇမိူၼ်ၵၼ်တင်းၵူၼ်းလူင်ၶဝ်သေ၊ ပဵၼ်လွင်ႈတၢင်းလီႁၵ်ႉ လူင် တီႈလုၵ်ႈဢွၼ်ႇၶဝ်ၼၼ်ႉၵွၺ်းယဝ်ႉဢိူဝ်ႈ။ ပိူင်ၼၵ်ႉလူင်မၼ်းတႄႉ၊ ဢၼ်ဢမ်ႇၵူတ်ႉ၊ ဢၼ်ဢမ်ႇၶွၵ်းလွတ်း မိူၵ်ႈလိူင်း၊ ဢမ်ႇမေႃပႅတ်ႉမေႃလႅၼ်၊ ဢမ်ႇလိင်ႉလွင်ႈပၢႆႇတၢင်းၸိူဝ်းၼႆႉၼႆႉ ၵႅၼ်ႇလၵ်းတိုၼ်းပဵၼ်ၶူဝ်းတွၼ်ႈလီလူင် ဢၼ်ၶႅမ်ႉထီႈသုတ်း ဢၼ်လူၵ်ႈၶူင်းလူင်ပၼ်ဝႆႉ တီႈလုၵ်ႈဢွၼ်ႇၶဝ်၊ တႃႇလုၵ်ႈဢွၼ်ႇၶဝ်ၼၼ်ႉယဝ်ႉ။

ၶႂ်ႈပဵၼ်ၸိူင်ႉႁိုဝ်ၵေႃႈလီ ပေႃးသေၵေႃႉသေၵူၼ်းမႃးဝႃႈ ႁႂ်ႈလၢတ်ႈၼေပၼ်လွင်ႈဢၼ် လီမူၼ်ႊသိူဝ်းသေပိူၼ်ႈ ၼႂ်းၸူဝ်ႊၶၢဝ်းၸၢတ်ႈပၢၼ်မႂ်းပေႃးၼႆတႄႉ ၵဝ်ၶႃႈတႄႉတေလၢတ်ႈၼေ လွင်ႈမိူဝ်ႈဝၼ်းဢၼ်လႆႈဢၢၼ်ႇၼပ်ႉမႃး လၢဝ် ၶဝ်ၼၼ်ႉၵွၺ်း ဢမ်ႇႁၢင်ႉယဝ်ႉ။ ၵူၺ်းတေလၢတ်ႈၼေၶိုၼ်း ဝၼ်းႁႃတူၺ်း - လွင်ႈပူႇထဝ်ႈၵေႃႇၼိူင်ႈ တင်းပၢင်တၢႆး ဢွၼ်ႇတူဝ်ၼိူင်ႈ မီးဝႆႉတီႈၼႂ်းလုၵ်ႈလိူၼ်ၼၼ်ႉၸိူဝ်ႉႁိုဝ်ၼႆ ၼၼ်ႉၵွၺ်းယူႇယဝ်ႉ။ ၼင်ႇၼႆယဝ်ႉ တေဝူၼ်ႉၶႆႈတူၺ်း တေႃႇမိူဝ်ႈဝၼ်းၸိူဝ်းဢၼ်ပူၼ်ႉမႃး ဢၼ်လႆႈပဵၼ်လုၵ်ႈဢွၼ်ႇဢၼ်သိုဝ်ႈယူဝ်းၶၢဝ်သႂ် ဢၼ်ဢမ်ႇမီးတၢင်းၽိတ်း ဢၼ် လဵၼ်ႈမူၼ်ႊမႃးတႂ်ႈငဝ်းလႅင်းလိူၼ် ၼၼ်ႉယူႇ။ ငဝ်းႁၢင်ႊၸူဝ်ႊပၢၼ်လုၵ်ႈဢွၼ်ႇ ၼႆႉၵွၺ်းယဝ်ႉ လႆႈပဵၼ်ဝႆႉလွင်ႈတၢင်း ဢၼ်လႆႈၶိုၼ်းၶုၵ်းထူပ်း ဢဝ်ၶႆႊၼေၵၼ် ၼၼ်ႉယူႇ ဢမ်ႇႁၢင်ႉယဝ်ႉ။

လုင်းၸၢႆးၾႃႈ (ၵဵပ်းႁွမ်တႅမ်ႈ)
(13: 45) 09.2019 ၽ.ၽ.ပၢင်ႇလေႃႉ- (ဝ.ႁ-2) လူင်။

← လိုၼ်း · လမ်းၼႂ်း · ထႅင်ႈ →