လိၵ်ႈပိုတ်ႇပၼ်ပိုၼ်ႉႁူႉ မၢႆသီႇ/လမ်ႇလွင်ႈ သွၼ်ႁဵၼ်းၸဵမ်မိူဝ်ႈဢွၼ်ႇ

မိူဝ်ႈဢၼ်ဢွၼ်ၵၼ် ႁဵတ်းသၢင်ႈတႃႇႁႂ်ႈၸိုင်ႈမိူင်းလႄႈ ၸိူဝ်ႉၶိူဝ်းလႆႈႁုၼ်ႈမုၼ်းၶိုၼ်ႈယႂ်ႇလႄႈ သၢင်ႈပွင်ႈတႃႇ လွင်ႈယွၼ်ႇယွမ်းပႅတ်ႈလႆႈ လွင်ႈၵွတ်းၽၢၼ်ၸိူဝ်းၼၼ်ႉၼၼ်ႉ ဢွၼ်ၵၼ်ၸႂ်ႉတိုဝ်း ပၢႆးၸၢင်ႊပၢႆးသႅၼ်ႉၶိုတ်းၵၢပ်ႈ ပၢၼ်ၶဝ်၊ လွင်ႈၾင်တိုၼ်းလၢင်းသႂ်ႇလူင်းထုၼ်းၶဝ်လႂ်၊ ပၵ်းပိူင်လၵ်းၼမ်း ဢၼ်ယုမ်ႇႁၼ်ႁပ်ႉဢဝ်ၶဝ်ၸိူဝ်းၼႆႉလႂ် ပႃးဝႆႉယူႇ။ ဢၼ်ၼွၵ်ႈသေၸိူဝ်းၼႆႉတႄႉ မီးထႅင်ႈတၢင်းလမ်ႇလွင်ႈလူင် ဢၼ်ၸိူဝ်းၵပ်းၵၢႆႇဝႆႉ ၾၢႆႇပွတ်းတွၼ်ႊပၢႆးၸႂ် ၵူၼ်းႁဝ်းၼၼ်ႉဢိူဝ်ႈ။ ၸိူဝ်းၼႆႉၸမ်း ပဵၼ်ထၢတ်ႈၸႂ် ဢၼ်ၸၢင်ႊမေႃတူၺ်း တႃႇပုၼ်ႈၵူၼ်းတင်းလၢႆၼၼ်ႉလႂ်၊ ထၢတ်ႈၸႂ် ဢၼ်ၸၢင်ႊဝႆႉႁႂ်ႈသူၼ်ႇလဵဝ်ႇလႄႈ သူၼ်ႇၵူၼ်းၼမ် ၽဵင်ႇၽဵင်ႈၵၼ်လႆႈလီၼၼ်ႉယဝ်ႉ။ ၸႂ်ၸိူဝ်းၼင်ႇၼႆၼႆႉ တိူဝ်းလမ်ႇလွင်ႈဢိူဝ်ႈ ၼႆဝႃႈ။ ၵူၼ်းမိူင်းၸိုင်ႈၵူဝ်းရီးယႂ်းၸၢၼ်းၵေႃႉၼိူင်ႈ ဢၼ်မႃးႁဵတ်းၵၢၼ်ပၢႆးမၢၵ်ႈမီးမၼ်းယူႇတီႈ မိူင်းမၢၼ်ႊၼႆႉၼႆႉ လၢတ်ႈဝႃႈ- “မိူင်းႁဝ်းၶႃႈၼႆႉ မိူဝ်ႈၼၼ်ႉၼႆ မိူၼ်ၵၼ်တင်းမိူင်းမၢၼ်ႊၸင်ႇၼႆႉၼႆႉလီလီယဝ်ႉ။ ၵူၺ်းၵႃႊတီႈၼႂ်းၸႂ် လုၵ်ႈဢွၼ်ႇၶဝ်ၼၼ်ႉ ႁဝ်းၶႃႈၶဝ်သွၼ်ပၼ်ဝႆႉ ႁႂ်ႈၶဝ်မီးဝႆႉၸႂ်ႁၵ်ႉၶိူဝ်းႁၵ်ႉမိူင်းဝႆႉဢိူဝ်ႈ။ ဝၢႆးၼႆႉမႃးတႄႉ ၸိုင်ႈမိူင်းႁဝ်း ၶႃႈၵေႃႈ ၸင်ႇၶိုၼ်ႈယႂ်ႇမႂ်ႇသုင်မႃးၼႆ လႆႈႁၼ်ၼင်ႇၼႆယဝ်ႉ ၼႆဢိူဝ်ႈ။ ၼႂ်းဝၼ်းၸင်ႇၼႆႉ ယႅၼ်ႉယႅၼ်ႉၼႆႉတႄႉ တီႈၼႂ်းၸႂ်မူႇၵူၼ်းႁဝ်းတင်းၼမ်လၢႆလူင်ၶဝ်ၼႆႉ ပိူင်လူင်မၼ်း ၵွၺ်းတူၺ်းတႃႇ တူဝ်ၸဝ်ႈၵဝ်ႇ တေႃႇလွင်ႈဢၼ်လႂ်ၼႆႉ တေလီၼႆ ဝႆႉယူႇ သေယဝ်ႉ၊ တႃႇၸုမ်းၸိူဝ်းၵူၼ်း မုင်ႉႁေႃႁိူၼ်း ၶဝ်လႂ်၊ တႃႇပွၵ်ႉတႃႇၽၢႆႇ၊တႃႇဝၢၼ်ႈတႃႇသူၼ်၊တႃႇဢိူင်ႇ တႃႇဝဵင်း၊ တႃႇၸိုင်ႈတႃႇမိူင်းဢၼ်ဝႃႈၼၼ်ႉ လႆႈႁၼ်မႅၼ်ႈဝႃႈ ၵေႃႉၵူၼ်းတူၺ်းထိုင်မၼ်း ဢေႇမႃးယူႇတိၵ်းတိၵ်းဝႆႉၼၼ်ႉယဝ်ႉ။ တေႃႇတီႈႁူင်းငဝ်းတူင်ႉၶဝ်ၼႆ ပေႃးဝႃႈၼႄမႃး ၸွမ်ပိဝ်ၸိုင်ႈမိူင်းတင်းၽဵင်းၵႂၢမ်းၸိူဝ်ႉၸၢတ်ႈၼႆၵေႃႈ ႁၼ်ယူႇသေတႃႉၵေႃႈ ဢမ်ႇလုၵ်ႉၸုၵ်းပၼ် တၢင်းႁူႉ ၼပ်ႉထိုဝ် သင်ယဝ်ႉသႄႈ။ တေႃႇၽူႈၵေႃႉမၢင်ႊၸိူဝ်း ဢၼ်ဢဝ်တၢင်းႁူႉတူဝ်ၵဝ်ႇသေ လုၵ်ႉၸုၵ်းယူႇ တူဝ်လႅပ်ႈဝႆႉၼၼ်ႉၵေႃႈ ဢၼ် ဢၼ်ၸိူဝ်းၵူၼ်းဢမ်ႇလုၵ်ႉၸုၵ်းၶဝ်သမ်ႉ ပၢႆဢဝ်လၢႆးယၵ်ႉတူၺ်းတင်းၶႂ်ႈႁီႉယွၺ်ႊ ဢဵၼ်ႈဢွၼ်ႇသေၵေႃႈ မီးမႃးၵၼ် ဝႆႉယဝ်ႉ။ ၼၢင်းယိင်းၵူၼ်းထႆးၵေႃႉၼိူင်ႈ ဢၼ်လုၵ်ႉတၢင်းၸိုင်ႈမိူင်းထႆးၶဝ်သေ မႃးၽႅဝ်ဢႅဝ်ႇလႄႇမိူင်းမၢၼ်ႊဝႆႉယူႇ ၼၼ်ႉသမ်ႉဝႃႈ- “ပေႃးပဵၼ်တီႈၸိုင်ႈမိူင်းၶႃႈၼၢင်းၶဝ်ၼႆ ႁူႉဝႃႈ လႆႈငိၼ်းမႅၼ်ႈ သဵင်ၽဵင်းၵႂၢမ်းၸိူဝ်ႉၸၢတ်ႈၼႆၵေႃႈ ၵူႊ ၵေႃႉ တင်းသဵင်ႈသဵင်ႈၼႆႉ ဢွၼ်ၵၼ်ၽုတ်းလုၵ်ႉတႅတ်ႈသေယဝ်ႉ ဝႆႉပဵၼ်တၢင်းၼၵ်းၼႃၵၼ် ၶႃႈဢိူဝ်ႈ”ၼႆယူႇယဝ်ႉ။ တေႃႇမိူဝ်ႈႁဝ်းတိုၵ်ႉၵေႃႉလဵၵ်ႉၼၼ်ႉၵေႃႈ ယင်းယၢမ်ႈလႆႈႁဵတ်းမႃး ၽဵင်းၵႂၢမ်းဢွၼ်ႇဢၼ်ဝႃႈ - တေၶတ်းၸႂ် ယူႇသၢင်ႈႁႂ်ႈတူဝ်ၸဝ်ႈၵဝ်ႇလႆႈလီဢိူဝ်ႈ။ တေၶတ်းၸႂ်တႃႇႁႂ်ႈႁွင်ႈႁဵၼ်းတူဝ်ၵဝ်ႇ လႆႈလီဢိူဝ်ႈ။ တေၶတ်းၸႂ်တႃႇ ႁႂ်ႈႁူင်း ႁဵၼ်းတူဝ်ၵဝ်ႇ လႆႈလီဢိူဝ်ႈၼၼ်ႉ မႃးယူႇဢိူဝ်ႈ။ မေႃသွၼ်လူင် တီႈႁူင်းႁဵၼ်းၸၼ်ႉၸွမ်ပၢႆးပၺ်ႇၺႃႇ ႁဝ်းၶႃႈၶဝ် ၼႆၵေႃႈ ယင်းသင်ႇပၢႆးၵႂၢမ်းဢွၼ်လီဝႆႉဝႃႈ - မေႃသွၼ်ၸၢႆးယိင်းႁဝ်းၶဝ်ၼႆႉ ထုၵ်ႇလီလႆႈလၢတ်ႈၵႂၢမ်းတေႃႇ လုၵ်ႈႁဵၼ်းဢွၼ်ႇႁဝ်းၶဝ်ပၼ် ၼမ်ၼမ်ဢိူဝ်ႈ။ တေလႆႈ ဢဝ်လၢႆးၵႂၢမ်း ဢၼ်ႁႂ်ႈမီးထၢတ်ႈၸႂ်ႁၵ်ႉၶိူဝ်းႁၵ်ႉမိူင်းၶဝ်၊ မိူၼ်ၼင်ႇ ပၼ်တူဝ်ယၢင်ႇၽူႈႁတ်းငၢၼ်ၶဝ်သေ လၢတ်ႈႁႂ်ႈ လႆႈမီးမႃး ၸႂ်ႁၵ်ႉဝၢၼ်ႈသူၼ်၊ ၸႂ်ၶႂ်ႈၵႅတ်ႇၶႄပႂ်ႉပႃး၊ ၸႂ်ၶႂ်ႈသၢင်ႈပွင်ပၼ်ပဵၼ် လွင်ႈလီ ၸိူဝ်းၼႆႉဢိူဝ်ႈ။ တေလႆႈၵႆႉၵႆႉ လၢတ်ႈပၼ်၊ ဝႃႈၼေပၼ် ၼမ်ၼမ်ဢိူဝ်ႈ ၼႆယဝ်ႉ။

မေႃသွၼ်လူင်ႁဝ်းတီႈၸၼ်ႉၸွမ် ပၢႆးမၢၵ်ႈမုၼ်းၼႆၵေႃႈ ယၢမ်ႈသပ်းလႅင်းၼေဝႃႈ-“ပေႃးဝႃႈ တႃႇပုၼ်ႈလွင်ႈၶိုၼ်ႈ ယႂ်ႇ မုၼ်းႁိူင်းၸိုင်ႈမိူင်းၼႆၼၼ်ႉ မၼ်းဢမ်ႇၸႂ်ႈၵွၺ်းပႃး လွင်ႈပၢႆးပၺ်ႇၺႃႇ ၾၢႆႇပၢႆးၸၢင်ႊၶဝ်သႄႈ ၊ မၼ်းတေလႆႈပႃး ပၼ်လွင်ႈၾၢႆႇပၢႆးၸႂ် ၸိူဝ်းၵူၼ်းႁဝ်းၶဝ်ၼႆႉ လၢႆးဝႆႉဝၢၼ်းၸႂ်ၶဝ်ၼႆႉ ႁႂ်ႈလီ ၼႆတေလႆႈပႃးၵွၼ်ႇဢိူဝ်ႈ။ ၼင်ႇၼႆ ပၢႆးႁူႉမေႃ ပၺ်ႇၺႃႇ ၾၢႆႇလမ်ႉလီ ၼႆၵေႃႈ တေလႆႈလီ လႆႈသုင်ဢိူဝ်ႈ။ တီႈလိုမ်မိူင်းဢၾ်ႈၾရီၵႂ်းၼႆ ဢွၵ်ႇသႅင်ၸိင်ႇဢိူဝ်ႈ။ ၵူၺ်းၵႃႊ ယွၼ်ႉၵွပ်ႈၾၢႆႇပၢႆးပၺ်ႇၺႃႇၶဝ်လႄႈ ၾၢႆႇပၢႆးတူၼ်ႈၸႂ်ၶဝ်ၸိူဝ်းၼႆႉ သမ်ႉဢမ်ႇၶိုၼ်ႈယႂ်ႇလႄႈ လိုမ်လူင် ဢၾ်ႈၾရီးၵႂ်း ၼႆၵေႃႈ ဢမ်ႇၶိုၼ်ႈယႂ်ႇသႄႈ။ မိူဝ်ႈဢၼ်ႁဵတ်းသၢင်ႈ လွင်ႈမူၼ်ႉမႄးလႅၵ်ႈလၢႆႊ တႃႇႁႂ်ႈဝၢၼ်ႈမိူင်း ၶိုၼ်ႈယႂ်ႇၼၼ်ႉၼႆ ဢၼ်လမ်ႇလွင်ႈသေပိူၼ်ႈတႄႉ ပဵၼ်လွင်ႈလၢႆးဝႆႉဝၢၼ်းၸႂ် တီႈတွၼ်ႊၵူၼ်းႁဝ်းၶဝ်ၼႆႉ တေလႆႈ မၢၼ်ႇမႅၼ်ႈဝႆႉၼၼ်ႉ ထၢင်ႇပဵၼ်ဢၼ်ပိူင်ယႂ်ႇသေပိူၼ်ႈယဝ်ႉ “ ဝႃႈၼႆဢိူဝ်ႈ။ တီႈဢၼ်ႁဵတ်းသၢင်ႈ ၵၢၼ်ငၢၼ်းၾၢႆႇပၢႆးမၢၵ်ႈမုၼ်းၼၼ်ႉၼႆ တေတူၺ်းတေႃႇသုၼ်ႇလႆႈ တိုဝ်ႉတၢင်းတႃႇပုၼ်ႈ တူဝ်ၸဝ်ႈၵဝ်ၼၼ်ႉဝႆႉ ပဵၼ်ပိူင်လူင်သေယဝ်ႉ တူၺ်းတႃႇတေလႆႈဢွင်ႈတီႈသေဢၼ် ၊ တႃႇလႆႈသုၼ်ႇသေၸိူဝ်ႉဝႆႉယူႇ ၸိူဝ်းၼၼ်ႉၵေႃႈ မီးဢိူဝ်ႈ မီးၼမ်ဢိူဝ်ႈၼႆ လႆႈႁူႉဝႆႉယူႇ ၼင်ၼႆယဝ်ႉ။ ၸဝ်ႈၵၢၼ်လူင်ၾၢႆႇၵၢၼ်ငၢၼ်းၵေႃႇသၢင်ႈၵေႃႉၼိူင်ႈၵေႃႈဝႃႈ - “ မၢင်ႊၸိူဝ်းၶဝ်ၼႆႉ ၵူၺ်းမေႃတူၺ်းတႃႇပုၼ်ႈ သူၼ်ႇတူဝ်ၶဝ်ၵွၺ်းဢိူဝ်ႈ၊ ပဵၼ်ၸႂ်ဢၼ်ၶႂ်ႈလႆႈ သုၼ်ႇလိူဝ်၊ သုၼ်ႇၼၵ်ႉၼၼ်ႉၼႃႇ။ လွင်ႈဝႃႈ မီးဝႆႉၼင်ႇၼႆ ၼႆၵေႃႈ ၵႆႉၵႆႉ လႆႈႁၼ်ၵၼ်ဝႆႉယူႇဢိူဝ်ႈ။ ဢၼ်ၵဝ်ၶႃႈထၢင်ႇႁၼ်ၼၼ်ႉတႄႉ တီႈဢၼ်တေႁဵတ်းႁႂ်ႈဝၢၼ်ႈမိူင်းလႆႈၶိုၼ်ႈယႂ်ႇ ၼၼ်ႉၼႆ တေလႆႈပူၵ်းပွင်ပၼ် ထၢတ်ႈၸႂ်ႁၵ်ႉၶိူဝ်းႁၵ်ႉမိူင်းသေယဝ်ႉ၊ ၾၢႆႇၽိင်ႈယၢမ်ႈတိုဝ်းၵမ်ႊလႄႈသင်၊ ၾၢႆႇဢၼ်ၸၢင်ႊမေႃ တူၺ်းပၼ်တႃႇၵူၼ်းတင်းလၢႆၶဝ်ၼၼ်ႉလႄႈသင်၊ တေလႆႈႁဵတ်းပၼ် ႁႂ်ႈပေႃးမီးမႃးလႆႈၸႂ် ၸိူင်ႉၼႆ ၶဝ်ၵေႃႈ လမ်ႇလွင်ႈ တေႉဢိူဝ်ႈၼႆ ထၢင်ႇႁၼ်ၼင်ႇၼႆယဝ်ႉ” ၼႆသေၵေႃႈ လၢတ်ႈၵႂႃႇယူႇ။

• ပေႃးမေႃတူၺ်းတေႃႇ ၽွၼ်းလီပုၼ်ႈၵူၼ်းတင်းလၢႆမႃးယဝ်ႉၼႆတႄႉ -

ထၢတ်ႈၸႂ်တႃႇႁႂ်ႈမေႃတူၺ်းပၼ် ၽွၼ်းလီပုၼ်ႈၵူၼ်းတင်းၼမ် ႁႂ်ႈလိူဝ်သေထၢတ်ႈၸႂ်ဢၼ် တူၺ်းပုၼ်ႈသုၼ်ႇ တူဝ်ၼၼ်ႉၼႆ ၊တေလႆႈႁဵတ်းပၼ်ႁႂ်ႈမေႃမီးမႃး ထၢတ်ႈၸႂ် ဢၼ်ၸၢင်ႊၸွမ်းႁဵတ်းလႆႈ၊ မေႃႁူမ်ႈႁွမ်းတင်း ၵူၼ်းတင်း ၼမ်သေႁဵတ်းလႆႈၼၼ်ႉ ပၼ် ၸဵမ်မိူဝ်ႈၵေႃႉလဵၵ်ႉၵေႃႉဢွၼ်ႇ၊ ၸဵမ်မိူဝ်ႈၸူဝ်ႊပၢၼ်ၶဝ် ယင်းတိုၵ်ႉၵေႃႉဢွၼ်ႇၼၼ်ႉ တေလႆႈပူင်သွၼ်ပၼ်ဝႆႉယဝ်ႉဢိူဝ်ႈ ၼႆ လႆႈႁူႉဝႆႉ ၼင်ႇၼႆ ယဝ်ႉ။ မိူဝ်ႈဢၼ်သွၵ်ႇတႅၵ်ႈတေႃႇ လွင်ႈၶိုၼ်ႈယႂ်ႇဝၢၼ်ႈမိူင်းၼၼ်ႉၼႆ လႆႈတူၺ်းပႃးလွင်ႈဢၼ်ဝႃႈ - တၢင်းၵွတ်းၽၢၼ် ၼႆႉ တေလႆႈမီးထၢၼ်ႈလႂ်ၵွၺ်း ၼၼ်ႉသေ လႆႈတမ်းမၢႆဝႆႉပၼ်ၶေႃႈမၵ်းမၢႆမၼ်းယဝ်ႉ။ ပေႃးဝႃႈ ၸိူဝ်းၵူၼ်းယွပ်းဢွၼ်ႇ ၼိူင်ႈၶဝ်ၵွၺ်း မၢၵ်ႈမီးဝႆႉ ၼႆတႄႉ ၽႂ်ၵေႃႈတေဢမ်ႇဝႃႈ ၸိုင်ႈမိူင်းၼၼ်ႉ ၶိုၼ်ႈယႂ်ႇမုၼ်းႁိူင်းဝႆႉ၊ ပဵၼ်ၵေႃႈ ဢမ်ႇပဵၼ်လႆႈ “ ၼႆ လၢတ်ႈၼေ ၼင်ႇၼႆယူႇယဝ်ႉ။

• ၸဵမ်မိူဝ်ႈၵေႃႉလဵၵ်ႉၵေႃႉဢွၼ်ႇၼၼ်ႉ တေလႆႈသွၼ်ပၼ်ဝႆႉ ႁႂ်ႈတႅတ်ႈတေႃးဢိူဝ်ႈ-

ၸဵမ်မိူဝ်ႈၸူဝ်ႊပၢၼ်ပဵၼ် လုၵ်ႈဢွၼ်လဵၵ်ႉၼၼ်ႉ ၼင်ႇႁိုဝ်ပေႃးတေၶဝ်ႈဝႆႉ မီးဝႆႉလႆႈထၢတ်ႈၸႂ် ဢၼ်ပဵၼ်တႃႇ ၽွၼ်းလီပုၼ်ႈၵူၼ်းတင်းလၢႆၼၼ်ႉ ၼႆၵေႃႈ တၵ်းတေလႆႈႁဵတ်းမႃးၵွၼ်ႇယဝ်ႉၼႆ လႆႈႁူႉဝႆႉ ၼင်ႇၼႆ။ ၼင်ႇမိူဝ်ႈႁွင်ႉၽဵင်းၵႂၢမ်း ၸိူဝ်ႉၸၢတ်ႈၼၼ်ႉၼႆၵေႃႈ တေလႆႈဝႆႉၸႂ် ၼၵ်ႉၸႂ်ဝႆႉဝႃႈ - ယူႇတီႈၼိူဝ်လိၼ်မိူင်းၼႆႉ ဢိူဝ်ႈ၊ တေလႆႈႁၵ်ႉမိူင်းၼႆႉ မီးၸႂ်မၼ်ႈမႅၼ်ႈသၸ်ႈၸႃႇတေႃႇၼိူဝ်မိူင်းၼႆႉဢိူဝ်ႈ။ တေလႆႈဢဝ်ၸႂ်ၼင်ႇၼႆသေ ႁွင်ႉဢိူဝ်ႈ။ ၼင်ႇႁိုဝ်ပေႃးတေၶဝ်ႈလႆႈၸႂ်ၸိူဝ်ႉၼႆ ဝႆႉၵေႃႈ တေလႆႈပူင်သွၼ်ပၼ်မႃး ၸဵမ်မိူဝ်ႈၵေႃႉလဵၵ်ႉလဵၵ်ႉၼၼ်ႉယဝ်ႉဢိူဝ်ႈ ၼႆဝႃႈ။ မေႃသွၼ်လူင်တီႈၸၼ်ႉၸွမ် ၾၢႆႇပၢႆးလႅင်ႊၸႂ်၊ဢၼ်ပဵၼ်တူၼ်ၵႂၢၼ်းႁွင်ႈၵၢၼ် ၾၢႆႇပၢႆးၵႂၢၼ်းၶူးၼၼ်ႉၵေႃႈ လၢတ်ႈဝႃႈ- “ၽူႈၵေႃႉဢၼ်ႁဵတ်းသၢင်ႈတႃႇဝၢၼ်ႈ တႃႇဝဵင်းတူဝ်ၵဝ်ႇ၊ဢၼ်ၸိူဝ်းဢမ်ႇတူၺ်းထိုင် သူၼ်ႇတူဝ်ၵေႃႉလဵဝ် တူဝ်ၵဝ်ႇၵွၺ်းၼႆႉ ဢမ်ႇမီးယဝ်ႉႁႃႉ ပေႃးဝႃႈၼႆတႄႉ မီးယူႇလေႃႇ။ ပေႃးပဵၼ်ၵူၼ်းမဵဝ်းၸိူဝ်ႉၼႆၶဝ်တႄႉ မီးတေႃႇမၢၵ်ႈမီး ၼင်ႇၵၼ် ပေႃးၾၢႆႇၵုၼ်းမုၼ် ၵုင်ႇသၢင်ႈသဝ်းမႃးတႄႉ ၸိူဝ်းၶဝ်ၼႆႉ သုင်ဝႆႉၼႆ ဝႃႈလႆႈယဝ်ႉ။ ထၢတ်ႈၸႂ်ၽူႈၵေႃႉၵူၼ်း ဢၼ်ၸိူဝ်းမေႃတူၺ်းထိုင်ပၼ် ၽွၼ်းလီပုၼ်ႈပၢင်ႈတႃႇၵူၼ်းတင်းၼမ် တင်းလၢႆ ၼၼ်ႉၼႆ ပေႃးတီႈထၢၼ်ႈသင်ႉၸႂ် ဢၼ်ပဵၼ်လွင်ႈယူင်းသူၼ်းၼၼ်ႉၼႆ ၶဝ်မီးတီႈ ၽႅဝ်တီႈ ၸၼ်ႉထၢၼ်ႈဢၼ်သုင် ဝႆႉၼၼ်ႉသေယဝ်ႉ၊ ပေႃးဢဝ်ၾၢႆႇလမ်ႉလီ တီႈထၢတ်ႈၸႂ်ၾၢႆႇသၢႆသၢင်ႈ ၼႆၵေႃႈ ၶဝ်ၼႆႉ ၸၢင်ႊမေႃဝူၼ်ႉသွၼ်ႇတေႃႇ တူၺ်းထိုင်ပၼ်ပိူၼ်ႈဢိူဝ်ႈ။ ပဵၼ်ၵေႃႉမေႃပွင်ၸႂ်တေႃႇပိူၼ်ႈ သေယဝ်ႉ၊ သမ်ႉပဵၼ်ၵေႃႉၵူၼ်း ဢၼ်ၸၢင်ႊမေႃႁူမ်ႈႁွမ်း ၸွမ်းတင်းပိူၼ်ႈသေ ႁဵတ်းသၢင်ႈလႆႈၼၼ်ႉဢိူဝ်ႈ။ ဝႃႈၼင်ႇၼႆယဝ်ႉ။ တႃႇႁႂ်ႈပဵၼ်လႆႈထၢတ်ႈၸႂ် မဵဝ်းဢၼ်ၸၢင်ႊမေႃတူၺ်းတေႃႇၽွၼ်းလီ ပုၼ်ႈပၢင်ႈၵူၼ်းတင်းလၢႆ ၼႆၼၼ်ႉ တၵ်း တေလႆႈမီး လွင်ႈပူင်သွၼ်ပၼ် ၽိုၵ်းယၢမ်ႈပၼ်မႃး ၸဵမ်မိူဝ်ႈၵေႃႉလဵၵ်ႉ ၸဵမ်မိူဝ်ႈတီႈႁူင်းႁဵၼ်းၸၼ်ႉငဝ်ႈ ၼၼ်ႉၵွၼ်ႇ ဢိူဝ်ႈၼႆ ဝႃႈၼင်ႇၼႆ။

• လုၵ်ႈဢွၼ်ႇၶဝ်ၼႆႉ လမ်ႇလွင်ႈဢိူဝ်ႈ

ထၢတ်ႈၸႂ်လုၵ်ႈဢွၼ်ႇၵူၼ်းၼုမ်ႇ ဢၼ်ဝၼ်းၼိူင်ႈမႃးတေလႆႈ ပဵၼ်မႃးၽူႈဢွၼ်ႁူဝ်ဝၢၼ်ႈမိူင်းၶဝ်ၼၼ်ႉ ၼင်ႇ ႁိုဝ်ၶဝ် ပေႃးတေၸၢင်ႊမေႃတူၺ်းပၼ် ၽွၼ်းလီပုၼ်ႈၵူၼ်းတင်းၼမ်လႆႈၼၼ်ႉ တေလႆႈတႄႇသွၼ်ပၼ် လီလီငၢမ်း ငၢမ်း တင်ႈဢဝ်ၸဵမ်မိူဝ်ႈၸၼ်ႉငဝ်ႈ တေႃႇႁႂ်ႈပေႃးထိုင်ၽႅဝ်တီႈ ၸၼ်ႉသုင်ၼၼ်ႉ ၵွၼ်ႇဢိူဝ်ႈၼႆ လႆႈႁူႉဝႆႉ ၼင်ႇၼႆ။ တေလႆႈႁဵတ်းပၼ် တႃႇႁႂ်ႈထၢတ်ႈၸႂ်ၵူၼ်းဢွၼ်ႇၶဝ် ပေႃးၸၢင်ႊမေႃတူၺ်းတေႃႇ ၽွၼ်းပၢင်ႈလီ ပုၼ်ႈၵူၼ်းၼမ် မႃးၼၼ်ႉယူႇဢိူဝ်ႈ။ လွင်ႈတၢင်းၵၢၼ်ႁူင်းႁဵၼ်းၶဝ်ၼႆၵေႃႈ တေလႆႈၶဝ်ႈၸႂ်ပႃးၸႂ်သေယဝ်ႉ တေႃႇလွင်ႈတၢင်းၵၢၼ်မူႇ ၵၢၼ်ၸုမ်း ဢၼ်တေလႆႈႁဵတ်းသၢင်ႈၸွမ်း ၵူၼ်းတင်းၼမ်ၸိူဝ်းၼၼ်ႉၼႆၵေႃႈ ႁႂ်ႈၸၢင်ႊလႆႈလဵင်ႉလူႁဵတ်းသၢင်ႈ ၸွမ်း ၵၼ်လႆႈသေ ၼၼ်ႉၵေႃႈ တေလႆႈလဵင်ႉလူၽိုၵ်းယၢမ်ႈပၼ်ယူႇယဝ်ႉ။ မိူဝ်ႈလႂ် ပေႃးၵေႃႉယႂ်ႇမႃးသေ သမ်ႉဢမ်ႇသၢင်းၵိၼ် ဢမ်ႇၼပ်ႉထိုဝ်တေႃႇ မေႃသွၼ်ၶဝ် ၼႆၵေႃႈ ယႃႇႁႂ်ႈလႆႈပဵၼ်၊ ယႃႇႁႂ်ႈလႆႈမီးၼၼ်ႉ ၼႆၵေႃႈ ၊တေလႆႈႁဵတ်းသၢင်ႈဝႆႉပၼ် ႁႂ်ႈ ပဵၼ်ဝႆႉ သိုင်ဝႅတ်ႉလွမ်ႉ ဢၼ်လီၶဝ်လႂ်ဝႆႉယူႇဢိူဝ်ႈ။ ၼႆဝႃႈ။ ပေႃးဝႃႈ တႃႇႁႂ်ႈ ဝၢၼ်ႈမိူင်းၶိုၼ်ႈယႂ်ႇၼႆၼၼ်ႉ - လၢႆးဝႆႉဝၢၼ်းၸႂ် ၸိူဝ်းတီႈၵူၼ်းႁဝ်းၶဝ်ၼႆႉ တေလႆႈၸိုဝ်ႈၸႂ်ႈ မၢၼ်ႇမႅၼ်ႈဝႆႉၵွၼ်ႇဢိူဝ်ႈ။ တေလႆႈမီးၸႂ် ဢၼ်ၶႂ်ႈၶိုၼ်ႈယႂ်ႇၼၼ်ႉ ၵွၼ်ႇဢိူဝ်ႈ။ ထၢတ်ႈၸႂ် ဢၼ်ၽႃႇဝၢင်းၶိုင်ႈလႆႈလီ ငၢမ်း၊ ၼင်ႇလွင်ႈတူၺ်းတႃႇ သူၼ်ႇတူဝ်ၵေႃႉလဵဝ်လႄႈ တႃႇပုၼ်ႈတင်းလၢႆၶဝ်ၼၼ်ႉ တေလႆႈႁႂ်ႈမီး လွင်ႈၽဵင်ႈၽဵင်ႈ လႆႈၵွၼ်ႇဢိူဝ်ႈ။ ပေႃးတၵ်းဝႃႈ ႁဵတ်းလႆႈ ႁႂ်ႈထၢတ်ႈၸႂ်ၽဵင်ႈၽဵင်ႈလီယဝ်ႉ ၼႆတႄႉ လွင်ႈဢၼ်ဝႃႈ တႃႇႁႂ်ႈဝၢၼ်ႈမိူင်း ၶိုၼ်ႈယႂ်ႇမုၼ်းႁိူင်း ဢၼ်ဝႃႈၼၼ်ႉလႂ်၊ တႃႇႁႂ်ႈလွင်ႈၵွတ်းၽၢၼ် တုၵ်ႉယၢၵ်ႈၸိူဝ်းၼႆႉၶဝ်လႂ် ႁႂ်ႈလႆႈယွၼ်ႇယွမ်းၵႂႃႇဢၼ် ဝႃႈၼၼ်ႉ သမ်ႉမီးတီႈ လွင်ႈသွၼ်ႁဵၼ်း ၸဵမ်မိူဝ်ႈဢွၼ်ႇၼႆႉ ပဵၼ်ဢၼ်လမ်ႇလွင်ႈလူင်ဝႆႉတေႉတေႉၼၼ်ႉယဝ်ႉၼႆ/ ႁၼ်ထိုင်ၼင်ႇၼႆၵွၺ်းယဝ်ႉ။

လုင်းၸၢႆးၾႃႈ ( ၵဵပ်းႁွမ်တွမ်ႊတႅမ်ႈ)
( ႑႖:႕႕) ၽတ်း။ ႐႕.႐႘.႒႐႒႑,(လႉတႉလ-တႉလႉၽ)(႑႐)။
လမ်ႇလွင်ႈလူင်ၼႆႉ တႆးသူလႆႈႁဵတ်းဝႆႉသင်ယဝ်ႉလႄႈ တႆးႁဝ်းလႆႈႁဵတ်း သင်ပၼ်ဝႆႉယဝ်ႉ?

← လိုၼ်း · လမ်းၼႂ်း · ထႅင်ႈ→