လိၵ်ႈပိုတ်ႇပၼ်ပိုၼ်ႉႁူႉ မၢႆသၢမ်/ထတ်းႁၼ်သေလူး

ပေႃးၽႅဝ်ၵႂႃႇထိုင်ႁိူၼ်းမေႃသွၼ်ၶဝ် မိူဝ်ႈလႂ်ၵေႃႈ ၵႆႉလႆႈႁူပ်ႉၺႃးမိူဝ်ႈမေႃသွၼ်လူလိၵ်ႈဝႆႉဢိူဝ်ႈ။ ၼႂ်းၸႂ်တႄႉဝႃႈ “မေႃသွၼ်ၼႆႉ လူလိၵ်ႈတေႉၼေႃ” ၼႆသေ တိုၵ်ႉပဵၼ်တၢင်းငႃၸၢမ်းမႃးယူႇၼၼ်ႉၵွၺ်း ပေႃးတၢၼ်ႇမေႃသွၼ်ၼႆႉ တဵမ်းႁူႉမႅၼ်ႈတၢင်းၶႆႈၸႂ်ၵဝ်ၵႂႃႇယဝ်ႉၼၼ်ႉႁိုဝ် ဢမ်ႇႁူႉ။ ပိူဝ်ႈၼၼ်သေ

“ဢၢႆႈဢိူၺ်း ယၢၼ်ၵႆၵၼ်တင်းလိၵ်ႈၼႆႉ ဢမ်ႇလႆႈသႄႈ။ တေႃႇႁႂ်ႈပေႃးၽႅဝ်ထိုင်လႆႈထၢၼ်ႈငမ်းယဵၼ်၊ တေႃႇ ထမ်းတြႃးလူၵ်ႈၶူင်း ပေႃးလႆႈမီးတၢင်းၽဵင်ႈၽဵင်ႈလီၼၼ်ႉ တၢမ်တူဝ်တူဝ်ၸဝ်ႈၵဝ်ႇၵေႃႈလီ၊ တေႃႇပိူၼ်ႈတၢင်ႇၵေႃႉ ၶဝ်လႄႈ ၸိူဝ်းႁိမ်းႁွမ်းၶဝ်ၼၼ်ႉၵေႃႈလီ၊ ပေႃးၶႂ်ႈႁဵတ်းသၢင်ႈပၼ်ယူႇ ပေႃးဝႃႈၼႆတႄႉ တေလႆႈမီးဝႆႉ တၢင်းႁူႉတဵမ် ထူၼ်ႈဝႆႉ ၵွၼ်ႇဢိူဝ်ႈ။ လုၵ်ႉတီႈဢၼ်မီးတၢင်းႁူႉၼၼ်ႉသေ ၸင်ႇၸၢင်ႊဢဝ်ၽိင်ႈတိုဝ်းၵမ်ႊ ဢၼ်ပဵၼ်လွင်ႈသိုဝ်ႈယူဝ်း (သိုဝ်ႈတူဝ်ႇ) ၼၼ်ႉသေ ႁဵတ်းၵၢၼ်လႆႈ၊ ႁဵတ်းပၼ်လႆႈၸင်ႇ ၵူၼ်းဢၼ်ဝႃႈၼႆႉ တေၸၢင်ႊယူႇလႆႈမိူၼ်ၼင်ႇ ၵူၼ်းသေယဝ်ႉ၊ တေၸၢင်ႊပိူင်ႇမီးလႆႈ ၸူဝ်ႊၸၢတ်ႈပၢၼ်ၵူၼ်း ဢၼ်ၸၢင်ႊတၢႆလႆႈ မိူၼ်ၼင်ႇၵူၼ်းၵေႃႉၼိူင်ႈလႆႈဢိူဝ်ႈ ဢၢႆႈႁိူၺ်း။ မႂ်းလူး ၸွင်ႇယၢမ်ႈဝူၼ်ႉမႅၼ်ႈ လွင်ႈၵူၼ်းယူႇႁိုဝ် ၼႆသေ ထၢမ်မႃးၵွၼ်ႇယဝ်ႉ။ ၵဝ်ၶႃႈၵေႃႈ -

“ဢိတ်းဢိတ်းဢွတ်းဢွတ်းတႄႉ ယၢမ်ႈဝူၼ်ႉယူႇဢေႃႈမေႃသွၼ်။ ၸူဝ်ႊပႆႇသိုပ်ႇလွင်ႈတၢင်း ဢၼ်လၢတ်ႈၼေ ပၼ်မႃးမိူဝ်ႈဝႃး လွင်ႈသုၼ်ႇယုမ်ႇယမ်ၵိူဝ်းထိုင်လႆႈ လွတ်ႈလွတ်ႈလႅဝ်းလႅဝ်းၼၼ်ႉ တႃႉၶႂ်ႈထွမ်ႇတူၺ်းလွင်ႈတၢင်း လွင်ႈၵူၼ်း ဢၼ်မေႃသွၼ်တေလၢတ်ႈၼႆႉ ၽွင်ႈၵွၼ်ႇ ယူႇဢေႃႈ” ဝႃႈၼႆၵႂႃႇလႄႈ-

“ပေႃးတေလႆႈလၢတ်ႈလွင်ႈၵူၼ်းၼႆၵေႃႈ တေလႆႈတႄႇတီႈလုၵ်ႈဢွၼ်ႇ၊ လုၵ်ႈဢွၼ်ႇၶဝ်ၼႆႉ ပိူၼ်ႈဢွၼ်ၵၼ်ႁွင်ႉ ဝႃႈ ဢေလႅင်ၼႆ ဢမ်ႇၸႂ်ႈႁိုဝ်ဢၢႆႈ”

“ၸႂ်ႈဢေႃႈ မေႃသွၼ်”

“ဢိူဝ်ႈ။ ၵိူတ်ႇမႃးတီႈၵူၼ်းသေယဝ်ႉ ပဵၼ်ဝႆႉပိူင်ႁၢင်ႊၵူၼ်းယူႇသေတႃႉ သမ်ႉပႆႇႁွင်ႉဝႃႈပဵၼ်ၵူၼ်းၵွၼ်ႇ။ ပႆႇ ၸၢင်ႊႁွင်ႉလႆႈဝႃႈပဵၼ်ၵူၼ်းၵွၼ်ႇၼၼ်ႉ ပဵၼ်ယွၼ်ႉၵွပ်ႈသင်လႃႇ ဢၼ်ၶႂ်ႈဝႃႈၼႆႉ ပွင်ႇဝႃႈပဵၼ် ဢၼ်ၼႆႉဢိူဝ်ႈ”

“ၸႂ်ႈတေႉၶႃႈယဝ်ႉ မေႃသွၼ်"

“ပေႃးၶႆႈၸႂ်တေႃႇလွင်ႈၼႆႉၼႆၵေႃႈ လႆႈႁၼ်ဝႃႈ ၵွပ်ႈတၢင်းႁူႉၺၢၼ်ႇတိုၵ်ႉတမ်ႇဝႆႉလႄႈ ႁႅင်းထၢတ်ႈၸႂ် (လွင်ႈၵႄႇထူၼ်ႈ) တိုၵ်ႉဢေႇဝႆႉၵွၼ်ႇလႄႈ ယဝ်ႉၵေႃႈ ယင်းပႆႇမေႃႁူႉတေႃႇလွင်ႈတိုဝ်းၵမ်ႊ ၽိင်ႈလူၵ်ႈၶူင်းလႄႈ ၸၼ်ႉထၢၼ်ႈ (လၵ်းၸဵင်) တၢင်းတိုဝ်းၵမ်ႊၵွၼ်ႇလႄႈ၊ ယဝ်ႉသမ်ႉ ယင်းပႆၸၢင်ႊႁႂ်ႈႁဵတ်းပဵၼ်လႆႈ ၽွၼ်းလီတူဝ်ၵဝ်ႇ လႄႈ ၽွၼ်းလီတင်းလၢႆ လႆႈၵွၼ်ႇ။ ပွင်ႇဝႃႈ ပႆႇပဵၼ်ဢၼ်ပေႉတူဝ်ၵွၼ်ႇၼႆ လႆႈႁၼ်မႃးၼင်ႇၼႆဢိူဝ်ႈ။ ပိူင်ႁၢင်ႊတႄႉ ပေႃးလႆႈပဵၼ်ၵူၼ်းဝႆႉယဝ်ႉယဝ်ႉ သေတႃႉၵေႃႈ ယွၼ်ႉၵွပ်ႈတီႈၶေႃႈမၢႆၸိူဝ်းဝႃႈမႃးၼႆႉ သမ်ႉႁႅင်းဢေႇဝႆႉ (ဢႄႇဝႆႉလႄႈ) ၸင်ႇဝႃႈ ပႆႇပဵၼ်ပႆႇၽႅဝ်လႆႈ ၸၼ်ႉထၢၼ်ႈၵူၼ်းၵွၼ်ႇ ၼႆယဝ်ႉ။ ပႆႇၸၢင်ႊႁွင်ႉလႆႈဝႃႈပဵၼ်ၵူၼ်းတေႉတေႉၵွၼ်ႇလႄႈ ၸင်ႇဝႃႈ ဢေလႅင်ၼႆၼၼ်ႉယဝ်ႉ။ ဢိူဝ်ႈ ဢၼ်လီလႆႈၶႆႈၸႂ်ၸဵၼ်းၸႃးတူၺ်းၼၼ်ႉတႄႉ မိူဝ်ႈပၢၼ်ပဵၼ်လုၵ်ႈဢွၼ်ႇ ၼၼ်ႉ လႆႈႁွင်ႉဝႃႈပဵၼ်ဢေလႅင်၊ ဢေဢွၼ်ႇ၊ လုၵ်ႈဢွၼ်ႇၼႆသေ ဝႆႉသေၵွၼ်ႇလႃႈ။ ၵူၺ်းၵႃႊ ၸူဝ်ႊပၢၼ်လုၵ်ႈဢွၼ်ႇ ဢၼ်ပဵၼ်ဢေဢွၼ်ႇ ဢေလႅင်ၼၼ်ႉ ၸိူဝ်းသူၸိူဝ်းႁဝ်း(တႆးသူ၊ တႆးႁဝ်း) ၸွင်ႇသမ်ႉလႆႈၶၢမ်ႇပူၼ်ႉမႃး၊ ႁႂ်ႈပူၼ်ႉမႃးလႆႈ ယဝ်ႉႁိုဝ်။ ဢၼ်ၼႆႉ လီလႆႈဝူၼ်ႉၶွပ်ႈတူၺ်းၶိုၼ်းလီလီလိုၵ်ႉလိုၵ်ႉ ၵွၼ်ႇဢိူဝ်ႈၼေႃႈ။ ပေႃးဝႃႈ ႁူႉပူၼ်ႉမႃးလႆႈၸူဝ်ႊပၢၼ် ဢေလႅင် လုၵ်ႈဢွၼ်ႇယဝ်ႉၼႆၵေႃႈ ဢမ်ႇၸႂ်ႈလုၵ်ႈဢွၼ်ႇလႅင်ယဝ်ႉၼႆ သမ်ႉဝႃႈ ပႆႇလႆႈလူးၵွၼ်ႇသႄႈ။ ၵွပ်ႈသင်လႃႇ ပေႃးဝႃႈၼႆ ပေႃးတင်းဝႃႈ ပႆႇမီး(ပႆႇပိူင်ႇလႆႈ) လမ်ႉၵတ်ႉၵႃႊၶၼ်ၵူၼ်း ဢၼ်ၵူၼ်းၵေႃႉၼိူင်ႈ ထုၵ်ႇလႆႈမီးၼၼ်ႉၵွၼ်ႇ ၼႆတႄႉ မၼ်းၼၼ်ႉ(ၶိူဝ်းၼၼ်ႉ)(ၵူၼ်းၼၼ်ႉ) ၶႂ်ႈၽႅဝ်ဝႆႉယူႇတီႈၼႂ်းၸၼ်ႉထၢၼ်ႈ ၸူဝ်ႊပၢၼ်ၵူၼ်းဢၼ်လႂ်ၵေႃႈလီ ပႆႇႁွင်ႉလႆႈဝႃႈပဵၼ်ၵူၼ်း တိုၵ်ႉပႆႇပဵၼ်ၵူၼ်း(တေႉ)ၼၼ်ႉၵွၼ်ႇဝႆႉယူႇဢိူဝ်ႈမႂ်းဝႃႈ။ ၵူၼ်းၵူႊၵေႃႉၵေႃႉၼႆႉ ႁူႉၵႃႊ တေလႆႈမႃးတီႈၸူဝ်ႊပၢၼ်ဢေလႅင်ဢွၼ်ႇၼၼ်ႉလွၼ်ႉလွၼ်ႉယဝ်ႉဢိူဝ်ႈ။ ၵူၺ်းၵႃႊ သမ်ႉဢမ်ႇၶၢမ်ႈပူၼ်ႉလႆႈ ၸူဝ်ႊပၢၼ်ဢၼ်ပဵၼ်လုၵ်ႈဢွၼ်ႇလႅင်သေ ၵွၺ်းတေလႆႈတၢႆၵႂႃႇၸွမ်းတင်းၸူဝ်ႊပၢၼ်ထၢၼ်ႈလုၵ်ႈဢွၼ်ႇလႅင်ၼၼ်ႉၼႆတႄႉ ဢၼ်လႆႈပဵၼ်မႃးဝႃႈပဵၼ်ၸူဝ်ႊၸၢတ်ႈပၢၼ်ၵူၼ်းၼၼ်ႉ ၵႅၼ်ႇပေႉလီတိူဝ်းသၢင်ႊသုမ်းပုၼ်းတေႉတေႉယဝ်ႉလႃႇ ဢၢႆႈဢိူၺ်း”။

“ၸႂ်ႈတေႉၶႃႈယဝ်ႉ မေႃသွၼ်။ ၵူၼ်းႁဝ်းၵူႊၵေႃႉၵေႃႉၼႆႉ ထုၵ်ႇလီလႆႈဝႆႉၾၢင်ႉမႅၼ်ႈတေႃႇ၊ ၶႆႈၸႂ်ဝူၼ်ႉ ၶွပ်ႈမႅၼ်ႈတေႃႇလွင်ႈၼႆႉ ၵၼ်ယူႇတေႉဢိူဝ်ႈ”။ ၽိူဝ်ႇဝႃႈၵႂႃႇၼင်ႇၼႆယဝ်ႉၵေႃႈ မေႃသွၼ်သမ်ႉသိုပ်ႇသေ-

“မိူဝ်ႈဝႃး မႂ်းထၢမ်မႃး လွင်ႈတၢင်းသုၼ်ႇယုမ်ႇယမ်ၵိူဝ်းဢိင်လွတ်ႈလွတ်ႈလႅဝ်းလႅဝ်းၼႆ ဢမ်ႇၸႂ်ႈႁိုဝ်။ ဢၼ် ၼၼ်ႉ ၼႂ်းယၢမ်းမိူဝ်ႈၼႆႉ တေၶိုၼ်းဢဝ်မႃးၵွင်ႉၵၢႆႇတေႃႇတင်း လွင်ႈၵူၼ်းသေ လၢတ်ႈၵၼ်ၵႂႃႇ”။ ၼႆလႄႈ ၵဝ်ၶႃႈၵေႃႈ ဝႃႈၵႂႃႇ “ၶႂ်ႈႁူႉယူႇၶႃႈဢေႃႈ မေႃသွၼ်” ၼႆၵေႃႈ-

“မိူဝ်ႈဝႃးၵဝ်လၢတ်ႈၵႂႃႇဝႃႈ “လွတ်ႈလွတ်ႈလႅဝ်းလႅဝ်း” ၼႆၼေႃ။ ဢၼ်ၶႂ်ႈလွတ်ႈလႅဝ်းၼႆႉ မၼ်းဢမ်ႇၸႂ်ႈတၢင်း ၽိတ်းသေတႃႉၵေႃႈ သုၼ်ႇလႆႈသုၼ်ႇပဵၼ်ဢၼ်ၵေႃႉၺၢၼ်ႇဢေႇသေယဝ်ႉ သမ်ႉတိုမ်တၼ်ၶဝ် လႆႈၵႂႃႇၼၼ်ႉ တင်းသုၼ်ႇ လႆႈသုၼ်ႇပဵၼ် ဢၼ်ၸိူဝ်းၺၢၼ်ႇယႂ်ႇသေယဝ်ႉ သမ်ႉမေႃဝူၼ်ႉၶွပ်ႈႁိဝ်ႈၸင်ႊၶဝ် လႆႈၵႂႃႇၼၼ်ႉ မၼ်းမႃးပဵၼ် တၢင်းၵွင်ႉ ၵၢႆႇၼွင်ႇၵပ်းၵၼ်ဝႆႉ တေႃႇၽွၼ်းလီၽွၼ်းၸႃႉလူင် လူၵ်ႈၶူင်းဝႆႉဢိူဝ်ႈ”။

“ၸႂ်ႈဢေႃႈ ဝႃႈမႃးၼင်ႇၼႆၶႃႈယဝ်ႉ မေႃသွၼ်” ၼႆၵေႃႈ-

“ဢိူဝ်ႈ ပေႃးတေလႆႈလၢတ်ႈၼႆတႄႉ ၼႂ်းဝၼ်းမိူဝ်ႈၼႆႉ ဢွၼ်ၵၼ်တုၵ်းယွၼ်းဝႃႈ ၶႂ်ႈလႆႈတၢင်းလွတ်ႈလႅဝႅး၊ တၢင်းသုၼ်ႇယုမ်ႇယမ်ၵိူဝ်းဢိင်လႆႈလွတ်ႈလႅဝ်းၼႆၼၼ်ႉၼႃႇ။ လီတေႉယူႇဢိူဝ်ႈ။ ၸၢဝ်းၼပ်ႉထိုဝ် ဢၼ်လႂ်ၵေႃႈလီ ႁူႉတၵ်းတုၵ်းယွၼ်း တႃႇႁႂ်ႈလႆႈယုမ်ႇယမ်ၼပ်ႉထိုဝ်လႆႈလွတ်ႈလွတ်ႈလႅဝ်းလႅဝ်း ၼင်ႇၽႂ်မၼ်းယုမ်ႇယမ်ၼၼ်ႉယူႇ ဢိူဝ်ႈ။ ၵူၺ်းၵႃႊ ဢၼ်တေလႆႈၶႆႈၸႂ်ၵၼ်ၼၼ်ႉတႄႉ ဢၼ်ၼႆႉ ၸွင်ႇၸႂ်ႈဢၼ်ၸၢဝ်းၼပ်ႉထိုဝ်ဢၼ်ၼိူင်ႈ တုၵ်းယွၼ်း တေႃႇၸၢဝ်းၼပ်ႉထိုဝ်တၢင်ႇဢၼ်၊ လုၵ်ႉတီႈၵူၼ်းမူႇၼိူင်ႈသေ ယွၼ်းတေႃႇၵူၼ်းၸိူဝ်းတၢင်ႇမူႇၶဝ်ၼၼ်ႉ ဝႆႉႁိုဝ်။ ပေႃး ၼၼ် ဢွၼ်တၢင်းသုတ်းတႄႉ တေလႆႈဢွၼ်ၵၼ်ၶႆႈၸႂ်လူင်ႈၼႃႈထႃႈဝႃႈ တီႈၼႂ်းၸၢဝ်းၼပ်ႉထိုဝ်တူဝ်ၸဝ်ႈၵဝ်ႇၸင်ႇၼႆႉၼႆႉ တေလႆႈတွင်ႈထၢမ်ဝႃႈတေႃႇ ၸိူဝ်းဢၼ်ပဵၼ်ႁူဝ်ၼႃႈ ၾၢႆႇၸၢဝ်းၼပ်ႉထိုဝ်ၶဝ်၊ ဢမ်ႇၼၼ် တေႃႇၸိူဝ်းၸဝ်ႈတူၼ် ဢၼ်ဝႃႈပဵၼ်ၸဝ်ႈၽြႃး၊ ၸဝ်ႈၽယႃးၶဝ်ဝႃႈ သုၼ်ႇလႆႈသုၼ်ႇပဵၼ်ၸိူဝ်းၼင်ႇၼၼ်ၼၼ်ႉ လႆႈယဝ်ႉယဝ်ႉႁိုဝ်းၼႆ ၵွၺ်းယဝ်ႉဢိူဝ်ႈ။ ၼႆႉ မၼ်းဢမ်ႇၸႂ်ႈလွင်ႈလူင်းၼေးတိုၵ်းတေႃးတေႃႇ ၸၢဝ်းယုမ်ႇယမ်ၼပ်ႉထိုဝ် ဢၼ်လႂ်ၼေႃ။ ပေႃးတေဝႃႈလွင်ႈၼႆႉၼႆႉ မၼ်းပဵၼ်သုၼ်ႇလႆႈသုၼ်ႇပဵၼ် ဢၼ်ၵူၼ်းၶူင်းၵၢင်ၼိူင်ႈၵေႃႉ ထုၵ်ႇလႆႈထုၵ်ႇမီး ၼႆၵေႃႈ ဝႃႈလႆႈယူႇ တင်းဢမ်ႇၽိတ်းသင်လႆႈ ၼၼ်ႉယဝ်ႉ။

“သပ်းလႅင်းပၼ် ႁႂ်ႈပေႃးတိူဝ်းလႆႈပွင်ႇၸႂ်ၵႂႃႇသေၵမ်းၶႃႈမေႃသွၼ်”

“ၸႂ်ႈယဝ်ႉ။ သႂ်ႇလႄႈ ၸဝ်ႈႁူႉမေႃလူင်ၶဝ်ၼႆႉ ပေႃးဝႃႈပဵၼ်ပၢႆးႁူႉမေႃပၺ်ႇၺႃႇမဵဝ်းလႂ် ပေႃးပဵၼ်ၸိုင်ႈမိူင်းမဵဝ်း ၼင်ႇႁိုဝ် ယဝ်ႉၵေႃႈ ပေႃးဝႃႈပဵၼ်တူင်ႇဝိူင်းၵူၼ်းၵၼ်ႊၵူၼ်းၸိူဝ်ႉႁိူဝ်ၼႆ ၶဝ်တေဝႃႈတိုၵ်ႉၺၢမ်ႉၽႅင်းဝႆႉၼႆလႃႇ။ ပေႃး ပဵၼ်ႁိုဝ်ဝႆႉၼႆ ဢမ်ႇၶိုတ်းၸၼ်ႉၵွၼ်ႇၼႆ လႆႈတႅပ်းတတ်းဝႆႉၸိူဝ်ႉၼင်ႇႁိုဝ်လႃႇ”။

“ပေႃးပဵၼ်လွင်ႈဢိုတ်းတပ်ႉဝႆႉ သုၼ်ႇသိုပ်ႇၶီးတီႈဢွၵ်းဢေႃ ဢၼ်ဢမ်ႇႁႂ်ႈမီးတၢင်းလွတ်ႈလႅဝ်း ဢၼ်ဢမ်ႇႁႂ်ႈ ပႃးတၢင်းဝူၼ်ႉၶွပ်ႈၶႆႈၸႂ်ၼၼ်ႉၼႆ ၶႂ်ႈပဵၼ်ပၢႆးႁူႉမေႃပၺ်ႇၺႃႇဢၼ်လႂ်ၵေႃႈလီ ၶႂ်ႈပဵၼ်ပၢႆးၵၢၼ်မိူင်း ဢၼ်မဵဝ်းလႂ် ၵေႃႈယဝ်ႉ ၶႂ်ႈပဵၼ်သိုင်ႇတူင်ႇဝူင်းၵူၼ်းၵၼ်ႊၵူၼ်းၸိူဝ်းၼင်ႇႁိုဝ်ၵေႃႈယဝ်ႉ တိုၼ်းတေလႆႈဝႃႈ ပၵ်းပိူင် (ၾိင်ႈပွင်) ၶဝ် ၺၢမ်ႉၽႅင်းယဝ်ႉ ဢမ်ႇမီးၸၼ်ႉ ဢမ်ႇၶိုတ်းၸၼ်ႉၼႆ ဝႃႈလႆႈယဝ်ႉ တႅပ်းတတ်းဝႆႉၼင်ႇၼႆဢေႃႈ မေႃသွၼ်”

“ဢိူဝ်ႈ ပေႃးမွၵ်ႈၼႆႉၼႆ ပေႃးၶႂ်ႈသၢင်းလၢင်းလူင်ဝႆႉတေႉတေႉယဝ်ႉဢိူဝ်ႈ။ ပေႃးတၵ်းဝႃႈ ပဵၼ်ဝႆႉ လွင်ႈတၢင်းဢၼ် ႁေႉတပ်ႉဢွၵ်းဢေႃ ပၢႆးဝူၼ်ႉၶွပ်ႈၶႆႈၸႂ်တီႈၵူၼ်းၶူင်းၵၢင်ႁဝ်းဝႆႉၼႆ လွင်ႈဢၼ်လႂ်သေဢမ်ႇဝႃႈ မၼ်းတိုၵ်ႉၺၢမ်ႉဝႆႉယူႇ ၵွၼ်ႇၼႆသေ ပေႃးဢွၼ်ၵၼ်တႅပ်းတတ်းဝႆႉၵၼ်ၼင်ႇၼႆၸိုင် ပေႃးတီႈတွၼ်ႊၵၼ်ႊၾၢႆႇၸၢဝ်းၼပ်ႉထိုဝ်မႃးလူး တေ ပဵၼ်ၸိူဝ်ႉႁိုဝ်။ တႃႇႁႂ်ႈပဵၼ်လႆႈ တၢင်းၵိူဝ်းထိုဝ်လွတ်ႈလွတ်ႈလႅဝ်းလႅဝ်းၼၼ်ႉ တၵ်းတေလႆႈမီးသုၼ်ႇယုမ်ႇယမ်လွတ်ႈ လွတ်ႈလႅဝ်းလႅဝ်းဢိူဝ်ႈ။ တႃႇယုမ်ႇယမ်လႆႈလွတ်ႈလွတ်ႈလႅဝ်းလႅဝ်းဢၼ်ဝႃႈၼၼ်ႉ တေလႆႈမီးသုၼ်ႇဝူၼ်ႉၶႆႈလွတ်ႈလႅဝ်း တေႃႇတၢင်းၸိုဝ်ႈၸႂ်ႈမၢၼ်ႇမႅၼ်ႈလႄႈ ဢၼ်ၽိတ်းဢၼ်ႁိူင်ႈၼၼ်ႉလႆႈၵွၼ်ႇဢိူဝ်ႈ။ ပေႃးတၵ်းဝႃႈ ဢမ်ႇလႆႈသုၼ်ႇ ဝူၼ်ႉၶွပ်ႈၶႆႈၸႂ်ထတ်းသၢင် တင်းလွတ်ႈလွတ်ႈလႅဝ်းလႅဝ်းမႃးသေယဝ်ႉ သမ်ႉ လႆႈဢွၼ်ၵၼ်ၵိူဝ်းဢိင်ယုမ်ႇယမ်မႃး လွတ်ႈလွတ်ႈလႅဝ်းလႅဝ်းတေႃႇ ၸၢဝ်းၼပ်ႉထိုဝ်တူဝ်ၵဝ်ႇဢၼ်ဝႃႈၼၼ်ႉ တီႈတေႉမၼ်း ၵူၺ်းပဵၼ်ဢၼ်လႆႈၶၢမ်ႇ ၺႃးၶင်ဝႆႉ ယူႇတီႈ ၼႂ်းၶွပ်ႇဝူင်းၽိင်ႈႁိတ်ႈ(ထုင်း) ပူႇမွၼ်ႇၼၢႆးယႃႊ (ပူႇဢွၼ်ႁဵတ်းမႃး ယႃႊဢွၼ်ႁဵတ်းဝႆႉ) ၼၼ်ႉသေ သမ်ႉဢမ်ႇ ဢွၼ်ၵၼ်ၸၢင်ႊယၵ်ႉႁၼ်လႆႈၼၼ်ႉႁိုဝ်ၼႆ တႃႉဢမ်ႇလီဢွၼ်ၵၼ်ၶႆႈၸႂ်တူၺ်းယဝ်ႉႁိုဝ်။ “ထုၵ်ႇလီလႆႈၶႆႈၸႂ်တူၺ်းယူႇၶႃႈဢေႃႈ မေႃသွၼ်”

“ဢၼ်ၼႆႉၼႆႉ ပေႃးဝႃႈပဵၼ်ၽူႈၵေႃႉဢၼ်သိုဝ်ႈယူဝ်း (သိုဝ်ႈတူဝ်ႇ) ၽူႈၵေႃႉဢၼ်ႁၵ်ႉသႃတေႃႇ ထမ်းတြႃးၸိုဝ်ႈ ၸႂ်ႈ၊ ၽူႈၵေႃႉဢၼ်မီးၺၢၼ်ႇပၺ်ႇၺႃႇတဵမ်ထူၼ်ႈဝႆႉၶဝ်ၼႆတႄႉ တေၸၢင်ႊႁပ်ႉဢဝ်လႆႈ တၢင်းႁပ်ႉႁၼ်ၼႆႉ တင်းလီ လီငၢမ်းငၢမ်းယူႇ။ ၵွပ်ႈသင်လႃႇ၊ ၵွပ်ႈပဵၼ်လွင်ႈဢၼ်လီလႆႈထုၵ်ႇၸႂ်တေႉၼၼ်ႉလႄႈဢိူဝ်ႈ။ ပေႃးတင်းဝႃႈ ၵုမ်ႇလႆႈပဵၼ် ၸႂ်လိပ်းၶီးမႃးၸွမ်း တင်းတြႃးၵူဝ်ႁႄသေယဝ်ႉ တၢင်းႁူႉတၢင်းႁၼ်ၼႆၵေႃႈ သမ်ႉလႆႈၶၢမ်ႇတၢင်းဢိုတ်းတၼ်တပ်ႉ ႁႄႉဝႆႉပေႃးၼႆ၊ ဢၼ်ၼႆႉၼႆႉ ပဵၼ်လွင်ႈဢမ်ႇပၼ်သုၼ်ႇလႆႈသုၼ်ႇပဵၼ်ႁႂ်ႈၵူၼ်းၶူင်းၵၢင် တင်းတဵမ်ထူၼ်ႈလီငၢမ်းသင် ၼၼ်ႉ ၵွၺ်းယဝ်ႉ။ ပဵၼ်လွင်ႈ ႁၵ်းယႃႉလူႉပႅတ်ႈသုၼ်ႇလႆႈသုၼ်ႇပဵၼ်ၵူၼ်း ၼၼ်ႉယဝ်ႉ။ ပေႃးပဵၼ်လူင်ပွင်ႊၸိုင်ႈ ႁဵတ်းၵေႃႈ လူင်ႈပွင်ႊၸိုင်ႈၼၼ်ႉၵေႃႉႁၵ်းယႃႉလူႉယဝ်ႉ။ ပေႃးပဵၼ်ၽူႈဢွၼ်ႁူဝ် ၼႂ်းၸုမ်းၾၢႆႇၵၢၼ်မ်ူင်း (ၸုမ်းပႃႇတီႇ) ႁဵတ်းၵေႃႈ မၼ်းပဵၼ်ၵေႃႉယႃႉလူႉၼၼ်ႉယဝ်ႉ။ ပေႃးပဵၼ်ၾၢႆႇၸၢဝ်းၼပ်ႉထိုဝ်ၶဝ်ႁဵတ်းၼႆၵေႃႈ တၵ်းတေလႆႈဝႃႈၶဝ်ပဵၼ် ၵေႃႉၸိူဝ်းႁၵ်းယႃႉလူႉၼၼ်ႉၼႆ ယူႇယဝ်ႉ။ လွင်ႈၼႆႉ ဢမ်ႇမီးတၢင်းတႃႇထိူမ်ၼေးတေႃႇ တူၼ်ၵေႃႉၵူၼ်းၽူႈလႂ်သႄႈ။ လၢတ်ႈဢဝ်ၸွမ်းပိူင်ထမ်းၸင်ႈယၼ်ႇၸႂ်ၸႅတ်ႈၸႅတ်ႈတေႉတေႉၼၼ်ႉ ၵွၺ်းယဝ်ႉ။

“ဢေႃႈၶႃႈ။ ပွင်ႇၸႂ်ယူႇၶႃႈမေႃသွၼ်။ ပဵၼ်လွင်ႈလီလႆႈႁၢၼ်ႉၸႂ်တေႉတေႉၵွၼ်ႇ ၶႃႈဢေႃ”။

“တီႈတေႉမၼ်းၵေႃႈ ဢွၵ်းဢေႃၵူၼ်းႁဝ်းၼႆႉ ၸၼ်ႉမၼ်းဢမ်ႇတႅမ်ႇၵႃႊႁိုဝ်သႄႈ။ ၵူၺ်းၵႃႊ ပေႃးတင်းလွင်ႈ ႁႄႉၵင်ႈဢူတ်းတပ်ႉၶဝ်သေ၊ တင်းလွင်ႈၵႂၢၼ်းၵႅမ်းဝႆႉသေ ပေႃးၼႆတႄႉ ဢမ်ႇၸၢင်ႊလၢႆႊလႆႈတၢင်းႁၼ် ဢၼ်တေၸီး ဝူင်ႇမွင်ႇပွင်ႇတေႃႇ တၢင်းလူင်ႉလႅင်းလွတ်ႈလႅဝ်းၼၼ်ႉ လႆႈယဝ်ႉသႄႈ။ တြႃးၸိုဝ်ႈၸႂ်ႈမၢၼ်ႇမႅၼ်ႈၼႆႉ ၵူၼ်းၵူႊၵေႃႉ ၶႂ်ႈလႆႈဢိူဝ်ႈ။ တၢင်းငမ်းယဵၼ်ၼႆၵေႃႈ ၵူၼ်းၵူႊၵႃႉၶႂ်ႈလႆႈဢိူဝ်ႈၼႆသေ ဝႃႈၵၼ်ၼင်ႇၼႆယူႇဝႆႉဢိူဝ်ႈ။ တႃႇတေလႆႈ တၢင်း ၸိုဝ်ႈၸႂ်ႈၼၼ်ႉလႄႈသင် တၢင်းငမ်းယဵၼ်ၼၼ်ႉလႄႈသင် တေလႆႈႁဵတ်းသင်ဢၼ်ဝႃႈၼၼ်ႉတႄႉ ၵေႃႉဢၼ်ၶႆႈၸႂ် လွင်ႈမၼ်းလႄႈသင်၊ ၵေႃႉဢၼ်ၶႆႈၸႂ်ယဝ်ႉလႄႈသင် တေမီးလၢႆၵေႃႉ ပေႃးဝႃႈၼႆ ၊ ပေႃးသွၵ်ႈႁႃတူၺ်းၼႆ တေလႆႈႁၼ် ဢေႇတေႉတေႉယဝ်ႉ။ ဢၼ်ၵဝ်ဝႃႈၼႆႉ ၸွင်ႇႁပ်ႉလႆႈ”

“ႁပ်ႉလႆႈယူႇဢေႃႈ မေႃသွၼ်။ ၵူၼ်းႁဝ်းၼႆႉ ၵူၺ်းမီးၸႂ်တႃႇ ဢၼ်ၶႂ်ႈပဵၼ်ၼၼ်ႉၵွၺ်းသေယဝ်ႉ တႃႇၸႂ်ႉတိုဝ်း ႁႂ်ႈပဵၼ်တူဝ်ထူပ်းၼၼ်ႉ၊ လႄႈ တႃႇသွၵ်ႈႁႃလၢႆးတိုဝ်းၵမ်ႊမၼ်းၼၼ်ႉမႃး သမ်ႉ ဢမ်ႇပေႃးသူႈမီးၽူႈၵေႃႉဢၼ် တေ ပၼ် ၶၢဝ်းယၢမ်းတႃႇမၼ်း၊ လႆႈဝႃႈ ပေႃးတၢၼ်ႇဢမ်ႇမီး ၼၼ်ႉယဝ်ႉ။ ႁႃယၢပ်ႇ ၼၢၼ်းႁၼ်တေႉလႆ။

“ဢိူဝ်ႈ ၸိူဝ်းတီႈၽၢႆႇၼႃႈၼၼ်ႉ ၵွပ်ႈလႆႈလၢတ်ႈမႃးၶေႃႈဢၼ်ဝႃႈ သုၼ်ႇယုမ်ႇယမ်ၵိူဝ်းဢိင်ၼၼ်ႉလႄႈ တီႈၼႆႈ ၼႆႉ ၸင်ႇလႆႈမႃးသိုပ်ႇလၢတ်ႈ ၶေႃႈဢၼ်ဝႃႈတြႃးၸိုဝ်ႈၸႂ်ႈ တင်းတၢင်းငမ်းယဵၼ်ၼၼ်ႉ ၵွၺ်းယဝ်ႉ။ ၽူႈၵေႃႉဢၼ် ၶႂ်ႈငမ်းယဵၼ်တေႉတေႉၼၼ်ႉ တၵ်းတေလႆႈႁတ်းသွၵ်ႈႁႃတေႃႇ တြႃးၸိုဝ်ႈၸႂ်ႈမၢၼ်ႇမႅၼ်ႈဢိူဝ်ႈ။ ပေႃးၵွၺ်းဢဝ်သူပ်း လၢတ်ႈယူႇ ၶေႃႈမၼ်းၵွၺ်းၼၼ်ႉတႄႉ ငၢႆႈယူႇလေႃႇ။ တီႈတူဝ်ထူပ်းမႃးတႄႉ သမ်ႉဢမ်ႇၸွမ်းပဵၼ်လႆႈႁဵတ်းလႆႈသေ ထူပ်းႁၼ်ယၢပ်ႇယၢၵ်ႈဝႆႉယူႇၼၼ်ႉၼႃႇ”

“ဢေႃႈၶႃႈ”

“ၼႂ်းဝၼ်းမိူဝ်ႈၼႆႉ ပေႃးၵုမ်ႇတေလၢတ်ႈတေႃႇ လွင်ႈၸၢဝ်းၼပ်ႉထိုဝ်ယူႇၵွၺ်းၼႆ ၵူၼ်းၼႂ်းၵၢပ်ႈပၢၼ်ၸင်ႇၼႆႉ ၶဝ်ၼႆႉ တေဢဝ်ၶဝ်ႈၸႂ်ယၢပ်ႇ၊ ၵွပ်ႈၼႆ ႁဝ်းၸၢမ်းဢဝ်ၶေႃႈၵႂၢမ်းၼႂ်းပၢႆးၵၢၼ်မိူင်း ဢၼ်ၶဝ် ၵႆႉလၢတ်ႈယူႇၸိူဝ်းၼၼ်ႉ မႃးၾႃၵိုၵ်းတင်းၸၢဝ်းၼပ်ႉထိုဝ်သေ ၶႆႈၸႂ်ဝူၼ်ႉၶွပ်ႈတူၺ်းၼေႃႈ”“ဢေႃႈၶႃႈ လၢတ်ႈၶႃႈလႄႈမေႃသွၼ်”

“ထၢၼ်ႈလၵ်းၸဵင် တီႇမူဝ်ႇၶရေႇသီႇ၊ ထၢၼ်ႈလၵ်းၸဵင် သုၼ်ႇလႆႈသုၼ်ႇပဵၼ်ၵူၼ်း ဢၼ်လၢတ်ႈၵၼ်ယူႇၼႆႉ ပေႃးတၵ်းဝႃႈ ပႆႇၸႂ်ႈတေႃႇၸၼ်ႉထၢၼ်ႈဢၼ်လႂ် ပႆႇၶိုတ်းလႆႈဢၼ်လႂ်ၵွၼ်ႇၼႆ လႄႇလၢတ်ႈၵၼ်ဝႆႉယူႇဢိူဝ်ႈ။ ၵူၼ်းၸိူဝ်း ဢၼ်လၢတ်ႈယူႇၼင်ႇၼႆၶဝ်ၼႆႉ ၸွင်ႇယၢမ်ႈလႆႈႁၼ်ယူႇႁိုဝ်။ ပေႃးယၢမ်ႈလႆႈႁၼ်ၼႆ ၸွင်ႇသမ်ႉတေဢွၼ်ၵၼ် ႁတ်းလၢတ်ႈယူႇႁိုဝ်။ ပေႃးတီႈၾၢႆႇၸၢဝ်းၼပ်ႉထိုဝ်မႃးၼႆၵေႃႈ ပေႃးဝႆႉထၢၼ်ႈလၵ်းၸဵင်ဢွၼ်ႇသေတီႈၼႆ တေလီယူႇ ႁိုဝ်ၼႆ။ မႂ်းထၢင်ႇႁၼ်ၸိူဝ်ႉၼင်ႇႁိုဝ်”

“တေလီယူႇဢေႃႈ မေႃသွၼ်။ ၵူၺ်းၵႃႊ တေဢွၼ်ၵၼ်ႁတ်းလၢတ်ႈဢွၵ်ႇယူႇၼႆတႄႉ ဢမ်ႇထၢင်ႇသႄႈ။ တီႈ တေႉမၼ်း လွင်ႈတၢင်းၼပ်ႉထိုဝ်ၵိူဝ်းဢိင်လူင် ဢၼ်ၵူၼ်းႁဝ်းလႆႈဝႆႉဝၢင်းတၢင်းယုမ်ႇယမ် ႁပ်ႉဢဝ်ဝႆႉဝႃႈ မၼ်းၸၢင်ႊ ႁဵတ်းႁႂ်ႈ လွင်ႈၵေႃႇတင်ႈပဵၼ်ၸူဝ်ႊၸၢတ်ႈၶိုၼ်ႈယႂ်ႇမႂ်ႇသုင်လႆႈၼၼ်ႉ သင်မၼ်းလွတ်ႈၵၢင်းတၢင်းၽိတ်းမွၵ်ႈလႂ်ၸင်ႇ၊ ပေႃးမၼ်းပၼ်လႆႈ လွင်ႈတၢင်းငမ်းယဵၼ်သိူဝ်းသႃႇတေႃႇ မွၵ်ႈၸၼ်ႉထၢၼ်ႈဢၼ်လႂ်ၸင်ႇ၊ ပေႃးမၼ်းပၼ်လႆႈ သုၼ်ႇ လွတ်ႈလႅဝ်းႁႂ်ႈတၢင်းဝူၼ်ႉႁၼ်ၶႆႈၸႂ် ၵူၼ်းႁဝ်းမွၵ်ႈၵႃႊႁိုဝ်ၸင်ႇ- ပေႃးၼႆ ပေႃးၼႆသေ မီးပၼ်လႆႈၶေႃႈမၵ်းမၢႆထၢၼ်ႈလၵ်းၸဵင်မၼ်းယူႇတေႉၼႆတႄႉ ၶႂ်ႈပဵၼ်ၸၢဝ်းယုမ်ႇယမ်ၼပ်ႉထိုဝ် ဢၼ်လႂ်ၵေႃႈလီ ၸင်ႇတေၸၢင်ႊတႅပ်းတတ်း ပၼ်လႆႈ လွင်ႈတၢင်းမၼ်း ဢၼ်ဝႃႈ ၶိုတ်းပဵင်းလႆႈလၵ်းၸဵင်ယူႇႁိုဝ် ဢမ်ႇၶိုတ်းပဵင်းလႆႈၼၼ်ႉ လႆႈယဝ်ႉဢေႃႈ မေႃ သွၼ်”

“ဢိူဝ်ႈ ၼႆႉတႄႉ ပေႃးပဵၼ်ၽူႈၵေႃႉ ၸိူဝ်းဢၼ်လႆႈဝႆႉတၢင်းမေႃဝူၼ်ႉၶွပ်ႈၶႆႈၸႂ်လွတ်ႈလႅဝ်းၼၼ်ႉတႄႉ လွင်ႈတၢင်းဢၼ်ၼႆႉၼႆႉငၢႆႈဢိူဝ်ႈ။ ပေႃးပဵၼ်တီႈၸိူဝ်းဢၼ်လႆႈၶၢမ်ႇဝႆႉ လွင်ႈဢိုတ်းတၼ် လႄႈ တင်းလွင်ႈတၢင်းဢမ်ႇသိုဝ်ႈယူဝ်း(သိုဝ်ႈတူဝ်ႇ) ၸိူဝ်းၼၼ်ႉ ပေႃးၼႆတႄႉ လွင်ႈဢၼ်ၼႆႉၼႆႉ ၵႅၼ်ႇပဵၼ်ဢၼ်ယၢပ်ႇၵႂႃႇတေႉတေႉၼၼ်ႉယဝ်ႉ။ ၵူၺ်းၵႃႊ သင်ပဵၼ်ဝႆႉၵူၼ်းၶူင်းၵၢင်တေႉယူႇ သမ်ႉၶႂ်ႈလႆႈတၢင်း ငမ်းယဵၼ်ယူႇ ၶႂ်ႈႁႃႁၼ်လႆႈတေႃႇတြႃးၸိုဝ်ႈၸႂ်ႈ တေႉယူႇၼႆတႄႉ ၶႂ်ႈပဵၼ်ၵေႃႉၵူၼ်းဢၼ်ၶဝ်ႈဝႆႉ ၸၢဝ်းၼပ်ႉထိုဝ်ဢၼ်လႂ်ၵေႃႈလီ တေႃႇၶေႃႈဢၼ်ၼႆႉတႄႉ တၵ်းတေလႆႈ ဢဝ်ၶႆႈၸႂ်သႂ်ႇပႃးလႆႈၵွၼ်ႇဢိူဝ်ႈ - ဢၢႆႈ”

“ဢေႃႈၶႃႈ လၢတ်ႈပၼ်လၢႆးၶႆႈၸႂ်ဢွၼ်ႇမၼ်းသေၵမ်းၶႃႈမေႃသွၼ်”

“ၶႂ်ႈလႆႈတၢင်းၸိုဝ်ႈၸႂ်ႈတေႃႇၾၢႆႇၼႃႈႁိူၼ်းတႃယေး၊ ၾၢႆႇလွင်ႈၵၼ်ႊၵူၼ်း၊ ၾၢႆႇလွင်ႈပၢႆးမၢၵ်ႈမုၼ်း၊ ၾၢႆႇလွင်ႈ ၸၢဝ်းၼပ်ႉထိုဝ် ၶႂ်ႈလႆႈတၢင်းၸိုဝ်ႈၸႂ်ႈမၢၼ်ႇမႅၼ်ႈဢၼ်လႂ်ၵေႃႈလီ၊ ၵႃႊပႆႇႁၼ်လႆႈ တၢင်းၽိတ်းတူဝ်ၵဝ်ႇ၊ ၵႃႊပႆႇၶႂ်ႈႁၼ် ၵွၼ်ႇ ၸိူဝ်းၼႆႉ တိုၵ်ႉမီးဝႆႉၼႆ တေပဵၼ်ဝႆႉ လိူင်ႈသူၼ်ႇတူဝ်လဵဝ်ၽႅၼ်သုင် ၸင်ႈငဝ်ႈမၼ်းဝႆႉယူႇ။ ၵႃႊဢၼ်ၼႆႉ တိုၵ်ႉ ပဵၼ်မႆႉသိူဝ်ႇၵမ်ႉတဝ်ႉပၼ်မၼ်းဝႆႉယူႇပေႃးၼႆ တြႃးၸိုဝ်ႈၸႂ်ႈမၢၼ်ႇမႅၼ်ႈ ဢၼ်ဝႃႈၼၼ်ႉ ႁူႉတင်းတေၵႆယၢၼ်ယၢဝ် ၵႆလူင်ဝႆႉယူႇဢိူဝ်ႈ။ ပေႃးတေလႆႈဢဝ်တင်းတူဝ်ယၢင်ႇ ဢၼ်တႅၵ်ႈတီးမၼ်းသေဝႃႈၼေၼႆ တီႈၼႂ်းမိုဝ်းမႂ်းတင်းၵဝ်ၼႆႉ တေဢွၼ်ၵၼ်ယိပ်းဝႆႉမၢၵ်ႇၵွၼ်ႈလိူင်ဢွၼ်ႇဢၼ်ၼိူင်ႈ ႁၢင်းၽႂ်ႁၢင်းမၼ်းဢိူဝ်ႈ။ ဝႃႈၼႆသေလႃႈ။ ႁဝ်းၶဝ်ၵူႊၵေႃႉၼႆႉ မီးသုၼ်ႇလၢတ်ႈဝႃႈ ဢၼ်ႁဝ်းယိပ်းဝႆႉၼႂ်းမိုဝ်းတူဝ်ၵဝ်ႇၼႆႉ ပဵၼ်ၵွၼ်ႈၶမ်းၼႆဢိူဝ်ႈ။ ၼႆႉၸမ်း- ပဵၼ်သုၼ်ႇလႆႈ သုၼ်ႇပဵၼ်ယဝ်ႉၼေႃ။ တြႃးၸိုဝ်ႈၸႂ်ႈၼႆတႄႉ ဢမ်ႇပႆႇၸၢင်ႊဝႃႈလႆႈသႄႈ။ ဢိူဝ်ႈၵမ်းၼႆႉ ပေႃးမီးၵူၼ်း ဢၼ်ပႃးမႃး ႁိၼ်မၢတ်ႇ(ၵႂၢတ်ႇ) ယဝ်ႉၼႆလႃႈ။ ဢၼ်ႁဝ်းယိပ်းၵမ်ဝႆႉၼၼ်ႉ သင်ဝႃႈပဵၼ်ၶမ်းတေႉၼႆတႄႉ ႁဝ်းတေလႆႈသူႈတေႃႇ လွင်ႈဢၼ်တေဢဝ်ၸၢမ်းတူၺ်းၶမ်းၼၼ်ႉ လီငၢမ်းယူႇ။ ပေႃးပဵၼ်ၵေႃႉၵူၼ်းဢၼ်ၵမ်ဝႆႉၼႂ်းမိုဝ်း ပဵၼ်ၶမ်းတေႉတေႉ ၼၼ်ႉၼႆ လွင်ႈဢၼ်ၸဝ်ႈပႃးမႃးႁိၼ်မၢတ်ႇၼၼ်ႉ မၼ်းတေလႆႈၸူမ်းဝႆႉၸွမ်းၵွၼ်ႇဢိူဝ်ႈ။ တေႃႇလွင်ႈၼႆႉ မႂ်းတင်းၵဝ် သေၵေႃႉၵေႃႉၼႆႉ သင်သမ်ႉၶိုၼ်းၶိုၼ်ၶၢၼ်သေထဵင်ဝႆႉယူႇၼႆတႄႉ တေႃႈဢၼ်မႂ်းယိပ်းၵမ်ဝႆႉၼၼ်ႉ ပဵၼ်ၶမ်းတေႉတေႉ ယူႇၵေႃႈ တၵ်းတေလႆႈတႅပ်းတတ်းဝႃႈပဵၼ် ဢမ်ႇၸႂ်ႈၶမ်း ၼႆၵွၺ်းယူႇယဝ်ႉ။ ၵွပ်ႈၼႆ တေႃႇတီႈၽၢႆႇၼႃႈႁဝ်း တင်းဢဝ်ထၢၼ်ႈလၵ်းၸဵင်တၢင်ႇၸိူဝ်းၶဝ် မႃးလၢတ်ႈၼေၵၼ်ယူႇ၊ တေႃႇထၢၼ်ႈလၵ်းၸဵင် ၸၢဝ်းၼပ်ႉထိုဝ်ၼႆၵေႃႈ ပေႃးဝႆႉဝၢၼ်းဝႆႉၼႆ တေလီယူႇဢမ်ႇၸႂ်ႈႁိုဝ် ၼႆသေ ၸင်ႇထၢမ်မႂ်းဝႆႉၼၼ်ႉၼႃႇ။ တေႃႇတီႈလွင်ႈၾၢႆႇၵၼ်ႊၵူၼ်း ပိူင်ၽဵင်ႈ၊ ၾၢႆႇပၢႆးၵၢၼ်မိူင်းၸိူဝ်းၼႆႉ တင်းလႆႈမီးဝႆႉ ထၢၼ်ႈလၵ်းၸဵင်မၼ်းယူႇပေႃးၼႆ၊ တီႈတြႃးၸၢဝ်းယုမ်ႇယမ် ဢၼ်ဢွၼ်ၵၼ်ႁပ်ႉဢဝ်မၼ်းဝႆႉဝႃႈပဵၼ် ဢၼ်ၸၢင်ႊယူၵ်ႉတၢင်ႇလဝ်ပၼ် ႁႂ်ႈၸူဝ်ႊပၢၼ်ၵူၼ်း လႆႈပဵၼ်မႃး ထၢၼ်ႈ ၵူၼ်းသုင်လိူဝ်ၵူၼ်းၵႂႃႇထႅင်ႈၼၼ်ႉၼႆ ၶႅၼ်းဢမ်ႇလီပဵၼ် ဢၼ်ႁၢမ်းပဝ်ႇဝႆႉ ထၢၼ်ႈလၵ်းၸဵင်ၼၼ်ႉယဝ်ႉသႄႈ။ တီႈႁိၼ်မၢတ်ႇၸၢမ်း (ၶမ်း) လူင် တၢင်းယုမ်ႇယမ်ႁပ်ႉဢဝ်ၸၢဝ်းၼပ်ႉထိုဝ်ၼၼ်ႉ ဢမ်ႇထုၵ်ႇလီလႆႈဢွၼ်ၵၼ်ၶိုၼ် ထဵင်ဝႆႉယူႇယဝ်ႉသႄႈ။ ၵူၺ်းၵႃႊ တေႃႇလွင်ႈဢၼ်ၼႆႉၼႆႉ ၸွင်ႇတင်းသဵင်ႈတင်းလၢႆၶဝ်ၼႆႉ တေဢွၼ်ၵၼ်ႁပ်ႉဢဝ်လႆႈ ၵၼ်ယူႇႁိုဝ် ဢၼ်ဝႃႈၼႆႉတႄႉ ဢဝ်တင်းတူဝ်ယၢင်ႇပိူင်တႅၵ်ႈ ဢၼ်ၵဝ်လၢတ်ႈမႃးမိူဝ်ႈၵႆႈၼၼ်ႉ ႁိူၵ်ႈၵိုၵ်းတူၺ်း သေယဝ်ႉ ပၢႆးယုမ်ႇဢဝ်ယေႈဢၼ် တၢင်းယုမ်ႇႁပ်ႉၸၢဝ်းၼပ်ႉထိုဝ်ယေႈၸၢဝ်းၼၼ်ႉၵေႃႈ ၸွင်ႇမၼ်းမီးတီႈပွင်ႇယူႇ ႁိုဝ် ဢမ်ႇမီး၊ ၸွင်ႇပဵၼ်လႆႈ ၽွၼ်းပၢင်ႈလီတေႉယူႇႁိုဝ် ဢမ်ႇပဵၼ်လႆႈ ၊ ၸွင်ႇႁႂ်ႈပဵၼ်လႆႈ လွင်ႈၵတ်းယဵၼ်ႊငိမ်းလီ တီႈၸႂ် လႆႈယူႇတေႉႁိုဝ် ဢမ်ႇလႆႈတေႉ ဢၼ်ဝႃႈၼၼ်ႉ ၶႂ်ႈႁႂ်ႈဢွၼ်ၵၼ်ၶႆႈၸႂ်တူၺ်းၵၼ် ၼၼ်ႉဢိူဝ်ႈ။ ပေႃးၶႂ်ႈလႆႈ တၢင်းၸိုဝ်ႈၸႂ်ႈယူႇတေႉၼႆ တၵ်းတေလႆႈပိုတ်ႇလႅင်းလူင်ႉလႅင်းဢိူဝ်ႈ။ တေလႆႈသိုဝ်ႈယူဝ်း (သိုဝ်ႈတူဝ်ႇ) ဢိူဝ်ႈလေႃႇ။ ပေႃးတင်းလွင်ႈဢိုတ်းတပ်ႉၶဝ်သေ တင်းလွင်ႈဢမ်ႇႁူမ်ႇလူမ်ႈၶဝ်သေၼႆတႄႉ တေဢမ်ႇၸၢင်ႊႁၼ်လႆႈတြႃးတၢင်းၸိုဝ်ႈ ၸႂ်ႈမၢၼ်ႇမႅၼ်ႈသင်သႄႈ”။

“ဢေႃႈၶႃႈမေႃသွၼ်”

“ပေႃးၶႂ်ႈသွၵ်ႈႁႃတေႃႇ လွင်ႈငမ်းယဵၼ် လႄႈ တြႃးၸိုဝ်ႈၸႂ်ႈပေႃးၼႆတႄႉ တေလႆႈဝႆႉလိုမ်းပႅတ်ႈ တေႃႇႁူဝ် ၶေႃႈလူင်ဢၼ်ၼိူင်ႈ ဢၼ်သုမ်ႇငမ်းဝႆႉ ဢၼ်လူင်ႈၼႃႈသေယုမ်ႇဢဝ်ဝႆႉ ႁပ်ႉဝႆႉၼၼ်ႉ ၸိူဝ်းၼၼ်ႉ ၵမ်းၼိူင်ႈသေ ယဝ်ႉ တေလႆႈႁတ်းႁပ်ႉဢဝ်လႆႈ တၢင်းဝူၼ်ႉၶွပ်ႈၶႆႈၸႂ် ဢၼ်တူၵ်းမႅၼ်ႈတင်းထမ်းတြႃးပိူင်ၽဵၼ်ႈၼၼ်ႉဢိူဝ်ႈ။ တေလႆႈ ႁတ်းႁပ်ႉတေႃႇယူႇဢိူဝ်ႈ။ ပေႃးယဝ်ႉၸင်ႇ လွင်ႈပိူင်ၽဵၼ်ႈ ဢၼ်ထုၵ်ႇတင်းတြႃး ဢၼ်ႁႃႁၼ်လႆႈမႃးၸိူဝ်းၼၼ်ႉ ၸွင်ႇမၼ်းၶဝ်ႈထုၵ်ႇၵၼ်တင်း ၸၢဝ်းၼပ်ႉထိုဝ်ဢၼ်တူဝ်ၵဝ်ႇဢဝ်ဝႆႉၼၼ်ႉလႄႈသင်၊ ပၢႆးၵၢၼ်မိူင်း ဢၼ်ႁပ်ႉဢဝ်ဝႆႉ ၼၼ်ႉလႂ် ၶဝ်ငမ်ႇၵၼ်ၵႃႊႁိုဝ်၊ မီးတီႈပွင်ႇယူႇတေႃႇထၢၼ်ႈလႂ်ၼႆသေ ထတ်းသၢင်ႁိဝ်ႈၸင်ႊလႆႈယဝ်ႉလေႃႇ။

ဢၼ်ဝႃႈ ယူႇၸင်ႇၼႆႉၼႆႉ ၵွပ်ႈဢဝ်ပၢႆးၾၢႆႇၼပ်ႉထိုဝ် ပဵၼ်ပိူင်လူင်သေ လၢတ်ႈယူႇလႄႈ ယႃႇလုပ်ႈလၢပ်ႈလွမ်ႉလႅမ်ႉသေဝႃႈသႂ်ႇ- ပၢႆးၸၢဝ်းၼပ်ႉထိုဝ်ၵူႊဢၼ်ဢၼ်ၼႆႉ ၸွမ်းၼင်ႇတၢင်းယုမ်ႇယမ်ၽႂ်မၼ်းသေ ပဵၼ်ဢၼ်လီၵၼ်သဵင်ႈသဵင်ႈယဝ်ႉၼႆ ၼႃႈ။ ယႃႇဢဝ်တင်းသဵင်ႈသဵင်ႈမႃးလေႃးလႄးသႂ်ႇ တၢင်းႁၼ်ဢၼ်ဝႃႈလီသေ သမ်ႉဢမ်ႇလဵပ်ႈႁဵၼ်းတႅတ်ႈတႅတ်ႈ၊ တေလႆႈႁဵၼ်းႁႃ ႁႂ်ႈႁၼ်လႆႈတေႃႇတၢင်းႁၼ်ၼၼ်ႉၵွၼ်ႇဢိူဝ်ႈ။ တီႈၵူၼ်းၶူင်းၵၢင်ႁဝ်းၵူႊၵေႃႉၵေႃႉၼႆႉ လွင်ႈဢၼ်ၼႆႉ ထုၵ်ႇလႆႈၶဝ်ႈပႃးသေ ပဵၼ်ဝႆႉၼင်ႇသုၼ်ႇလႆႈသုၼ်ႇပဵၼ်လူင်ဢၼ်ၼိူင်ႈ ယူႇဢိူဝ်ႈ။ တီႈဢၼ်ဝႃႈ တႃႇငမ်းယဵၼ်ၼၼ်ႉ ၼႆၵေႃႈ ၵေႃႉၼိူင်ႈတင်းၵေႃႉၼိူင်ႈ၊ ၸုမ်းၼိူင်ႈတင်းၸုမ်းၼိူင်ႈ၊ ၸၢဝ်းၽႃႇသႃႇ ဢၼ်ၼိူင်ႈတင်းဢၼ်ၼိူင်ႈၶဝ်ၼႆႉ ယွၼ်ႉၵွပ်ႈဢဝ်ပိူင်သၢင်ႇလူင်ပွင်ႊၸိုင်ႈသိုၵ်းသေ ဢုပ်ႉၽွင်းပေႉဝႆႉလႆႈလႄႈ လႆႈထၢင်ႇႁၼ်ဝႃႈ မီးတၢင်းငမ်းယဵၼ်ဝႆႉ ယူႇၼႆၼၼ်ႉ မဵဝ်းသၢင်ႇၼင်ႇၼႆၼႆႉ တၵ်းတေဢမ်ႇလႆႈပဵၼ်။ တၢင်းငမ်းငဝ်းထၢင်ႇထိူမ်လႄႈ လွင်ႈဢမ်ႇထုၵ်ႇမႅၼ်ႈၸႂ် ၶဝ်လႂ်၊ တြႃး တၢင်းပႅၼ်းၸင်းဝႆႉတီႈၼႂ်းႁူဝ်ၸႂ် ၶဝ်လႂ်ၸိူဝ်းၼၼ်ႉ ထုၵ်ႇႁႂ်ႈပဵၼ်လႆႈတေႃႇ ထၢၼ်ႈပေႃးပၢႆႇပႅတ်ႈလႆႈ ၶဝ်ၼၼ်ႉလႂ်၊ တေႃႇႁႂ်ႈပဵၼ်ဢွၵ်ႇလႆႈ တၢင်းၸိုဝ်ႈၸႂ်ႈ တင်းထၢင်ႇၸႅင်ႈလီၼၼ်ႉလႂ်၊ တေလႆႈႁတ်းသေႃႉသွၵ်ႈႁႃ တေလႆႈႁတ်းတေႃႇၼႃႈၵၼ်၊ ႁတ်းငၢၼ်တႃႇဢုပ်ႇၵုမ်တိူင်ႇပၢင်ႇၵၼ်လႆႈၵွၼ်ႇဢိူဝ်ႈ။ ယႃႇၵွၺ်းမႃးၸႂ်ႉတိုဝ်းၶေႃႈၵႂၢမ်း ႁၢင်ႊလီဢွၼ်ႇၶဝ်သေယဝ်ႉ သမ်ႉၽေႈတိူၼ်း တၢင်းပႅၼ်းၸင်းၵၼ်ယူႇဝႆႉၼၼ်ႉလႄႈ။ တႃႉႁဝ်းၶဝ်ဢွၼ်ၵၼ်ပႂ်ႉပႃး ၵႂၢၼ်းထိင်းသူပ်းသဵင်ႁဝ်းၶဝ်လႄႈၼေႃႈ။ ၼႆသေ ၼႆသေယဝ်ႉ တေၸၢင်ႊလႆႈငမ်းယဵၼ်မႃးယူႇ။ မွၵ်ႈၼႆႉၵေႃႈ တဵမ်ထူၼ်ႈဝႆႉယူႇယဝ်ႉၼႆသေ ပေႃးထၢင်ႇႁၼ်ဝႆႉၼင်ႇၼႆတႄႉ တေဢွၼ်ၽိတ်းသဵင်ႈသဵင်ႈ ယူႇယဝ်ႉဢိူဝ်ႈ။ ပေႃးၼႂ်းၸႂ် တိုၵ်ႉမူမ်ႇပႅင်းဝႆႉၸႂ်တၢင်းငမ်းငဝ်းသွင်သၢႆၼႆ တေပႆႇၸၢင်ႊႁၼ်လႆႈတၢင်းၸိုဝ်ႈၸႂ်ႈမၢၼ်ႇမႅၼ်ႈလႄႈ ႁူႉတေသိုပ်ႇၶၢဝ်း တၢင်းၼႃႈၵႂႃႇ တင်းတြႃးဢၼ်ပႅၼ်းၸင်းၵွၺ်းယူႇယဝ်ႉ။ မိူဝ်ႈလႂ်သေၵေႃႈ တေဢမ်ႇၸၢင်ႊငမ်းယဵၼ်လႆႈယဝ်ႉသႄႈ။ ဢဝ်တၢင်းႁၼ်ၵဝ်သေ လၢတ်ႈဢိူဝ်ႈၼႃႈ။ မႂ်းၶႂ်ႈႁပ်ႉ ၸင်ႇႁပ်ႉၼႃႈ။ ၵႃႊယင်းပႆႇႁူႉတေႃႇတြႃးၸိုဝ်ႈၸႂ်ႈသေ ဢမ်ႇပႆႇ သွၵ်ႈႁႃသေ ယင်းပႆႇႁၼ်သေ ဢၼ်ဝႃႈႁႂ်ႈပႂ်ႉပႃးသူပ်းသဵင်ၼၼ်ႉၵေႃႈ တေလႆႈတႃႇၵမ်းဢွၼ်ႇၼိူင်ႈ ၵွၺ်းယဝ်ႉ။ ပေႃးဢမ်ႇသၢင်ႇတေႃႇမႃး လွင်ႈဢၼ်ဢမ်ႇပွင်ႇၸႂ်လူင်ႉလႅင်းၼၼ်ႉ ၶႅင်ယႂ်ႇပဵၼ်ၵွၼ်ႈပဵၼ်တုမ်မႃးၼႆၵေႃႈ ယင်းတေၸၢင်ႊပဵၼ် လႆႈၵွၼ်ႇ ယဝ်ႉဢိူဝ်ႈ”

“ၸႂ်ႈၶႃႈယဝ်ႉ မေႃသွၼ်။ ယွၼ်ႉၵွပ်ႈလွင်ႈႁၢၼ်ႉၸႂ်ပဵင်းပေႃးသေ ယဝ်ႉတူဝ်ႈၵႂႃႇဢမ်ႇၸႂ်ႈလႄႈ၊ ယွၼ်ႉၵွပ်ႈလွင်ႈ ဢႆႈၼႃႈ (ဢႃးၼႃႇ) ၵၼ်သေ၊ ၵွပ်ႈလႆႈၵူဝ်ယူႇလႄႈၼၼ်ႉသေ ဢမ်ႇၼၼ်ၵေႃႈ ၵွပ်ႈ လွင်ႈတၢင်းသိူဝ်ႇပိုၼ်ႉတၢင်ႇၸိူဝ်း ၶဝ် သေဢၼ်ဢၼ်ယဝ်ႉသေၵေႃႈ လႆႈယိူၼ်ႉၵၼ်ႈဢူတ်းသီးဝႆႉပၼ်ၸိူဝ်းၼႆႉၼႆႉ မၼ်းပႆႇပဵၼ်လႆႈလၢႆးၵေႈလိတ်ႈတေႃႇ တၢင်းၶွင်ႈၶမ် ဢၼ်ၸိုဝ်ႈၸႂ်ႈတဵမ်ထူၼ်ႈလီၼၼ်ႉ တေႉသႄႈ။ ဝႃႈတေႉၵေႃႈ သဵၼ်ႈတၢင်းတႃႇလွင်ႈငမ်းယဵၼ် ဢၼ် ၸိုဝ်ႈၸႂ်ႈ ပႆႇၸႂ်ႈၵွၼ်ႇသႄႈ။

“ဢိူဝ်ႈ။ ပေႃးဝႃႈလႆႈမီးမႃးၽွၼ်းပၢင်ႈလီ ဢၼ်ၼိူင်ႈယဝ်ႉၼႆတႄႉ လွင်ႈငိူၼ်ႈယွၼ်ႉတၢင်းမၼ်း ဢၼ်တေႉၼႆႉ ပဵၼ်သင်ၼႆတႄႉ တေလႆႈဢွၼ်ၵၼ်သွၵ်ႈတူၺ်းၼၼ်ႉၼႃႇ။ လွင်ႈတၢင်းဢၼ်သွၵ်ႈႁႃၵႂႃႇၼၼ်ႉၼႆၵေႃႈ တေလႆႈပဵၼ် ဢၼ်ၸၢင်ႊမူၼ်ႉမႄးလႅၵ်ႈလၢႆႈပၼ်လႆႈတေႃႇ တြႃးၽွၼ်းပၢင်ႈၼမ်ႉတွၼ်း ၽွၼ်းလႆႈမၼ်းတေႉတေႉၼၼ်ႉ ၵွၼ်ႇ ဢိူဝ်ႈ။ ပေႃးၼႆၸင်ႇ ယႃႈယႃတၢင်းၸဵပ်းတၢင်းပဵၼ် တေမႃးငၢမ်ႇၵၼ်လီၼၼ်ႉၼႃႇ။ ပေႃးဢမ်ႇၼၼ်တႄႉ ႁူမ်ႊဝႃႈ လႆႈဢဝ်တၢင်းၸႂ်ၽႂ်ႇလီ (ၸေႇတၼႃႇ) သေ ႁဵတ်းယူႇၼႆၵေႃႈ ပေႃးတၵ်းဝႃႈ ဢမ်ႇပႃးတင်းပၺ်ႇၺႃႇ (တၢင်းႁူႉ မေႃ) ၼႆတႄႉ တေၸၢင်ႊပလၢတ်ႈပိူင်ႈ ၵႂႃႇထႅၵ်ႈၵွၼ်ႇဢိူဝ်ႈ။”

“ဢေႃႈၶႃႈ မေႃသွၼ်”။ ၼႆသေ တင်းၶိုၼ်းတွပ်ႇၵေႈသေၵေႃႈ ၵဝ်ၶႃႈပဵၼ်ယၵ်ႉတူၺ်းၵႂႃႇတၢင်းမူင်းယၢမ်း ဢေႃႈ။ မေႃသွၼ်ၵေႃႉဢၼ်မီးတၢင်းသႅတ်း(လႅဝ်ႈ)ၼႃႇၼၼ်ႉၵေႃႈ ၸင်ႇထၢမ်မႃးဝႃႈ “ၸွင်ႇမႂ်းမီးတၢင်းၵႂႃႇ”ၼႆယဝ်ႉ။ ၵဝ်ၶႃႈၵေႃႈ -

“ဢေႃႈၶႃႈမေႃသွၼ်၊ မိူဝ်ႈၼႆႉ လႆႈမီးလွင်ႈဢွၼ်ႇသဵၼ်း(ၶဵၼ်း) ၵၼ်ဝႆႉ တင်းတႆးၵေႃႉၵေႃႉၼိူင်ႈ ဢၼ်တေပွၵ်ႈ ၶိုၼ်းတၢင်းမိူင်းႁဝ်းလႄႈ” ႁူႉဝႃႈၼႆၵေႃႈ၊ မေႃသွၼ်သမ်ႉ “ဢိူဝ်ႈ ပေႃးမီးလွင်ႈတၢင်းဢၼ်လိူင်ႈယႂ်ႇတႄႉ ဢမ်ႇတၢပ်ႈလႆႈဢႆႈတေႃႇၵၼ်သင်။ ၵမ်ႉမႃးသမ်ႉ ပဵၼ်ၵႂႃႇတူၵ်း လိုၼ်းပႅတ်ႈဝႃႈ၊ ဢမ်ႇလႆႈထူပ်းသေ သႃႊတၢင်းၵၼ်ၵႂႃႇပေႃးၼႆတႄႉ ၸွင်ႇတေဢမ်ႇတိူဝ်းယၢၵ်ႈယဝ်ႉႁိုဝ်လႃႇ။ တွင်းဝႆႉ လႄႈ ဢၢႆႈႁိူၺ်း၊ ဢၼ်လႂ်တိူဝ်းလမ်ႇလွင်ႈၵေႃႈ လႆႈႁဵတ်းဢၼ်ၼၼ်ႉဢွၼ်တၢင်းဢိူဝ်ႈ။ တီႈၵူႊလွင်ႈလွင်ႈၼႆႉ တေလႆႈပွင်ႇၸႂ်ၸွမ်းတေႃႇ တၢင်းဢၼ်လဵၵ်ႉဢၼ်ယႂ်ႇမၼ်း၊ တၢင်းဢၼ်ၼႃဢၼ်ႁဵမ် (ဢၼ်မၢင်ႊ) မၼ်းဢိူဝ်ႈ၊ ၸိူဝ်း ၵူၼ်းၼုမ်ႇသူၵွၺ်း ဢွၼ်ၵၼ်လၢတ်ႈယူႇဢမ်ႇ ၸႂ်ႈႁိုဝ် - ဢၢႆႈ”

“ၸႂ်ႈၶႃႈဢေႃႈ မေႃသွၼ်”

“ဢိူဝ်ႈလီယဝ်ႉ တႃႇမိူဝ်ႈၼႆႉတႄႉ တွၼ်ႊတႃႇလူပ်းသၢႆၵႂၢမ်းလၢတ်ႈႁႃးၼႆႉတႄႉ တီႈၵူႊလွင်ႈလွင်ႈၼႆႉ ပေႃးဝႃႈ သုၼ်ႇလႆႈသုၼ်ႇပဵၼ် ဢၼ်တႅမ်ႇထီႈသုတ်းတႃႇၵူၼ်းႁဝ်း (ၼင်ႇသုၼ်ႇၶႆႈၸႂ်ထတ်းသၢင်လႆႈ တင်းႁင်းတူဝ်ၸႂ်ၸဝ်ႈ ၵဝ်ႇ၊ သုၼ်ႇပိုတ်ႇလႅင်းပၢၵ်ႈဢွၵ်ႇလႆႈ တင်းၺၢၼ်ႇတူဝ်ၵဝ်ႇ ပၢႆးဝူၼ်ႉႁၼ်တူဝ်ၵဝ်ႇ) ယင်းပႆႇပၼ်ထိုင်လႆႈၵွၼ်ႇ ၼႆတႄႉ ၶႂ်ႈပဵၼ်ၾိင်ႈတႅၵ်ႈပၢႆးဝူၼ်ႉႁၼ်လူင် လိူင်ႈလႂ်လွင်ႈလႂ် ၵေႃႈလီ၊ ၶႂ်ႈပဵၼ်လွင်ႈတၢင်းမဵဝ်းၸိူဝ်ႉၼင်ႇႁိုဝ် ၵေႃႈလၢႆး တႃႇတေ ယိုၼ်းထိုင်တၢႆးၶိုတ်းလႆႈတေႃႇတြႃးၸိုဝ်ႈၸႂ်ႈမၢၼ်ႇမႅၼ်ႈဢၼ်ဝႃႈၼၼ်ႉ တိုၵ်ႉတေယၢပ်ႇယၢၵ်ႈဝႆႉယူႇ။ ယႃႇဝႃႈတေတုၵ်း ယွၼ်းဢဝ်သုၼ်ႇလႆႈသုၼ်ႇပဵၼ် ဢၼ်ၸိူဝ်းသုင်ၶိုၵ်ႉလူင်ၸိူဝ်းၼၼ်ႉၵွၼ်ႇလႃႈ၊ တေႃႈသုၼ်ႇလႆႈသုၼ်ႇပဵၼ်ငဝ်ႈပိုၼ်ႉ ထၢၼ်ႈတမ်ႇဢွၼ်ႇၶဝ်ၵွၺ်းၵေႃႈ ပေႃးလႆႈၵၼ်ယဝ်ႉယဝ်ႉႁိုဝ် ၼႆ ထုၵ်ႇလီလႆႈဝူၼ်ႉၶႆႈတူၺ်း ႁႂ်ႈႁၼ်သေၵွၼ်ႇဢိူဝ်ႈ ၼေႃႈ။ ယဝ်ႉၵေႃႈ ပေႃးဝႃႈ ၶႂ်ႈဢွၼ်ၵၼ် ယုမ်ႇယမ်ၵိူဝ်းဢိင်လႆႈလွတ်ႈလွတ်ႈလႅဝ်းလႅဝ်း၊ ၶႂ်ႈႁႂ်ႈယုမ်ႇဢဝ် လႆႈယူႇပေႃး ဝႃႈၼႆတႄႉ တီႈၸၢဝ်းၼပ်ႉထိုဝ်ၵူႊဢၼ်ဢၼ်ၼၼ်ႉ တၵ်းတေလႆႈပၼ်ဝႆႉထႃႈ သုၼ်ႇထတ်းသၢင် ထွင်ထွင်ႈ တူၺ်းလႄႈ သုၼ်ႇဝူၼ်ႉၶွပ်ႈလႆႈလွတ်ႈလွတ်ႈလႅဝ်းလႅဝ်း ဢွၼ်တၢင်းၵွၼ်ႇဢိူဝ်ႈ။ ပေႃးၼႆ ၸင်ႇတေၸၢင်ႊမီးလႆႈ တီႈပွင်ႇမၼ်းလီယဝ်ႉလေႃႇ။ ယဝ်ႉသမ်ႉ ၼင်ႇႁိုဝ်ပေႃးတေဢမ်ႇပဵၼ်တၢင်းၶွင်ႉၶမ် (ၽိတ်းမေႃး) တေႃႇၵၼ်ၼၼ်ႉ၊ တႃႇ ႁႂ်ႈလႆႈပဵၼ်ငမ်းယဵၼ်ၼၼ်ႉၵေႃႈ တေလႆႈမီးပၼ်ထၢတ်ႈၸႂ် ဢၼ်ၶႂ်ႈသေႃႉသွၵ်ႈႁႃတေႃႇတြႃးၸိုဝ်ႈၸႂ်ႈဢိူဝ်ႈ၊ တေလႆႈမီး လွင်ႈသိုဝ်ႈယူဝ်း (သိုဝ်ႈတူဝ်ႇ)ဢိူဝ်ႈ။ တၢင်းႁူႉၺၢၼ်ႇ ပၺ်ႇၺႃႇ ဢၼ်ၸၢင်ႊၶႆႈၸႂ်ဝူၼ်ႉႁၼ်ထိုင်လႆႈ ၼင်ႇတြႃးပိူင်ၽဵၼ်ႈ ၼၼ်ႉၵေႃႈ တၵ်းတေလႆႈမီးပၼ်ၵွၼ်ႇယူႇဢိူဝ်ႈ။ ပေႃးတင်းဝႃႈ ဢၼ်ၸိူဝ်းဢွၼ်ႇၼႆႉၵွၺ်း တေႃႇတင်းပႆႇလႆႈၵၼ်၊ ပႆႇမီးမိူၼ်ၵၼ် ပႆႇတဵမ်ထူၼ်ႈၸုမ်ႇၵူႈၵၼ် ၼႆတႄႉ၊ ၶႂ်ႈၵႂႃႇတုၵ်းယွၼ်း ႁႂ်ႈလႆႈဢီႈသင်လူင်ၵေႃႈယဝ်ႉ ၵွပ်ႈယင်းပႆႇမီးၸႂ် တႃႇၶႂ်ႈတေႃႇၼႃႈၵၼ်တင်းတြႃးၸိုဝ်ႈၸႂ်ႈမၢၼ်ႇမႅၼ်ႈလႄႈ မၼ်းမိူၼ်ၵၼ်တင်းဢၼ်ၶိုၼ်းထဵင်တေႃႇ တၢင်းတေၶၼ်ႇ တူၺ်းတီႈႁိၼ်မၢတ်ႇၵႂၢတ်ႇၸၢမ်း(ၶမ်း) ၼၼ်ႉၼင်ႇၵၼ်ယဝ်ႉ။ ဢၼ်ၵဝ်ဝၵ်ႉၵမ်ဝႆႉၼႆႉၸင်ႇ ပဵၼ်ၶမ်းဝႃႈပဵၼ်ၶမ်း တေႉတေႉဝႆႉၼၼ်ႉ ယဝ်ႉဢိူဝ်ႈ၊ တေပဵၼ်ဢၼ်ႁဵတ်းၵႅင်ႈသၢင်ႇၼႃႈသၢင်ႇတႃ ၵမ်ႉထႅမ်ၵႅမ်ပၼ် မွၼ်ႁႂ်ႈတိူဝ်းၼင်ႈလီ ပဵၼ်ယုမ်ႈဢူၼ်ႈဢွၼ်ႇဝႆႉယူႇၵွၼ်ႇယဝ်ႉဢိူဝ်ႈ၊ တၢင်းၶွင်ႉၶမ် (ႁဵတ်းၶဵၼ်ၵၼ်) ဢၼ်ဝႃႈၼႆႉၵေႃႈ ႁူႉတေမီးဝႆႉယူႇၵွၼ်ႇ ယဝ်ႉဢိူဝ်ႈ။ ၽိူဝ်ႇတႃႉတေဢဝ်တင်းၶေႃႈၵႂၢမ်းလႅၵ်ႈလၢႆႊဢွၼ်ႇ ႁူမ်ႈပႃးတင်းပိူင်သၢင်ႇႁၢင်ႊၽိဝ်ၽၢႆႇၼွၵ်ႈသေ ၸႂ်ႉတိုဝ်း ဝႆႉၼၼ်ႉ တေလႆႈသွၵ်ႈႁႃဢဝ်တြႃး ယွၼ်ႉလွင်ႈယွၼ်ႉတၢင်းဢၼ်ၸိုဝ်ႈၸႂ်ႈတေႉ ဢၼ်ၸိူဝ်းတေမီးပဵၼ်ၽွၼ်းပၢင်ႈ လီ ဢၼ်တေပၼ်လႆႈ တႃႇပဵၼ်လွၼ်ႉမွၼ်းသၢႆဝၢၼ်ဢၼ်တေႉ ဢၼ်ၸိုဝ်ႈၸႂ်ႈၸိူဝ်းၼၼ်ႉသေယဝ်ႉ ပိူင်လူင်မၼ်း လိူင်ႈယႂ်ႇမၼ်း ပဵၼ်တႃႇႁပ်ႉဢဝ်ၸႂ်ႉတိုဝ်းလႆႈၼၼ်ႉ ၵွၺ်းယဝ်ႉ။ ပေႃးတၵ်းဝႃႈ ယင်းပႆႇၶႂ်ႈၶႆႈႁႃ ပႆႇၶႂ်ႈႁဵတ်းတင်း လွင်ႈတၢင်းငဝ်ႈတိုၼ်းၸိုဝ်ႈၸႂ်ႈၸိူဝ်းၼႆႉၵွၼ်ႇၼႆတႄႉ တႃႇတေလႆႈလႆႈတၢင်းၸိုဝ်ႈၸႂ်ႈဢၼ်ပဵၼ်ငဝ်ႈတိုၼ်း ၽွၼ်း ပၢင်ႈလီၼၼ်ႉၵေႃႈ ဢမ်ႇတပ်ႈလီလႆႈမုင်ႈမွင်းတႂ်းတေႃႇမၼ်းဝႆႉယူႇယဝ်ႉၼႆ တွင်းဝႆႉလႃႈ ဢၢႆႈဢိူၺ်။ လီယဝ်ႉ လီယဝ်ႉ ဢၼ်မီးဝႆႉတႃႇၵႂႃႇတႃႇပႆၼၼ်ႉၵေႃႈ ၵႂႃႇသေၵွၼ်ႇလႃႈ။ ယူဝ်တူၵ်းလိုၼ်း ပႅတ်ႈဢိူဝ်ႈၼႃႈ” “ဢေႃႈၶႃႈမေႃသွၼ်” ၼႆသေ တင်းတူင်ႉတၵ်ႉသေယဝ်ႉၵေႃႈ တႃႇတေႁူပ်ႉထူပ်းတင်းတႆးၵေႃႉ ဢၼ်လႆႈသဵၼ်း (ၶဵၼ်း)ၵၼ်ဝႆႉၼၼ်ႉ ၸင်ႇလႆႈဝၢႆႇပွၵ်ႈဢွၵ်ႇႁိူၼ်းမေႃသွၼ်မႃးယူႇယဝ်ႉဢိူဝ်ႈ။

(တင်းဝူၼ်ႉၶွပ်ႈၶႆႈၸႂ်ပႃးပၼ်တႃႇၶိူဝ်းတႆး၊ ၵူၼ်းတႆးဢွၼ်ႇၶဝ်သေ)

လုင်းၸၢႆးၾႃႈ (ၵဵပ်းႁွမ်တွမ်ႊတႅမ်ႈဝႆႉ)

(႑႓:႕႕) (ၵၢၼ်း) ႒႐.႐႗.႒႐႒႑ (လ.တ.လ - တ.လ.ၽ) (႖) (ယႃႈယႃၽီ - လီလႅမ်ႉတူၺ်း - တႆးၸိူဝ်းဢုပ်ႇလိုမ်းႁူႉတူဝ် ၵူဝ်ၶိူဝ်းႁၢႆ ၊ လႆႈတႅမ်ႈဝႆႉ)

← လိုၼ်း · လမ်းၼႂ်း · ထႅင်ႈ →