လိၵ်ႈပိုတ်ႇပၼ်ပိုၼ်ႉႁူႉ မၢႆသၢမ်/လိူၺ်ႈ ပုၼ်ႈၽွၼ်း

ၵပ်းၵၢႆႇလူၺ်ႈၶေႃႈတူဝ်ၵႂၢမ်းဢၼ်ဝႃႈ ပုၼ်ႈၽွၼ်း ၊ ပုၼ်ႈၽွၼ်းသူၼ်ႇ(တူၼ်)ၵေႃႉ (personal Accountability) သေ ၶႂ်ႈသိုပ်ႇလၢတ်ႈၼေပၼ်ထႅင်ႈၼင်ႇၼႆၽွင်ႈယူႇ။ ၵွပ်ႈယုမ်ႇယမ်တၢင်းႁၼ်ဝႆႉဝႃႈ တေၸၢင်ႊပဵၼ် ၽွၼ်းလီ တႃႇၵူၼ်းၼုမ်ႇႁဝ်း ၊ တႃႇၶိူဝ်းႁဝ်း ၊တႃႇမိူင်းႁဝ်း ၼႂ်းဝၼ်းမိူဝ်းၼႃႈလႆႈယူႇၽွင်ႈဝႆႉဢိူဝ်ႈ။

           ပုၼ်ႈၽွၼ်းဢၼ်ဝႃႈၼႆႉ ၸၢင်ႊပွင်ႇႁၼ်လႆႈဝႃႈ မီးယူႇတၢင်းဢဝ်ပုၼ်ႈၽွၼ်း တၢင်းႁူႉတေႃႇပုၼ်ႈၽွၼ်း လႄႈ တၢင်းၸင်ႈႁပ်ႉပဝ်ႊတေႃႇပုၼ်ႈၽွၼ်းလႂ်ၶဝ်ယဝ်ႉ။ တၢင်းဢဝ်ပုၼ်ႈၽွၼ်းတင်း တၢင်းႁပ်ႉဢဝ်ပုၼ်ႈၽွၼ်းၼႆႉ ၶႂ်ႈငၢႆး မိူၼ်ၵၼ်သေယဝ်ႉ။ ပုၼ်ႈၽွၼ်းၼႆႉ မၼ်းၵပ်းၵၢႆႇဝႆႉတင်း တၢင်းၵွင်ႉၵၢႆႇၼၼ်ႉဝႆႉဢိူဝ်ႈ။ ၵွပ်ႈၼႆသေ မေႃသွၼ်ႁဝ်း ၶႃႈတႄႉ ယၢမ်ႈပွၼ်ႈသင်ႇမႃးဝႃႈ “လွင်ႈလႂ်သေဢမ်ႇဝႃႈ မၼ်းဢမ်ႇၵွင်ႉၵၢႆႇတင်းၵဝ်ၼႆ ဢမ်ႇၶႂ်ႈႁႂ်ႈဝူၼ်ႉ မႅၼ်ႈၼင်ႇ ၼၼ်” ၼႆယဝ်ႉ။ တူဝ်ယၢင်ႇမၼ်း ၸိူဝ်းပဵၼ်ယူႇႁိမ်းႁွမ်းတူဝ်ၵဝ်ႇၼၼ်ႉ ၊ ၼင်ႇဢၼ်ဝႃႈ ယုၵ်းယၢၵ်း ယုပ်းယၢပ်း ပႅတ်ႈတူၵ်းဝႆႉၼၼ်ႉ ၼႆလႃႈ။ ဢၼ်ပႅတ်ႈဝႆႉၼၼ်ႉ၊ ယုၵ်းယၢၵ်းၼၼ်ႉ၊ ၼမ်ႉပူႉထူမ်ႇၼၼ်ႉ၊ ထူင်ယၢင်ႊၼၼ်ႉ တႄႇ ၸိူဝ်းၼႆႉၵႃႇ၊ ၵွပ်ႈဢမ်ႇၸႂ်ႈၵဝ်ႁဵတ်းလႄႈ ၊ မၼ်းဢမ်ႇၵွင်ႉၵၢႆႇတင်းၵဝ်ၼႆသေ ယႃႇယူႇပႅတ်ႈၵႂႃႇတင်းၸလိူဝ်ႈၸလႃႈ သေယဝ်ႉ။ တေလႆႈဝႆႉဝၢၼ်းၸႂ်ဝႃႈ “ၵၢၼ်ၸိူဝ်းတီႈႁိမ်းႁွမ်း သိုင်ႇဝႅတ်ႉလွမ်ႉၵဝ်ၼႆႉ ယွၼ်ႉမီးဝႆႉတီႈႁိမ်းႁွမ်းၵဝ် ယူႇယဝ်ႉလႄႈ တိုၼ်းဝႃႈၵွင်ႉၵၢႆႇဝႆႉတင်းၵဝ်ဢိူဝ်ႈ။ တေလႆႈဢွၼ်ၵၼ် ၶဝ်ႈပႃးႁဵတ်းသၢင်ႈ တၢမ်တူဝ်ၸွမ်းဢိူဝ်ႈ ၼႆသေ တေလႆႈဢွၼ်ၵၼ်ဝႆႉဝၢၼ်းထၢတ်ႈၸႂ်၊ လၢႆးဝႆႉဝၢင်းၸႂ် မဵဝ်းၼင်ႇၼႆယူႇဢိူဝ်ႈ။ ထၢတ်ႈၸႂ်ဝႆႉဝၢၼ်းၸိူဝ်ႉၼင်ႇၼႆၼႆႉ ၵွင်ႉၵၢႆႇၵပ်းတေႃႇဝႆႉတင်း လွင်ႈမေႃဢဝ်ပုၼ်ႈၽွၼ်း ၊ လွင်ႈႁူႉတေႃႇပုၼ်ႈၽွၼ်း လႄႈ လွင်ႈၸင်ႈႁပ်ႉပဝ်ႊတေႃႇ ပုၼ်ႈၽွၼ်းၸိူဝ်းၼႆႉ ဝႆႉယူႇယဝ်ႉ။

           ပေႃးႁဝ်းတၢၼ်ႈၶႆႊ(လၢတ်ႈၵႂၢမ်း) ၼႆၵေႃႈ ၸိူဝ်းတၢင်ႇၵေႃႉၶဝ် ၸၢင်ႊမီးၶေႃႈထၢမ်မႃးဢိူဝ်ႈ။ ၶေႃႈထၢမ်ၸိူဝ်း ၼၼ်ႉ ပေႃးဝႃႈဢမ်ႇတွပ်ႇၸႅင်ႈပၼ်လႆႈၼႆ လႆႈဝႃႈပုၼ်ႈၽွၼ်း(လၢတ်ႈၼေ) ၼၼ်ႉ ဢမ်ႇယဝ်ႉတူဝ်ႈ။ ဢမ်ႇသၢင်ႈယဝ်ႉ ပုၼ်ႈၽွၼ်းၼၼ်ႉၵွၼ်ႇၼႆ ဝႃႈလႆႈယဝ်ႉ။ ပေႃးၶႂ်ႈလႆႈတၢင်းယုမ်ႇယမ်ၼႆ ၵူၼ်းၵေႃႉၼိူင်ႈၼႆႉ တၵ်းတေလႆႈမေႃယူႇသဝ်း ႁႂ်ႈၵိုင်ႇထိူၵ်ႈတေႃႇတၢင်းယုမ်ႇယမ်ၼၼ်ႉၵွၼ်ႇဢိူဝ်ႈ။ ပွင်ႇဝႃႈ တၵ်းတေလႆႈပဵၼ် ၽူႈၵေႃႉၵူၼ်း ဢၼ်တိုၼ်းဝႃႈ ၸၢင်ႊ ဢဝ်ပုၼ်ႈၽွၼ်းလႆႈတေႃႇ တၢင်းႁဵတ်းသၢင်ႈတူဝ်ၵဝ်ႇၼၼ်ႉဢိူဝ်ႈ။ ႁႂ်ႈပဵၼ်လႆႈၼင်ႇၼၼ်ၼၼ်ႉၵေႃႈ တေလႆႈၽိုၵ်း သၢင်ႈ ႁႂ်ႈပဵၼ်လႆႈသေဢိူဝ်ႈ။ ၼႂ်းလူၵ်ႈၶူင်းလူင်ၼႆႉ ၽူႈၵေႃႉၵူၼ်းဢၼ်ဝႃႈ တဵမ်ထူၼ်ႈၸုမ်ႇၵူႈသဵင်ႈယဝ်ႉ ဢၼ်ဝႃႈ ၼၼ်ႉ ဢမ်ႇမီးသႄႈ။ ၵွပ်ႈၼႆသေ  ၵေႃႉၵူၼ်းဢၼ်ဝႃႈ ဢမ်ႇႁွၼ်ႇတွၼ်ႉႁဵတ်းၽိတ်း ဢၼ်ဝႃႈၼၼ်ႉၵေႃႈ ၸင်ႇဢမ်ႇမီး ၼၼ်ႉယဝ်ႉ။ ၵူၼ်းႁဝ်းၼႆႉ ၸၢင်ႊမီးလႆႈ လွင်ႈၽႂ်တၢင်းမၼ်း၊ ၸၢင်ႊမီးမႃးလွင်ႈၼေလွင်ႈၼေတၢင်းယူႇဢိူဝ်ႈ။ ယဝ်ႉၵေႃႈ တေႃႇလွင်ႈဢမ်ႇၸၢင်ႊႁဵတ်းလႆႈ ၸိူဝ်းၼၼ်ႉၵေႃႈ ၸၢင်ႊလၢတ်ႈၵူႊမဵဝ်းမဵဝ်းယူႇယဝ်ႉ။ လၢတ်ႈသေယဝ်ႉ သမ်ႉဢဝ် ၼိဝ်ႉမိုဝ်းၸီႉတေႃႇ တၢင်းၽိတ်းဢၼ်ပိူၼ်ႈၽိတ်းၼၼ်ႉဢိူဝ်ႈ။ ပိူဝ်ႈၼႆ ယႃႇပေဢဝ်ၼိဝ်ႉမိုဝ်းၸီႉတေႃႇပိူၼ်ႈ သေ လၢတ်ႈယူႇလႄႈ။ ၽိတ်းဢိူဝ်ႈ မႅၼ်ႈဢိူဝ်ႈၼႆ မၼ်းဢမ်ႇပဵၼ်လိူင်ႈယႂ်ႇလွင်ႈသင်တေႉတေႉ။ ဢၼ်လမ်ႇလွင်ႈၼႆႉ တေ လႆႈမီးသိၵ်ႈၶႃႇၵုင်ႇသၢင်ႈသဝ်းတူဝ်ၵဝ်ႇဢိူဝ်ႈ။ ထႅင်ႈဢၼ်ၼိူင်ႈတႄႉ ဢွၼ်ၵၼ်ၶတ်းၸႂ်ႁဵတ်းၵၢၼ်ႁႃငိုၼ်းလႄႈ။ တႃႇ တေလႆႈငိုၼ်းၼၼ်ႉ ယႃႇပေၶၢမ်ႇၵၢၼ်ႉၶၢမ်ႇယွမ်းသင်ၼႃႈ။ ၵူၺ်းၵႃႊ ဢၼ်လူဝ်ႇဝႆႉတေႉတေႉၼႆႉတႄႉ ၽၢၼ်ဢိူဝ်ႈ ဢၼ်ဝႃႈၼႆႉ မၼ်းဢမ်ႇၸႂ်ႈတၢင်းဢၼ်လီဢၢႆလႄႈ။ ဢၼ်ဢဝ်တၢင်းလၢႆးဢမ်ႇၸိုဝ်ႈၸႂ်ႈသေ မၢၵ်ႈမီးယူႇၼၼ်ႉၵွၺ်း ဢိူဝ်ႈ ၵႅၼ်ႇပဵၼ်ဢၼ်လီဢၢႆတေႉတေႉၼၼ်ႉယဝ်ႉ။

           ထႅင်ႈၶေႃႈၼိူင်ႈတႄႉ ၶိူဝ်းၵူၼ်းႁဝ်းၶဝ်ၼႆႉ ပေႃးဝႃႈပဵၼ်ၵၢၼ်ၼႆ ပေႃးၸႂ်ႉၸင်ႇၸၢင်ႊႁဵတ်းလႄႈ ၊ ဢၼ်ၼႆႉ ပေႃးၶႂ်ႈၸပ်းပဵၼ် တၢင်းယၢမ်ႈလူင်ဝႆႉယဝ်ႉ၊ ယွၼ်ႉၼႆသေ ဢဝ်ၼႆႉၵႂႃႇၼႃႈ ပေႃးၸႂ်ႉၼႆ ယႃႇပေႁဵတ်းယဝ်ႉ။ ဢမ်ႇၸႂ်ႉသေ ၵေႃႈလုၵ်ႉႁဵတ်းလႄႈ။ ပေႃးပိူၼ်ႈၸႂ်ႉသေ ၸင်ႇလုၵ်ႉႁဵတ်းၼႆႉ ပဵၼ်ၵူၼ်းၶၢၼ်ႉဢိူဝ်ႈ။ ပဵၼ်ၵူၼ်းထၢတ်ႈ ၸႂ်ၶီႈၶႃႈဢိူဝ်ႈ။ ပေႃးတၵ်းဝႃႈ ထုၵ်ႇႁဵတ်းယူႇၼႆ ႁဵတ်းပႅတ်ႈသေလႄႈ။ ထႅင်ႈဢၼ်ၼိူင်ႈတႄႉ ၵူၼ်းႁဵတ်းတီႈလုမ်း၊ တီႈၶမ်ႇပၼ်ႇၼီႇ ဢၼ်ၼိူင်ႈၼႆႉ ၵူၼ်းႁၢပ်ႇၵၢၼ်ၵေႃႉၼိူင်ႈၼႆႉ မိူဝ်ႈဢၼ်ႁဵတ်းၵၢၼ်မၼ်းၼၼ်ႉ တေလႆႈပႃးၸႂ်သႂ်ႇၶေႃးသေ ႁဵတ်းၵၢၼ် မၼ်းဢိူဝ်ႈ။ တီႈၵၢၼ်တူဝ်ၵဝ်ႇႁဵတ်းယူႇၼၼ်ႉ ၶဝ်မီးဝႆႉၶေႃႈတၢင်းယိူင်းဢၢၼ်း ၶဝ်ဢိူဝ်ႈ။ ယဝ်ႉၵေႃႈ   မိူဝ်ႈဢၼ်ၽူႈမီး ပုၼ်ႈၽွၼ်း တီႈၵၢၼ်ၼၼ်ႉ မိူဝ်ႈဢၼ်ၶဝ်ဢဝ်မႂ်းသႂ်ႇတီႈၼႂ်းၵၢၼ်ၼၼ်ႉၼႆ ယုမ်ႇႁၼ်ဝႃႈ  ၶဝ်ဢဝ်သႂ်ႇၵေႃႉၵူၼ်း   ဢၼ်ၵိုင်ႇငၢမ်ႇတင်းၵၢၼ်ငၢၼ်းၼၼ်ႉယဝ်ႉ ၼႆလႄႈ ၊ ၼႆႉထုၵ်ႇလႆႈပဵၼ် ဢၼ်လီ ထီႈသုတ်းၼၼ်ႉယူႇယဝ်ႉ။ ၵူၼ်း ၵၢၼ်ဢၼ်ဢဝ်သႂ်ႇၶဝ်ႈမႃးၼၼ်ႉၼႆၵေႃႈ ၼင်ႇႁိုဝ်မၼ်းပေႃးတေပႃးၸႂ်သႂ်ႇၶေႃး မႃးၼၼ်ႉၵေႃႈ တေလႆႈႁဵတ်းယူႇယဝ်ႉ။ ၼင်ႇဢၼ်ဝႃႈၼၼ်ႉယဝ်ႉ တီႈၵၢၼ်ငၢၼ်းလႂ်သေဢမ်ႇဝႃႈ  ၶဝ်ၵေႃႈမီးဝႆႉ ၶေႃႈယိူင်းဢၢၼ်းၶဝ်ယူႇဢိူဝ်ႈ။ ၵူၼ်းၵေႃႉႁၢပ်ႇ ၵၢၼ်ၼႆၵေႃႈ ႁူႉၵႃႊမီးၶေႃႈယိူင်းဢၢၼ်းမၼ်းယူႇယဝ်ႉ။ ၵူၼ်းႁၢပ်ႇၵၢၼ် ယေႈၵေႃႉၼႆႉ တေလႆႈဢဝ်ၶေႃႈဢဵၼ်းဢၢၼ်းမၼ်း ႁႂ်ႈၶဝ်ႈၶူပ်းမႅၼ်ႈတင်း တၢင်းယိူင်းဢၢၼ်းၵၢၼ် ၶမ်ႇပၼ်ႇၼီႇမၼ်း သေ ႁဵတ်းသၢင်ႈယူႇယဝ်ႉ။ ပေႃးဢမ်ႇၶဝ်ႈၶူပ်း မႅၼ်ႈၼႆတႄႉ ၵူၼ်းၵေႃႉၼၼ်ႉ ႁူႉတေလႆႈဢွၵ်ႇယူႇဢမ်ႇႁၢင်ႉယဝ်ႉ။

           ၵွပ်ႈၼႆသေလႄႈ ပေႃးၶႂ်ႈႁႂ်ႈၵူၼ်းႁၢပ်ႇၵၢၼ်ၶဝ် မၼ်ႈၵိုမ်းလီၼႆ တေလႆႈႁဵတ်းႁႂ်ႈလႆႈႁူႉဝႆႉ လွင်ႈၶေႃႈယိူင်းဢၢၼ်း ၵူၼ်းႁၢပ်ႇၵၢၼ်ၶဝ် ၵေႃႉတေႃႇၵေႃႉၼၼ်ႉ ပဵၼ်ဝႆႉသင်ၼၼ်ႉယူႇ။ ပေႃးႁဵတ်းႁႂ်ႈႁူႉယဝ်ႉၵေႃႈ ၸင်ႇႁဵတ်းပၼ်ၵႃႊၼင်ႇ ဢၼ်တူင်ႉၼိုင်လႆႈၼၼ်ႉသေလႄႈ။ ပေႃးၼၼ်ၸင်ႇ  ၵူၼ်းႁၢပ်ႇၵၢၼ်တင်း ႁူင်းၵၢၼ်ၶမ်ႇပၼ်ႇၼီႇၶဝ် တေၸၢင်ႊၶဝ်ႈ မႅၼ်ႈၵၼ်လႆႈလီယူႇ ၼၼ်ႉယဝ်ႉ။

           ဢၼ်လႆႈဝႃႈယူႇၼႆႉတႄႉ မၼ်းပဵၼ်လွင်ႈဢဝ်ပုၼ်ႈၽွၼ်း၊ လွင်ႈၸင်ႈႁပ်ႉပဝ်ႊတေႃႇပုၼ်ႈၽွၼ်းလႄႈ လွင်ႈ မေႃႁူႉတေႃႇပုၼ်ႈၽွၼ်း ၼၼ်ႉယဝ်ႉ။ လွင်ႈၸိူဝ်းၼႆႉတင်းသဵင်ႈသဵင်ႈၼႆႉ တီႈၵူၼ်းႁဝ်းၶဝ်ၼႆႉ မၼ်းဢမ်ႇမီးမိူၼ်ၵၼ် သဵင်ႈသႄႈ။ တၢင်းယုမ်ႇယမ်ၼပ်ႉထိုဝ်လႂ် ၊ ပၢႆးၸၢဝ်းၵူၼ်းလႂ် ၊ ပၢႆးတၢင်းဝူၼ်ႉႁၼ်ၶဝ်ႈၸႂ်ၶဝ်လႂ် ဢမ်ႇမိူၼ်ၵၼ်သႄႈ။ တၢင်းႁပ်ႉႁၼ်လႆႈၼႆၵေႃႈ ဢမ်ႇမိူၼ်ၵၼ်သႄႈ။ ၼင်ႇၼႆယဝ်ႉ တီႈႁူင်းၵၢၼ်လႄႈ ၵူၼ်းႁၢပ်ႇၵၢၼ်ၶဝ်ၼႆၵေႃႈ မိူၼ်ၸိူဝ်ႉ ၼင်ႇၼႆ ၼင်ႇၵဝ်ႇယဝ်ႉ။ ပေႃးပဵၼ်ၵူၼ်းၼုမ်ႇၶဝ်ၼႆ ၶဝ်သမ်ႉၶႂ်ႈၶူင်ႊသၢင်ႈ ႁဵတ်းဢွၵ်ႇပဵၼ်ဢၼ်မႂ်ႇ တင်းလၢႆးမႂ်ႇၶဝ် လႂ်ၵွၼ်ႇဢိူဝ်ႈ။ ထုၵ်ႇလီလႆႈၶူင်ႊသၢင်ႈယူႇလေႃႇ။ ပေႃးတၵ်းဝႃႈ တီႈၵူၼ်းႁဝ်းၶဝ်ၼႆႉ ၵေႃႉၼိူင်ႈတင်းၵေႃႉၼိူင်ႈ မီးလွင်ႈ ႁပ်ႉၸင်ႈ ပုၼ်ႈၽွၼ်း ၊ မီးလွင်ႈႁပ်ႉဢဝ်ပုၼ်ႈၽွၼ်းယူႇၼႆ ႁူႉတေသၢင်ႇထုၵ်ႇလီငၢမ်းယူႇ ဢမ်ႇႁၢင်ႉယဝ်ႉ။ ၵူၼ်းၼိူင်ႈ ၵေႃႉၼိူင်ႈၵေႃႉၼႆႉ တၵ်းတေလႆႈမီးၶေႃႈယိူင်းဢၢၼ်းဢိူဝ်ႈ။ တႃႇတူဝ်ၸဝ်ႈၵဝ်ႇၵေႃႈ တေလႆႉမီး လွင်ႈၵႂၢၼ်းပွင် ၊ ၵႂၢၼ်း ပႂ်းလႆႈၵွၼ်ႇယူႇဢိူဝ်ႈ။ ထႅင်ဢၼ်ၼိူင်ႈသမ်ႉ တေလႆႈၶတ်းၸႂ်ႁဵတ်းသၢင်ႈလိူဝ်သေ ဢၼ်ၸင်ႇၼႆႉ ထႅင်ႈၵွၼ်ႇၼၼ်ႉ ဢိူဝ်ႈ။ ပွင်ႇဝႃႈ တေလႆႈၶတ်းၸႂ်၊ ဢွၼ်ၵၼ်ၶတ်းၸႂ်ဝႆႉယူႇထႅင်ႈ ၼၼ်ႉယဝ်ႉ။ ပေႃးႁဝ်းၸူမ်းႁပ်ႉသူႈတေႃႇ သၢႆငၢႆငဝ်း လၢႆး ဢၼ်မီးယူႇဝႆႉၸင်ႇၼႆႉၵႂႃႇၵွၺ်းၼႆတႄႉ ပွင်ႇဝႃႈ တေဢမ်ႇၶိုၼ်ႈယႂ်ႇမႂ်ႇသုင်လႆႈထႅင်ႈယဝ်ႉ။ ဢမ်ႇမီးတၢင်းဢွင်ႇ မၢင်ႇလႆႈမၢၼ်ထႅင်ႈယဝ်ႉ။ ၵွပ်ႈၼႆသေ ပေႃးႁဵတ်းၵၢၼ်ၼႆ တေလႆႈႁဵတ်းႁႂ်ႈလႆႈ တိူဝ်းလီသေဢၼ်ၸင်ႇၼႆႉ ဝႆႉယူႇၼၼ်ႉ ယဝ်ႉ။ ယွၼ်ႉၼႆ ႁဵတ်းလီလီ။ ႁဵတ်းႁႂ်ႈလီသေၼႆႉ။ ႁဵတ်းႁႂ်ႈလႆႈဢွင်ႇမၢင်ႇသေဢၼ်ၸင်ႇၼႆႉလႄႈ။ ၼႆႉ…… ၶႂ်ႈတိုၵ်း သူၼ်းပၼ်ၼင်ႇၼႆဢိူဝ်ႈ။

           ဢဝ်ဝွၵ်းၵႂၢမ်းလုၵ်ႈဢွၼ်ႇ ဢၼ်ၼႆႉသေ ၶွတ်ႇယွတ်ႈပၼ်တႃႇလုၵ်ႈဢွၼ်ႇ ၵူၼ်းၼုမ်ႇႁဝ်းၶဝ် လိူၺ်ႈပုၼ်ႈ ၽွၼ်း ဢၼ်ဝႃႈၼႆႉယူႇ။

မၢႆမီႈပိူင်ၵူၼ်း သီၶမ်း
ဢွၼ်ႇၸၢႆးၶဝ် ဢွၼ်ႇယိင်းၶဝ်၊တွင်းဢဝ်ယႃႇပေလိုမ်း
ႁဵတ်းသင် ႁဵတ်းတေႉတေႉ၊ ယႃႇႁဵတ်းၸေႃႉၸႄႉလႆႈႁၢမ်းလၢႆႊ
ႁဵတ်းသင်ႁဵတ်းလီလီ၊ ႁဵတ်းႁႂ်ႈပဵၼ်လႆႈလီထီႈသုတ်း
ၵၢၼ်လီၼႆႉ ႁဵတ်းၵူႊဝၼ်းၵူႊမိူဝ်ႈ၊ ႁဵတ်းၵႂႃႇတႃႇၶၢဝ်းယၢဝ်း
(ၼႆႉ) ပဵၼ် သၢႆသဵၼ်ႈတၢင်း တႃႇဢွင်ႇပေႉႁဝ်းဢိူဝ်ႈ

လုင်းၸၢႆးၾႃႈ (ၵဵပ်းႁွမ်တွမ်ႊတႅမ်ႈ) *(႑႘:႐႐) ႐႘. ႐႗.႒႐႒႑  ,  တႉလႉ ၽ - လႉတႉလ (႑)*

လမ်းၼႂ်း · ထႅင်ႈ →