View source for လိၵ်ႈပိုတ်ႇပၼ်ပိုၼ်ႉႁူႉ မၢႆသၢမ်/ဝၢၼ်ၸႆႉမႂ်ႊ (မွၵ်ႇလိူၼ်သီႇ)

ပေႃးၽႅဝ်ၵၢင်ဝၼ်းမႃးယဝ်ႉၼႆ ယွၼ်ႉၵွပ်ႈၵၢၼ်ၵဝ်ၶႃႈယဝ်ႉလႄႈ  တင်းၵႂႃႇၼင်ႈတီႈသိုင်ႇၵႃႇၾီႇ ဢၼ်လုၵ်ႉတီႈ ၼႂ်းၵၢၼ်ၶႃႈသေ ယိုၼ်းႁၼ်လႆႈဝႆႉယူႇၼၼ်ႉသေ ၵႆႉၸၢႆႇယၢမ်းပႅတ်ႈ ယူႇယဝ်ႉ။ တင်းႁေႃႇၶဝ်ႈဢၼ်ပႃးမႃးတီႈႁိူၼ်း ၼၼ်ႉၼႆၵေႃႈ တင်းဢဝ်မႃးၵိၼ်တီႈၼႂ်းသိုင်ႇၼႆႉသေယဝ်ႉ တင်းၼင်ႈယူႇတီႈတင်ႇၼင်ႈသေဢၼ်ဢၼ် ဢၼ်ဢမ်ႇ မီးၵူၼ်းၼၼ်ႉသေ ယူႇတေႃႇမိူဝ်ႈလႃႈဝၼ်း ထိုင်ၶၢဝ်းဢၼ်တေလႆႈပွၵ်ႈမိူဝ်းႁိူၼ်းၼၼ်ႉႁေၵေႃႈ ၵႆႉလႆႈၸၢႆႇပႅတ်ႈယၢမ်း ယဝ်ႉ။ သိုင်ႇဢၼ်ၵဝ်ၶႃႈလႆႈႁဵတ်းၵၢၼ်ဝႆႉယူႇၼႆႉ သမ်ႉမီးယူႇဝႆႉၼႂ်းၵၢတ်ႇႁၢၼ်ႉလူင်လၢင် (သုပ်းပႂ်းမၢၵ်ႉၵႅတ်ႉ) ဢၼ် ၼိူင်ႈဢိူဝ်ႈ။ ဢၼ်ဝႃႇသိုင်ႇၵႃႇၾီႇၼၼ်ႉၼႆၵေႃႈ ဢမ်ႇၸႂ်ႈဢၼ်ၶၢႆၵႃႇၾီႇသေ ပဵၼ်ဢၼ်တီႈတမ်းဝၢင်းဝႆႉတင်ႇၼင်ႈ ၶဝ်ၵွၺ်းသေယဝ်ႉ ၵမ်ႈၼမ်ၼမ်တႄႉ ပဵၼ်ၵူၼ်းႁၢပ်ႇၵၢၼ်ၶဝ်ၵွၺ်းၵမ်ႈၼမ် ဢွၼ်ၵၼ်မႃးၼင်ႈလိုဝ်ႈမိူဝ်ႈၶၢဝ်းၶဝ်လႆႈ ယၢမ်းတၼ်းလိုဝ်ႈၸႂ်ၵၼ်ၼၼ်ႉၵွၺ်းဢိူဝ်ႈ။ ၵဝ်ၶႃႈၼႆၵေႃႈ ပေႃးၽႅဝ်မႃးၶၢဝ်းၵၢင်ဝၼ်းယဝ်ႉၼႆ ၵႆႉၵႆႉၵႂႃႇၼင်ႈဝႆႉယူႇ သေႇသေႇလႄႈ တင်းလွၺ်းလွၺ်းသေၵေႃႈဢဝ်ၵူၼ်းႁူႉၸၵ်းပဵၼ်ဢူၺ်းၶဝ်ၼႆၵေႃႈၼမ်မႃးဝႆႉၼၼ်ႉယဝ်ႉ။ ၵူၼ်းၵေႃႉ ၼိူင်ႈ ဢၼ်လႆႈၸိုဝ်ႈဝႃႈ - ၶရိသ်ႉၼၼ်ႉသမ်ႉ မိုတ်ႈၵိုဝ်းတေႃႈၶႃႈတေႉတေႉသေယဝ်ႉ ပေႃးဝႃႈမၼ်းလႆႈၶၢဝ်းတၼ်းမိူဝ်ႈ လႂ်ၵေႃႈ ၵႆႉမႃးၼင်ႈႁိမ်းတင်ႇၼင်ႈ တီႈဢၼ်ၶႃႈမီးၼၼ်ႉသေဢမ်ႇၵႃး တၢင်းၸွၺ်ႈထႅမ်မၢင်ႊၽွင်ႈၼႆၵေႃႈ ၵႆႉၸွၺ်ႈ ပၼ်ယူႇယဝ်ႉ။ မီးဝၼ်းၼိူင်ႈ တင်းၵႂၢမ်းၵွင်ႉၵၢႆႇၵၼ်မႃးလႄႈ- တွင်ႈထၢမ်တေႃႇၶႃႈမႃးဝႃႈ “ၸွင်ႇမႂ်းလႆႈၸႂ်သူႇသျီႇယူႇႁိုဝ်” ၼႆယဝ်ႉ။ ၽိူဝ်ႇၶိုၼ်းတွပ်ႇဝႃႈ ဢမ်ႇလႆႈၸႂ်ၼႆၵေႃႈမၼ်းသမ်ႉၶူဝ်ဝႆႉယူႇယဝ်ႉ။ “ႁူမ်ႊဝႃႈမႂ်းလႆႈ(ႁဵတ်း)ၵဵၼ်သူႇသျီႇယူႇၵေႃႈ ဢမ်ႇလႆႈၸႂ်သူႇသျီႇၼႆ ၵဝ်ႁူႉပွင်ႇလႆႈဢိူဝ်ႈ”ၼႆၵေႃႈ မၼ်းပၢႆဝႃႈထႅင်ႈသေၵွၼ်ႇဢိူဝ်ႈ။ မၼ်းၼႆၵေႃႈ ႁူမ်ႊဝႃႈဢမ်ႇထုၵ်ႇၸႂ် တေႃႇၼိူဝ်ႉၶဝ်၊ ပႃၶဝ်သေၵေႃႈ သမ်ႉလႆႈတႅပ်းၼူဝ်ႉတႅပ်းပႃၶဝ်သေယဝ်ႉ လႆႈၶၢႆပၼ်ပိူၼ်ႈယူႇၵူႊဝၼ်းဝၼ်း တီႈ ႁွင်ႈၵၢၼ်ၾၢႆၼိူဝ်ႉပႃၼႆၵေႃႈ လၢတ်ႈၼေပၼ်ယဝ်ႉ။ သိုင်ႇၶၢႆၼိူဝ်ႉလိပ်း ပႃလိပ်းၶဝ်ၼႆႉ မီးဝႆႉတီႈႁၢမ်ႉၾၢႆႉၾၢႆႉ တင်း တေႃႇၼႃႈတေႃႇသိုင်ႇသူႇသျီႇၵဝ်ၶႃႈသေယဝ်ႉ ပေႃးတူၺ်းမႅၼ်ႈၵႂႃႇမိူဝ်ႈလႂ်ၼႆၵေႃႈ တေလႆႈႁၼ်မၼ်းထိူဝ်ပၢတ်ႇၼိူဝ်ႉၶဝ် သေ ဢဝ်သႂ်ႇဝႆႉယူႇၼႂ်းထူင်ယၢင်ႊ(ပလၢသ်ႉတိၵ်ႉ)သေ ႁေႃႇဝႆႉတင်းႁၢင်ႈႁႅၼ်းဝႆႉတႃႇတေၶၢႆဢွၵ်ႇၼၼ်ႉဝႆႉယူႇၼႆ ၵႆႉၵႆႉ လႆႈႁၼ်ၸိူင်ႉၼင်ႇၼႆယဝ်ႉ။ လုၵ်ႉတီႈမၼ်းသေၵေႃႈ ၽၢတ်ႈတေႃႇတင်းသိုင်ႇၵႃႇၾီႇသေ မုင်ႈႁၼ်လႆႈတေႃႇသိုင်ႇၶၢႆ ပီႇသႃႇသေ တင်းၸီႉမိုဝ်းတေႃႇၵူၼ်းၸိူဝ်းၼၼ်ႉသေၵေႃႈ ၸိူဝ်းၶဝ်ၼၼ်ႉၵေႃႈ တင်းဢမ်ႇလႆႈၸႂ်တေႃႇပီႇသႃႇသေ လႆႈ ဢွၼ်ၵၼ်ၽဝ်ၶဝ်ႈမုၼ်းပီႇသႃႇသေယဝ်ႉ ၶၢႆဝႆႉယူႇၵၼ်ဢိူဝ်ႈ ဝႃႈၼင်ႇၼႆယဝ်ႉ။ ၵူၼ်းၵမ်ႈၼမ်ၼမ်ၶဝ်ၼႆႉ လႆႈဢွၼ် ၵၼ်ႁဵတ်းၵၢၼ်လဵင်ႉတွင်ႉ တင်းၵၢၼ်ငၢၼ်းဢၼ်တူဝ်ၵဝ်ႇၶဝ်ဢမ်ႇထုၵ်ႇၸႂ်ၼၼ်ႉဝႆႉၼႆၵမ်ႈၼမ်ယဝ်ႉၼႆၶရိသ်ႉ ဢၼ် ပဵၼ်ၵူၼ်းမိူင်းဢမႄႇရီႇၵၢၼ်ႇၼႆႉဝႃႈၼေယဝ်ႉ။ ၵဝ်ၶႃႈတႄႉဢမ်ႇထုၵ်ႇၸႂ်တေႃႇသူႇသျီႇသေတႃႉၵေႃႈ လႆႈၸႂ်တႃႇလႆႈ ႁဵတ်း(ၵဵၼ်)သူႇသျီႇယူႇဢိူဝ်ႈ။ ၼင်ႇၼႆယဝ်ႉ ၼင်ႇၵႂၢမ်းဢၼ်ၶရိသ်ႉဝႃႈၼၼ်ႉ ၵူၼ်းႁဝ်းၶဝ်ၼႆႉလႆႈဢွၼ်ၵၼ် ႁဵတ်း ၵၢၼ်လဵင်ႉတွင်ႉ ဢၼ်တူဝ်ၵဝ်ႇၶဝ် ဢမ်ႇသူင်မိုတ်ႈ ဢမ်ႇပႃးၸႂ်ၼၼ်ႉၵေႃႈ ၵႂၢမ်းၼႆႉၵႃႊလႆႈႁပ်ႉၶၢမ်ႇၽွမ်ႉၸႂ်ၸွမ်း ယူႇ ယဝ်ႉ။ တႃႇၵူၼ်းၵေႃႉၼိူင်ႈၼႆႉ ထုၵ်ႇၸႂ်သေၵေႃႈလီ ဢမ်ႇမႅၼ်ႈၸႂ်သေၵေႃႈလီ တၵ်းတေလႆႈႁဵတ်းသၢင်ႈဝႆႉ ၵၢၼ်ငၢၼ်း သေဢၼ်ဢၼ်ယူႇဢၼ်ဝႃႈၼၼ်ႉ ထၢင်ႇႁၼ်ၼင်ႇၼႆယဝ်ႉ။ ပေႃးႁဵတ်းၵၢၼ်သေဢၼ်ဢၼ်ဝႆႉၸင်ႇ တေၸၢင်ႊမီးလႆႈ ငိုၼ်းၶဝ်ႈသေယဝ်ႉ ၸင်ႇတေၸၢင်ႊၵေႈလိတ်ႈလႆႈတၢင်းၶွင်ႈၶမ် တႃႇလွင်ႈၵိၼ်ၼုင်ႈယူႇသဝ်း ၼႂ်းၸူဝ်ႊပၢၼ်ၵူၼ်းႁဝ်း ၵူႊဝၼ်းဝၼ်းၼၼ်ႉ   လႆႈယဝ်ႉဢိူဝ်ႈ။ ၼင်ႇဢၼ်ၸၢင်ႊမီးလႆႈၽူႈၵေႃႉၵူၼ်း ဢၼ်လႆႈႁဵတ်းဝႆႉၵၢၼ်ဢၼ်ၶဝ်ၶႂ်ႈႁဵတ်း၊ ၵၢၼ်ဢၼ်ၶဝ်ႈပႃးၸပ်းဝႆႉတၢင်းသူင်ၶဝ်တႃႇသေႇၼၼ်ႉ - ၽူႈၵေႃႈၵူၼ်းဢၼ်လႆႈႁဵတ်းသၢင်ႈယူႇၵၢၼ်ငၢၼ်း ဢၼ်တူဝ် ၵဝ်ႇ ဢမ်ႇပႃးမီးတၢင်းသူင် ဢၼ်တူဝ်ၵဝ်ႇဢမ်ႇၶႂ်ႈႁဵတ်း၊ ဢမ်ႇပႃးၸႂ်ၸွမ်းလႆႈၸိူဝ်းၼၼ်ႉၼႆၵေႃႈ မီးဝႆႉယူႇတင်းၼမ်လၢႆ တေႉတေႉယဝ်ႉ။ ၼင်ႇၼႆယဝ်ႉ ၼင်ႇဢၼ်မီးလႆႈ ၽူႈၵေႃႉဢၼ်လႆႈယူႇယူႇတီႈ ဢၼ်ၶဝ်ထုၵ်ႇၸႂ်ၸိူဝ်းၼၼ်ႉဝႆႉၼၼ်ႉ၊ ဢၼ်ဢွၼ်ၵၼ်လႆႈယူႇလႆႈႁႃၵိၼ်ယူႇတီႈလႅၼ်ႊတွၼ်ႊဢွင်ႈတီႈ ဢၼ်တူဝ်ၵဝ်ႇဢမ်ႇထုၵ်ႇၸႂ်ၼၼ်ႉၵေႃႈ မီးဝႆႉၼမ် လၢႆယူႇတေႉတေႉယဝ်ႉ။ ႁူမ်ႊဝႃႈ တင်းဢမ်ႇၽၢတ်ႇဢမ်ႇယၢၼ်သေ ၶႂ်ႈယူႇသဝ်းၵႂႃႇတီႈႁိူၼ်း ဢၼ်တူဝ်ၸဝ်ႈၵဝ်ႇၵိူတ်ႇ၊ မၢၼ်ႈသူၼ်ဢၼ်တီႈတူဝ်ၵဝ်ႇႁၼ်ၼႃႈ၊ ၸေႊဝဵင်းဢၼ်တီႈယူႇမႃးၸိူဝ်းၼႆႉတေႃႇၸူဝ်ႊသုတ်းပၢၼ် ယူႇသေတႃႇၵေႃႈ ၸွမ်းလူၺ်ႈ သၢႆငၢႆငၢဝ်းလၢႆးၸူဝ်ႊၸၢတ်ႈသေယဝ်ႉ လႆႈၵႂႃႇႁဵတ်းသၢင်ႈယူႇတီႈလႅၼ်ႊတွၼ်ႊ ဢွင်ႈတီႈဢၼ်တူဝ်ၵဝ်ႇ ဢမ်ႇၶႂ်ႈယူႇသဝ်းၼၼ်ႉဝႆႉသေယဝ်ႉ သမ်ႉလႆႈႁဵတ်းၵၢၼ်လဵင်ႉတွင်ႉ တႃႇၸူဝ်ႊပၢၼ် ဢၼ်ၼိူင်ႈဝႆႉ တင်းယၢပ်ႇယၢပ်ႇ ယိူၼ်းယိူၼ်းၼၼ်ႉၼႆၵေႃႈ တေမီးယူႇတင်းၼမ်ယဝ်ႉ။ တီႈတၢင်းၶၢင်ႈသိုင်ႇဢၼ်ၵဝ်ၶႃႈ ႁဵတ်းၵၢၼ်ဝႆႉယူႇၼၼ်ႉ မီး သိုင်ႇၶဝ်ႈမုၼ်းဢၼ်ၼိူင်ႈ ပဵၼ်ၵူၼ်းၼႃႈၽိူၵ်ႇၼႂ်းပိုၼ်ႉတီႈ မေႊပႃႈလူင်ၵေႃႉၼိူင်ႈၼၼ်ႉတႄႉ ၸဵမ်မိူဝ်ႈဢၼ်မၼ်း ၵိူတ်ႇမႃးၼၼ်ႉ ၼွၵ်ႈသေဝဵင်းၼႆႉသေ တေႃႇတၢင်ႇဝဵင်းတၢင်ႇဢၼ်တၢင်ႇတီႈ တီႈလႂ်ၵေႃႈဢမ်ႇယၢမ်ႈၵႂႃႇၽႅဝ်၊ ပွၵ်ႈၼိူင်ႈ ၵေႃႈ ဢမ်ႇယၢမ်ႈဢွၵ်ႇၶၢဝ်းတၢင်းၼႆ ယၢမ်ႈလၢတ်ႈၼေပၼ်ၶိုၼ်းယဝ်ႉ။ ၵဝ်ၶႃႈသမ်ႉ ၼႂ်းၵႃႊဢၼ်လႆႈၽႅဝ်ႁွတ်ႈထိုင်တီႈ  ဢမႄးရီးၵႂ်းၼိူင်ႈၶူပ်ႇပီႊၼႆႉ ပေႃးတၼ်းလႆႈၶၢႆႉယူႇၽႅဝ် ၸေႊမိူင်းသီႇဢၼ်၊ တင်းဝဵင်းမွၵ်ႈႁူၵ်းဝဵင်းယဝ်ႉယဝ်ႉ။ ၸွမ်းလူၺ်ႈသၢႆငၢႆငဝ်းလၢႆးသေ ၵၢၼ်ငၢၼ်းၼႆၵေႃႈ လႆႈၶၢႆႉလၢႆႊႁဵတ်းသၢင်ႈမႃးယဝ်ႉပဵၼ်သၢမ်၊ သီႇမဵဝ်း ၼႆယဝ်ႉ။ မိူၼ် ၼင်ႇၵူၼ်းၸိူဝ်းတၢင်ႇၸိူဝ်းၶဝ်ၼၼ်ႉယဝ်ႉ တင်းသေႃႉသွၵ်ႈႁႃဢွင်ႈတီႈၼမ်ႉတီႈသႂ်၊ ယိူဝ်ႈယႃႈၶဵဝ်ၸမ်ႉၼၼ်ႉသေယဝ်ႉ လႆႈၵွင်ႉၵၢႆႇ၊ လႆႈသိူၵ်ႈသၢမ်ႇလႅၵ်ႈလၢႆႊ ဝဵင်းလႄႈၵၢၼ်ငၢၼ်း ဢိၵ်ႇသိုင်ႇႁိမ်းႁွမ်းဢၼ်မႂ်ႇၶဝ်ဝႆႉ ဢၼ်ၼိူင်ႈယဝ်ႉဢၼ် ၼိူင်ႈယူႇယဝ်ႉဢိူဝ်ႈ။ ၵမ်းၼႆႉၵေႃႈ လႆႈၽႅဝ်မႃးတီႈဝဵင်းၼႆႉသေယဝ်ႉ လႆႈမႃးႁဵတ်းၵၢၼ်ၵဵၼ်ႁမ်းသူႇသျီႇ တီႈသိုင်ႇသူႇ သျီႇ တီႈၼႂ်းၵၢတ်ႇလူင်လၢင်ဢၼ်ၼိူင်ႈသေၵေႃႈ လႆႈႁဵတ်းၵၢၼ်မႂ်ႇသေၸိူမ်ႈၸႂ်ဝႆႉၸွမ်းယူႇ ၼၼ်ႉယဝ်ႉ။ ယွၼ်ႉၵွပ်ႈ လႆႈၶၢႆႉလၢႆႊဢွင်ႈတီႈ တီႈၼိူင်ႈယဝ်ႉတီႈၼိူင်ႈ၊ ၶၢႆႉသၢင်ႈမဵဝ်းသႅၼ်းၵၢၼ် မဵဝ်းၼိူင်ႈယဝ်ႉမဵဝ်းၼိူင်ႈ ဝႆႉသေၵေႃႈ လႆႈဢွၼ် ၵၼ် ၵႃႈၼေတၢင်ႇၶႆႊၸၢတ်ႈၸိူင်းၸူဝ်ႊပၢၼ် ဢၼ်တူၵ်းထိုင်ပၼ်မႃး တွၼ်ႊၸႂ်ၶၢၼ်ႈမၼ်းၼၼ်ႉဝႆႉယူႇဢိူဝ်ႈ။ ၼင်ႇ ဢၼ်ၸူဝ်ႊမူင်းလႄႈမဵတ်ႉယၢမ်းၶဝ်ၼႆႉ တင်းပၼ်ႇပၼ်ႇသေ ၶၢႆႉလၢႆႊၵႃႇဝႆႉတၢင်းၼႃႈယူႇၼၼ်ႉ ၸူဝ်ႊသၢၵ်ႈႁဝ်းၶဝ် ၼႆၵေႃႈ တင်းလွၺ်းလွၺ်းသေယဝ်ႉ ယႂ်ႇၵေႇမႃးဝႆႉယူႇယဝ်ႉ။ ၶၢဝ်းယၢမ်းလႄႈၵႄးသၢႆၶဝ်ၼႆႉ ဢမ်ႇႁွၼ်ႇတွၼ်ႉၵိုတ်း ယင်ႉသေ လႆလၢႆႇပၼ်ၶွပ်ႈဝႆႉယူႇဢိူဝ်ႈ။ ၼင်ႇၼႆ မိူဝ်ႈဝၼ်းၸူဝ်ႊပၢၼ် ဢၼ်ႁဝ်းၶဝ်လႆႈဝႆႉၸိူဝ်းၼၼ်ႉၼႆၵေႃႈ တင်း သုတ်ႉၶၢႆႉသေမူတ်းသဵင်ႈမႃးဝႆႉယူႇၵၼ်ယဝ်ႉ။ ၵူၼ်းႁဝ်းၵူႊၵေႃႉၵူႊၵေႃႉၶဝ်ၼႆႉ တင်းဢွၼ်ၵၼ်ယုၵ်ႉပႆတေႃႇ ၸူဝ်ႊပၢၼ်ဝၼ်းၶၢဝ်းၼႃႈၶဝ်  ၼင်ႇဢၼ်မုင်ႈမွင်းဢဵၼ်းဢၢၼ်းဝႆႉ တင်းတူဝ်ၵဝ်ၽႂ်မၼ်းၼၼ်ႉယူႇသေတႃႇၵေႃႈ မၢင်ႊၸိူဝ်းၶဝ် ၼႆႉ ဢွၼ်ၵၼ်တၢႆႁၢႆၵႂႃႇၵၼ်ယဝ်ႉ။ မၢင်ႊၸိူဝ်းၼႆၵေႃႈ လႆႈႁူပ်ႉတေႃႇလွင်ႈပၢႆႇသုမ်း ၵူႊမဵဝ်းမဵဝ်းသေယဝ်ႉ လႆႈဢွၼ်ၵၼ် ပဵၼ်ၸႂ်လူႉၸႂ်လဵၵ်ႉၼွၺ်ႉသေၵေႃႈ လႆႈယွၼ်ႇၸႂ်ၵႂႃႇပႅတ်ႈၼၼ်ႉၼႆၵေႃႈမီးယဝ်ႉ။ ၽႂ်ၵေႃႉလႂ်သေဢမ်ႇဝႃႈ ႁူမ်ႊဝႃႈၶႂ်ႈ ပိူင်ႇမီး ဢၼ်တူဝ်ၸဝ်ႈၵဝ်ႇၶႂ်ႈလႆႈၼၼ်ႉၵွၺ်းသေတႃႉၵေႃႈ သမ်ႉၸၢင်ႊလႆႉႁပ်ႉဢဝ်ပႃး ဢၼ်ၸိူဝ်းတူဝ်ၸဝ်ႈၵဝ်ႇ ဢမ်ႇ ၶႂ်ႈလႆႈၼၼ်ႉၵေႃႈ လႆႈပဵၼ်ဝႆႉတိုၼ်းထမ်းလူၵ်ႈ လူၵ်ႈၶူင်းလူင်ဝႆႉၵွၼ်ႇယဝ်ႉ။ တီႈၼိူဝ်လိၼ်လုမ်ႈၾႃႉလူင်ဢၼ်ၸိူဝ်းႁဝ်းၶဝ်လႆႈယူႇသဝ်းၶီးပဵၼ်ၸႂ်ၵၼ်ဝႆႉယူႇၼႆႉၼႆႉ လႆႈမီးဝႆႉၸိူဝ်းဢၼ်ႁဝ်းၶဝ်ဢမ်ႇႁၼ်လႆႈ၊ ဢမ်ႇႁူႉလႆႈၼၼ်ႉ တင်း ၼမ်လၢႆတေႉတေႉယူႇယဝ်ႉ။ လွင်ႈတၢင်းဢၼ်ၸိူဝ်း ဢမ်ႇၵိုင်ႇလီမိုတ်ႈၶႅမ်ႉတင်းႁဝ်းၶဝ်လႂ်၊ ၵူၼ်းၶဝ်လႂ်၊ သိုင်ႇႁိမ်းႁွမ်း ၶဝ်လႂ်၊ ပိူင်ပဵၼ်ၶဝ်လႂ်ၸိူဝ်းၼႆႉၼႆၵေႃႈ ႁူမ်ႊဝႃႈဢမ်ႇၶႂ်ႈလႆႈၼႆၵေႃႈ ၵႆႉၸၢင်ႊလႆႈႁပ်ႉဢဝ် ၵိုၵ်းၵၢႆႇဝႆႉလႂ်ၵၼ်ယူႇဢိူဝ်ႈ။ တေႃႈဢွင်ႈတီႈဢၼ်တူဝ်ၵဝ်ႇဢမ်ႇၶႂ်ႈယူႇၼၼ်ႉ သမ်ႉလႆႈယူႇဝႆႉၼၼ်ႉၵေႃႈ မီးယဝ်ႉဢိူဝ်ႈ။ ၼင်ႇၼႆ တေႃႇၵၢၼ်ဢၼ် တူဝ်ၵဝ်ႇ  ဢမ်ႇၶႂ်ႈႁဵတ်းၸိူဝ်းၼၼ်ႉသမ်ႉလႆႈႁဵတ်းဝႆႉယူႇၼႆၵေႃႈ  ၸၢင်ႊမီးလႆႈထႅင်ႈၵွၼ်ႇဢိူဝ်ႈ။

ႁဵတ်းၼႆႉသေ မိူဝ်ႈဢၼ်လႆႈႁဵတ်းၵၢၼ်တီႈဝဵင်းၼၼ်ႉ တဵမ်လိူၼ်ၵႂႃႇၼၼ်ႉ သမ်ႉလႆႈပွၵ်ႈၶိုၼ်းမႃးၸူးတီႈ ဝဵင်း ငဝ်ႈလူင်ၼိဝ်းယွၵ်ႉ တႃႇႁဵတ်းၽိုၼ်လိၵ်ႈလၢႆး ဢၼ်ၵမ်းၵၢႆႇတင်းလူင်ပွင်ႊၸိုင်ႈၼၼ်ႉဢိူဝ်ႈ။ လႆႈႁူပ်ႉထူပ်းတင်း ၽူႈ တၢင်ၼႃႈသေယဝ်ႉ သိုပ်ႇႁဵတ်းဢၼ်ထုၵ်ႇလႆႈႁဵတ်းၸိူဝ်းၼၼ်ႉယူႇယဝ်ႉ။ ၵပ်းၵၢႆႇတင်းလွင်ႈႁဵတ်းသၢင်ႈ ၽိုၼ်လိၵ်ႈ ၽိုၼ်လၢႆးသေ လွင်ႈတၢင်းမၢင်ႊၸိူဝ်း လႆႈႁဵတ်းယဝ်ႉၵႂႃႇသေတႃႉ လွင်ႈတၢင်းမၢင်ႊၸိူဝ်း ဢၼ်တေလႆႈသိုပ်ႇႁဵတ်း ၼၼ်ႉသမ်ႉမီးဝႆႉၵွၼ်ႇလႄႈ ဢမ်ႇပႆႇၸၢင်ႊၵႂႃႇထိုင်တီႈတၢင်ႇဝဵင်းၶဝ်သေ ၵူၺ်းလႆႈသိုပ်ႇၵိုတ်းဝႆႉယူႇ တီႈဝဵင်းၼိဝ်းယွၵ်ႉ ၵွၺ်းယဝ်ႉ။ ၸင်ႇသမ်ႉလႆႈၵၢၼ်ဢၼ်ၼိူင်ႈ တီႈၼႂ်းႁူင်းမူၺ်းၸၼ်ႉၸွမ် ၸေႊလူင်ၼိဝ်းယွၵ်ႉသေယဝ်ႉ ၼႂ်းသိုင်ႇလူင် တင်းဢၼ် ၵူၺ်းမီးၵဝ်ၶႃႈၵေႃႉလဵဝ်လဵဝ် လႆႈႁဵတ်းၵၢၼ်ၵဵၼ်သူႇသျီႇၼၼ်ႉယဝ်ႉ။ ဝၢႆးသေမိူဝ်ႈလႆႈႁဵတ်းၵၢၼ်ၼၼ်ႉယဝ်ႉ မွၵ်ႈလိူၼ်ၼိူင်ႈမႃးၼႆ  ၽႅဝ်မႃးၼႂ်းၵၢၼ်လိူၼ်တီႇသႅမ်းပႂ်း (လိူၼ်ထူၼ်ႈ 12) ယဝ်ႉလႄႈ သမ်ႉပဵၼ်ၶၢဝ်းဢိုတ်းႁဵၼ်း ယဝ်ႉ၊ ႁူင်းႁဵၼ်းၵေႃးလဵၶျ်ႉ (ႁူင်းမူၺ်းၸၼ်ႉၸွမ်) ဢၼ်တီႈၶႃႈႁဵတ်းၵၢၼ်ဝႆႉယူႇၼၼ်ႉၵေႃႈ ဢဝ်ဢိုတ်းႁဵၼ်းၵႂႃႇ မွၵ်ႈလိူၼ်ၼိူင်ႈယူႇယဝ်ႉ။  ပဵၼ်ၽွင်းၶၢဝ်းႁၢမ်းၵၢၼ်ဝႆႉ လႆႈၵႂႃႇမွၵ်ႈသွင်ဝူင်ႈၶၼၼ်ႉၼႆ ၵူၺ်းလႆႈလိုဝ်ႈယူႇတီႈႁိူၼ်းဝႆႉ ၵွၺ်းယဝ်ႉ။ ၽွင်းၼၼ် ၵႃႊၶၢတ်ႈ (ယိမ်ႊ) ႁိူၼ်းလႂ်၊ ၵႃႊၵိၼ်ၵႃႊယႅမ်ႉလႂ်လႄႈ ၵႃႊၸႂ်ႉၸၢႆႇတၢင်ႇၸိူဝ်းၸိူဝ်းၶဝ် ၸိူဝ်း ၼၼ်ႉသမ်ႉ ဢွၼ်ၵၼ်တုၵ်းယွၼ်းမႃးတႃႇယႃႇႁႂ်ႈယူႇဝႆႉၸိူဝ်ႉၼႆၵွၺ်း ၼၼ်ႉယဝ်ႉ။ ႁူမ်ႊဝႃႈ တႃႇႁႂ်ႈႁႃလႆႈၵၢၼ် ၸူဝ်ႊ ၶၢဝ်းဢွၼ်ႇဢၼ်ၼိူင်ႈတင်းၶိုၵ်ႉၶၢၵ်ႉၼႆႉ ဢမ်ႇပေႃးငၢႆႈငႅမ်ႈသေတႃႉၵေႃႈ လုၵ်ႉတီႈတႆးၵေႃႉၵေႃႉၼိူင်ႈၸွၺ်ႈထႅမ်သေ ပဵၼ်ဢၼ်ၵၢမ်ႇလီမီးသုၼ်ႇ တၼ်းႁႃႁၼ်လႆႈၵၢၼ်ၸူဝ်ႊၶၢဝ်းဢွၼ်ႇဢၼ်ၼိူင်ႈမႃးယူႇယဝ်ႉ။ ၵၢၼ်ငၢၼ်းၼႆႉသမ်ႉ ပဵၼ် ၵၢၼ်ဢၼ်လႆႈဢဝ် ၶူဝ်းၶိူင်ႈၵႅဝ်ႈသႅင်ၶဝ်ၼင်ႇ သၢႆၶေႃး၊ ပေႇႁူ၊ ဝႅၼ် ၶဝ်ၸိူဝ်းၼႆႉ ဢဝ်သႂ်ႇၶဝ်ႈၵႂႃႇၼႂ်းဢိူပ်ႇဢႅပ်ႇသေ ပူၵ်ႉႁေႃႇ ၼၼ်ႉယဝ်ႉ။ ပဵၼ်ၵၢၼ်ဢၼ်ၵမ်ႈၼမ် ၵူၼ်းယိင်းၶဝ်ၵွၺ်းႁဵတ်းၼၼ်ႉယဝ်ႉ။ ၶႂ်ႈပဵၼ်ၸိူင်ႉႁိုဝ်ၵေႃႈလီ တီႈဢၼ်တေလႆႈၵေႈလိတ်ႈတေႃႇတၢင်းၶွင်ႈၶမ်ၸူဝ်ႊပၢၼ်ၼၼ်ႉ သၢႆငၢႆငဝ်းလၢႆး ဢၼ်ၸိူဝ်းလႆႈႁူပ်ႉတေႃႇမႃးၸိူဝ်း ၼၼ်ႉ ပဵၼ်တႃႇႁူပ်ႉထူပ်းတေႃႇၼႃႈၵေႈလိတ်ႈၵႂႃႇ တင်းဢမ်ႇတူၼ်ႉဢမ်ႇႁူၼ်၊ တႃႇတွပ်ႇၵေႈတေႃႇ ၶေႃႈထၢမ်၊ တႃႇလုၵ်ႉႁဵတ်းသၢင်ႈပႅတ်ႈ လွင်ႈတၢင်းဢၼ်ထုၵ်ႇလႆႈႁဵတ်းၸိူဝ်းၼၼ်ႉ တင်းဢမ်ႇတေႃႇထွၺ်လင်ဢၼ်ဝႃႈၼၼ်ႉ မၼ်း တိုၼ်းပဵၼ် ၶေႃႈပိုၼ်ႊၼႄဝႆႉယဝ်ႉ  တႃႇၸူဝ်ႊပၢၼ်ဢၼ်ဢမ်ႇၸၢင်ႊႁဵတ်းႁိုဝ်ငိူင်ႉဝႄႈလႆႈ  ၼၼ်ႉယဝ်ႉ။

မိူဝ်ႈဝူင်ႈဝၢင်ႈပူၼ်ႉၼၼ်ႉ ပဵၼ်တၢၼ်ႈၾူၼ်းတေႃႇလၢၼ်ၵဝ်ၶႃႈ ဢၼ်ႁဵတ်းၵၢၼ်ယူႇတီႈ တႃႈၵုင်ႈၼၼ်ႉဢိူဝ်ႈ။ မၼ်းဝႃႈ ၵၢၼ်ဢၼ်မၼ်းႁဵတ်းယူႇၸင်ႇၼႆႉၼႆႉ မၼ်းဢမ်ႇၶႂ်ႈႁဵတ်းယဝ်ႉၼႆဝႃႈ လၢၼ်ၸၢႆးၼႆႉ ပဵၼ်လုၵ်ႈၸၢႆးလူင် တီႈ ပီႈဢၢႆႈၶႃႈဢိူဝ်ႈ။ တေၵႂႃႇၶိုၼ်ႈၵၼ်ႊႁဵၼ်း ၽိုၵ်းလၢတ်ႈၵႂၢမ်း ၸပ်ႇပၢၼ်ႇၼႆသေ ဢွၵ်ႇပႅတ်ႈၵၢၼ်ဢၼ်မၼ်းႁဵတ်းယူႇၵူႊ ပွၵ်ႈၼၼ်ႉဢိူဝ်ႈ။ ၵၼ်ႊႁဵၼ်းၼၼ်ႉသမ်ႉ ၵွၺ်းလႆႈၶိုၼ်ႈတႃႇ ၼႂ်းၼိူင်ႈဝူင်ႈသီႇဝၼ်း မွၵ်ႈၼႆႉၵွၺ်းလႄႈ မိူဝ်ႈဢၼ်ၶိုၼ်ႈ ၵၼ်ႊႁဵၼ်းယဝ်ႉမွၵ်ႈလိူၼ်ၼိူင်ႈယဝ်ႉၼႆ တႃႇၵူႊဝၼ်းဝၼ်းၼၼ်ႉ ၶၢဝ်းယၢမ်းလိူဝ်သမ်ႉမီးၼမ်မႃးယဝ်ႉ။ ၵႃႊသဵင်ႈၸၢႆႇ ၵၼ်ႊၵူၼ်း တီႈဝဵင်းတႃႈၵုင်ႈလႂ်၊ ၵႃႊယိမ်ႊၶၢတ်ႈႁိူၼ်းဝႆႉၼၼ်ႉလႂ်၊ တင်းၵႃႊၸႂ်ႉၸၢႆႇ ဢၼ်သုင်ၶိုၼ်ႈမႃးဝႆႉယူႇ ၶဝ် ၼၼ်ႉလႂ် ၸိူဝ်းၼႆႉၼႆႉ တုၵ်းယွၼ်းမႃးတႃႇႁႂ်ႈမၼ်းႁဵတ်းၵၢၼ်သေဢၼ်ဢၼ်ဝႆႉယူႇယဝ်ႉ။ တီႈဝဵင်းလူင်တႃႈၵုင်ႈၼႆႉ တႃႇႁႂ်ႈလႆႈလႆႈၵၢၼ်ၸူဝ်ႊၶၢဝ်းဢၼ်ဝႃႈၼႆႉ ယွၼ်ႉဢမ်ႇပဵၼ်လႆႈလႄႈ ၵမ်းလိုၼ်းမႃး ၵႃႊလႆႈလိူၵ်ႈဢဝ် ၵၢၼ်ဢၼ်လႆႈ ႁဵတ်းၵၢင်ၶိုၼ်းၼၼ်ႉ ဢၼ်ၼိူင်ႈယူႇယဝ်ႉ။ ၵၢၼ်ၼႆႉၸမ်း ပဵၼ်ၵၢၼ်ဢၼ်လႆႈၵႂႃႇႁွတ်ႈၽႅဝ်တီႈႁိမ်းႁွမ်းလႄႈ ပၢႆပဵၼ် ဝဵင်းၸိူဝ်းၼၼ်ႉသေယဝ်ႉ လႆႈၵႂႃႇဢဝ်ၵႆႉၸိူဝ်းတီႈလဝ်ႉ (ၶွၵ်ႈ) ၵႆႇၶဝ်သေ ၺွပ်းသႂ်ႇၼႂ်းသွင်းလူင် ၼၼ်ႉယဝ်ႉ။ သွင်းသႂ်ႇ ၵႆႇလူင် ဢၼ်မၼ်းၺွပ်းၵႆႇသႂ်ႇမႃးၸိူဝ်းၼၼ်ႉသမ်ႉ လႆႈဢဝ်တၢင်ႇသႂ်ႇၼိူဝ်ၵႃးသေယဝ်ႉ ၸူဝ်ႊၵႃႈမိူင်းပႆႇလႅင်းၵၢင်ၼႂ် ႁႂ်ႈလႆႈပွၵ်ႈမႃးၽႅဝ်ၶိုၼ်း ၼႂ်းဝဵင်းတႃႈၵုင်ႈၼၼ်ႉယဝ်ႉ။ ၵၢၼ်ၼႆႉ ႁၢမ်ႉၶႂ်ႈယၢပ်ႇႁိူဝ်ႉဢိတ်းဢိတ်းသေ၊ ဢၢႆသႅဝ်ၼႆၵေႃႈ သမ်ႉဢမ်ႇလီလႄႈ သိူဝ်ႈၶိူဝ်းၼုင်ႈမၼ်းၸိူဝ်းၼႆႉၼႆၵေႃႈ ၵႆႉၸၢင်ႊပဵၼ်မဵၼ်လူင်ဝႆႉၼႆယဝ်ႉ။  ယွၼ်ႉၵွပ်ႈ တင်းၵၢၼ် ဢၼ်မၼ်းလႆႈႁဵတ်းမႃးလႄႈ ၽိင်ႈသၢင်ႈတိုၼ်းပဵၼ်ၶဝ် ႁူမ်ႈပႃးတီႈႁိမ်းႁွမ်းၸိူဝ်းၼႆႉၵေႃႈ  ပႅၵ်ႇပိူင်ႈယၢၼ်ႁၢင်ႇၵၼ် လႄႈ ၸင်ႇလႆႈပဵၼ်လွင်ႈၶဝ်ၸႂ်တေႃႇ ၵၢၼ်ဢၼ်ၸင်ႇၼႆႉဝႆႉဢေႇၼၼ်ႉယဝ်ႉ။ ၵူၼ်းဢၼ်ဝႃႈၼႆႉ ၼင်ႇဢၼ်လႆႈမီး လွင်ႈဢၼ်လႆႈႁဵတ်းယူႇ တီႈၵၢၼ်ဢၼ်တူဝ်ၵဝ်ႇၶႂ်ႈႁဵတ်းၼၼ်ႉယဝ်ႉ တေႃႇၵၢၼ်ဢၼ်တူဝ်ၵဝ်ႇ ဢမ်ႇၶႂ်ႈႁဵတ်းၼၼ်ႉၼႆ ၵေႃႈ မၢင်ႊပွၵ်ႈမၢင်ႊလႂ်  သမ်ႉၸၢင်ႊၵႆႉလႆႈႁဵတ်းယူႇၼၼ်ႉၵေႃႈမီးဢိူဝ်ႈၼႆသေ လႆႈလၢတ်ႈၼေပၼ် ၵေႃႉပဵၼ်လၢၼ်ၸၢႆး ႁႂ်ႈၸႂ်မၼ်းလႆႈငၢႆႈလူမ်ယဝ်ႉ။ ၵၢၼ်ဢၼ်ၼိူင်ႈၵေႃႈလီ ဢွင်ႈတီႈတၼ်းသဝ်းဢၼ်ၼိူင်ႈၵေႃႈလီ၊ ၵႃႊလႆႈပၢႆႇပၢၵ်ႈပႅတ်ႈ ဢၼ်ဝႃႈ ၵဵၵ်ႉၸႂ်ဢိူဝ်ႈ ဢမ်ႇထုၵ်ႇၸႂ်ၼၼ်ႉသေယဝ်ႉ ႁူမ်ႊဝႃႈဢမ်ႇၸႂ်ႈတႃႇသေႇသေၵေႃႈ မၢင်ႊၽဝ်ႇမၢင်ႊၶႃး ႁဝ်းၶႃႈၶဝ် ၵႃႊလႆႈၵွင်ႉၵၢႆႇသိူၵ်ႈသမ်ႇမၼ်းယူႇၼၼ်ႉယဝ်ႉ။ လွင်ႈတၢင်းသၢႆငၢႆငဝ်းလၢႆး ဢၼ်ဢမ်ႇမီး သုၼ်ႇၶိုၼ်ထဵင်၊ လွင်ႈတၢင်း ၸိူဝ်းဢမ်ႇမီးသုၼ်ႇလိူၵ်ႈဢဝ်ၸိူဝ်းၼၼ်ႉ ၽူႈလႂ်ၽႂ်သေဢမ်ႇဝႃႈ ထၢင်ႇတေယၢမ်ႈလႆႈႁူပ်ႉထူပ်းယူႇ။ တေႃႇတီႈၼႂ်းသၢႆငၢႆ ငဝ်းလၢႆးၵူႊမဵဝ်းမဵဝ်း ၵူႊတီႈတီႈၼၼ်ႉသေ ယင်းလႆႈဢွၼ်ၵၼ်ယုၵ်ႉပႆၸူးတေႃႇၶၢဝ်းဝၼ်းၼႃႈ ႁႂ်ႈထိုင်တီႈ ဢၢင်ႈဢၢၼ်း တူဝ်ၵဝ်ႇၽႂ်မၼ်းဝႆႉယူႇယဝ်ႉ။ တင်းဢွၼ်ၵၼ်ၵေႈတွပ်ႇတေႃႇၶေႃႈထၢမ်ၸူဝ်ႊပၢၼ် ဢၼ်ယၢပ်ႇယိူၼ်းၽိုတ်ႇယၢၵ်ႈ ၵူႊ မဵဝ်းမဵဝ်းသေၵေႃႈ ဢွၼ်ၵၼ်လႆႈၵေႈလိတ်ႈတေႃႇ  တၢင်းၶွင်ႈၶမ် ၸူဝ်ႊပၢၼ်မႃးၵၼ်ယူႇဢိူဝ်ႈ။

မိူဝ်ႈၵဝ်ၶႃႈတိုၵ်ႉၵေႃႉလဵၵ်ႉ ၽွင်းမိူဝ်ႈယူႇတီႈဝၢၼ်ႈၼၼ်ႉၼႆ ယၢမ်ႈလႆႈထုၵ်ႇၸႂ်တေႃႇတူၼ်ႈမဵဝ်းၼိူင်ႈမႃးဢိူဝ်ႈ။ တူၼ်ႈၼၼ်ႉ ၸိုဝ်ႈမၼ်းပဵၼ်သင်တေႉတေႉ ဢမ်ႇႁူႉၵၼ်သေတႃႇၵေႃႈ ဢွၼ်ၵၼ်ႁွင်ႉၵၼ်ယူႇဝႃႈ “ဝၢၼ်မွၵ်ႇလႅင်သႅင်” ၼႆဢိူဝ်ႈ။ ပဵၼ်ၸိူဝ်ႉသႅၼ်းဝၢၼ်ၸႆႉမႂ်ႊယဝ်ႉ။ တူၼ်ႈၼႆႉ လုၵ်ႉတီႈမႂ်ႊမၼ်းသေ သိုပ်ႇတႅၵ်ႇပဵၼ်တူၼ်ႈမႃးလႆႈယဝ်ႉ။ ပေႃးဝႃႈမႂ်ႊတီႈတူၼ်ႈမၼ်းသေမႂ်ႊမႂ်ႊ ႁူင်ႈတူၵ်းၵႃႇတီႈၼိူဝ်လိၼ်ၼႆၵေႃႈ လုၵ်ႉတီႈမႂ်ႊၼၼ်ႉသေ ၶိုၼ်းသိုပ်ႇၽေႈတႅၵ်ႇ ပဵၼ်တူၼ်ႈမႂ်ႇမႃးလႆႈလႄႈယဝ်ႉ။  တီႈတေႉမၼ်း မိူၼ်ၼင်ႇမႂ်ႊတူၼ်ႈတၢင်ႇၸိူဝ်းၶဝ်ၼၼ်ႉယဝ်ႉ ပေႃးဝႃႈတူၵ်းၽႅဝ်တီႈ လိၼ်ၵႂႃႇၵေႃႈ ၸၢင်ႊၽုၺ်ႈၽင်ႉသေ ယဵၼ်းပဵၼ်ၽုၼ်ႇလိၼ်ၵႃႇ ဢဝ်ႁၢႆလၢႆႊၵႃႇလႆႈယူႇသေတႃႉၵေႃႈ၊ ၼႂ်းတူၼ်ႈတၵႃႉ တူၼ်ႈၼၼ်ႉ ဝၢၼ်ၸိူဝ်ႉၼႆႉတႄႉ မႂ်ႊၶဝ်ဢမ်ႇယဵၼ်းပဵၼ်ၽုၼ်ႇလိၼ်ၵႂႃႇသေ၊ လုၵ်ႉတီႈမႂ်ႊၼၼ်ႉသမ်ႉဢွၵ်ႇမႃး ႁၢၵ်ႈ ဢွၼ်ႇၶဝ်သေယဝ်ႉ ၶိုၼ်းၸိုၼ်ႇၶိုၼ်းပဵၼ်တူၼ်ႈမႃး တူၼ်ႈၼိူင်ႈဢိူဝ်ႈ။ ဢမ်ႇၸႂ်ႈလုၵ်ႉတီႈၸိူဝ်ႉၾၼ်းလႄႈ ၵိင်ႇၶႃႊ၊ ၵၢၼ်ႈၶဝ်သေၸင်ႇပဵၼ်တူၼ်ႈၼၼ်ႉသႄႈ။ လုၵ်ႉတီႈၸိူဝ်ႉမႂ်ႊၶဝ်သေ ပဵၼ်လႆႈတူၼ်ႈမႃးၼၼ်ႉယဝ်ႉ။ ၵွပ်ႈၼႆ ႁဝ်းၸင်ႇႁွင်ႉၸိုဝ်ႈမၼ်းဝႃႈ ဝၢၼ်ၸႆႉမႂ်ႊၼႆမႃးယဝ်ႉ။ ၵဝ်ၶႃႈၼႆၵေႃႈ ယၢမ်ႈလႆႈပဵၼ်မႃး မီးမႃးထၢတ်ႈၸႂ် ၼင်ႇတူၼ်ႈဝၢၼ်ၸႆႉမႂ်ႊ ၼႆႉသေ ၶႂ်ႈတူၵ်းမႅၼ်ႈတီႈလႅၼ်ႊတွၼ်ႊဢွင်ႈလႂ် ၼႂ်းလူၵ်ႈၶူင်းလူင်ၵေႃႈယဝ်ႉ ၼင်ႇတီႈမႂ်ႊတူၼ်ႈတူၵ်းထိုင်တီႈလႂ်ၵေႃႈ ၶိုၼ်းလုၵ်ႉပဵၼ် တူၼ်ႈမႃးလႆႈၼၼ်ႉ ၶတ်းၸႂ်ႁႂ်ႈၸၢင်ႊၸုၵ်းၸင်ႈမႃးလႆႈယူႇယဝ်ႉ။ ၶႂ်ႈႁွတ်ႈၽႅဝ်ဝဵင်းလႂ်၊ ဝၢၼ်ႈလႂ်၊ လႅၼ်ႊတွၼ်ႊလႂ်ၵေႃႈလီ၊ ၶႂ်ႈၽႅဝ်သူႇသိုင်ႇႁိမ်းႁွမ်းၸိူဝ်ႉႁိုဝ်လႄႈ လႆႈႁဵတ်းသၢင်ႈဝႆႉၵၢၼ်ငၢၼ်း မဵဝ်းၸိူင်ႉၼင်ႇႁိုဝ်ၵေႃႈလီ လႆႈပဵၼ်မႃးထၢတ်ႈၸႂ် ဢၼ်ၶႂ်ႈႁဵတ်းလီလီ၊ ႁဵတ်းႁႂ်ႈထိုင်တီႈယဝ်ႉလီပဵၼ်ငၢမ်းၶႅမ်ႉလႅပ်ႈ၊ ႁႂ်ႈဢွင်ႇမၢင်ႇသၢင်ႇတေႃႇ ၸိူဝ်းၼႆႉသေဢိူဝ်ႈ။ ၸိူဝ်းမီးၸႂ်ဢမ်ႇမီးၸႂ်တင်းသဵင်ႈ ၼႂ်းလုမ်ႈၾႃႉလူၵ်ႈၶူင်းလူင်ၼႆႉ ဢမ်ႇသူႈၵႆႉပၼ်လႆႈ တၢင်းဢၼ် ႁဝ်းၶဝ်ၶႂ်ႈလႆႈၼၼ်ႉတႃႇသေႇသႄႈ။ ၵၢၼ်ငၢၼ်းဢၼ်ႁဝ်းၶဝ်ၶႂ်ႈလႆႈၼၼ်ႉလႂ်၊ ဢွင်ႈတီႈဢၼ်ႁဝ်းၶဝ် ၶႂ်ႈယူႇသဝ်း ၵိၼ် သၢင်ႈ တႃႇမုၼ်းယႂ်ႇၶႅင်လႅင်းၼၼ်ႉလႂ်၊ ၸိူဝ်းၼႆႉ ဢၼ်ႁဝ်းၶဝ်ဢမ်ႇလႆႈမႃးၼႆႉတႄႉ ႁၢမ်ႉတေပဵၼ်ၵမ်ႈၼမ်ယဝ်ႉ။ တီႈတေႉမၼ်းမႃးၵေႃႈ ႁဝ်းၶဝ်တင်းသဵင်ႈသဵင်ႈၼႆႉ ဢွၼ်ၵၼ်လႆႈပဵၼ်ဝႆႉၼင်ႇ တူၼ်ႈဝၢၼ်ၸႆႉမႂ်ႊ (မွၵ်ႇလႅင်သႅင်လိူၼ် သီႇ) ဢၼ်မႂ်ႊမၼ်း တူၵ်းမႅၼ်ႈတီႈလႂ်ၵေႃႈ လႆႈဢွၵ်ႇပဵၼ်တူၼ်ႈဝႆႉၼၼ်ႉၵွၺ်းယဝ်ႉဢိူဝ်ႈ။ ဢမ်ႇၸႂ်ႈႁိုဝ်။ 

<div style="text-align: right;">
လုင်းၸၢႆးၾႃႈ (ၵဵပ်းႁွမ်တႅမ်ႈ)</br>
(႑႕:႒႕) ႑႐.႐႖.႒႐႑႙ ၽ.ၽ-ပၢင်ႇလေႃႉ။ဝႁ-႒ လူင်။
</div>

<div style="text-align: center;">
[[လိၵ်ႈပိုတ်ႇပၼ်ပိုၼ်ႉႁူႉ မၢႆသၢမ်/ပႆတၢင်းတူၺ်းတႂ်ႈလႅင်းလိူၼ်|← လိုၼ်း]] · [[လိၵ်ႈပိုတ်ႇပၼ်ပိုၼ်ႉႁူႉ မၢႆသၢမ်|လမ်းၼႂ်း]] · [[လိၵ်ႈပိုတ်ႇပၼ်ပိုၼ်ႉႁူႉ မၢႆသၢမ်/ၸႂ်ႁၵ်ႉၽႂ်ႇ ၵတ်းယဵၼ် ပိုၼ်ႊဝၢၼ်းမႅင်ႇၵူႊၵေႃႉ|ထႅင်ႈ →]]
</div>