View source for တင်းဢူၼ်ႈဢူၼ်ႈဢွၼ်ႇသေ ပႅၵ်ႇပိူင်ႈ

“ မေႃသွၼ် မိူဝ်ႈၼႆႉ တေၵိၼ်တင်းသင် ၊ ၼမ်ႉၽိတ်ႉ ၵူဝ်ႈၼဵင်ႈၵွၺ်းၼႄႇ”

“ မိူဝ်ႈၼႆႉတႄႉ တေၵိၼ်တင်း ၶႆႇၶူဝ်ႈ(ၶူၼ်း) လၢဝ်းၽၢဝ်းဢိူဝ်ႈ”

“တေလႆႈၶူဝ်ႈပၼ်ၸိူဝ်ႉႁိုဝ်ၶႃႈလႃႇ မေႃသွၼ်-”

“ဢေးသႃႇ” တင်းၵွၼ်းတေႃႇလုၵ်ႈဢွၼ်ႇမၼ်းသေ ၊ တင်းလဝ်ႇဢွၼ်ႇသေၵေႃႈ၊ လုၵ်ႉတီႈၽိူၼ် သုင် သႅၼ်ႇငိုၼ်းၼၼ်ႉသေ ၶၢမ်ႈထၢမ်လူင်မႃးယဝ်ႉ။

“သႂ်ႇမၢၵ်ႇၶိူဝ်သူမ်ႈသုၵ်း ၊ ၽၵ်းမီႇလႅင် ၊မၢၵ်ႇၽိတ်ႉၶဵဝ် တင်းၽၵ်းၵီးသေၶူဝ်ႈပၼ်လႃႈ၊ ၶူဝ်ႈသၢဝ်း သိဝ်း ယႃႇႁႂ်ႈသုၵ်းပူၼ်ႉႁႅင်းၼႃႇ။ ၶဝ်ႈၼႆၵေႃႈ ယႃႇပေဢွၺ်ၼမ်ႉမၼ်း။ ဢဝ်ၼမ်ႉမၼ်းမႆႈမႆႈသႂ်ႇၶဝ်ႈၼႂ်း မေႃႈၶႆႇၵႆႇၶူဝ်ႈ (ၶူၼ်း)လၢဝ်းၽၢဝ်းၼၼ်ႉဢဝ်လႄႈ။ ၵိူဝ်ယႃႇပေႁႂ်ႈၼၵ်း(ၸဵမ်း)ၼႃႈ။”

“ဢေႃႈၶႃႈ မေႃသွၼ်-”

         တင်းဢုပ်ႇတင်းလၢတ်ႈယူႇသေၵေႃႈ ၶိုၼ်းႁွင်ႉပၢဝ်ႇလၢတ်ႈတေႃႇ ၵူၼ်းႁဵတ်းၵၢၼ်မၼ်းၵႂႃႇယူႇ ၵွၼ်ႇယဝ်ႉ။ “ႁိူၺ်း ( - ) ငိၼ်းၵၼ်ယူႇဢိူဝ်ႈၼေႃ။ ၼႆႉ တႃႇမေႃသွၼ်ၵဝ်ဢိူဝ်ႈ။ ႁၢင်ႈႁႅၼ်းပၼ်တင်းသႅၼ်ႈ သႅၼ်ႈသႂ်သႂ် (လီငၢမ်းၼႃႈ)” ၼႆယဝ်ႉ။

         “လုၵ်ႈယိင်းဢိူၺ်……ႁၢမ်ႉဝႆးဝႆးဢွၼ်ႇသေၼႃႈ ။ၵဝ်တေလႆႈၶဝ်ႈႁွင်ႈႁဵၼ်း (သွၼ်) ၵွၼ်ႇဢိူဝ်ႈ ၼႃႈ”

         ၵူႊယၢမ်းၶၢဝ်း ပေႃးပွၵ်ႈသွၼ်လိၵ်ႈမႃးယဝ်ႉၼႆ တႃႇ တႃႇၶဝ်ႈဝၼ်းၼၼ်ႉ ၵႆႉၶဝ်ႈတီႈသိုင်ႇၶၢႆၼမ်ႉ  ၼဵင်ႈၼႆႉသေ ၵိၼ်ယူႇတႃႇသေႇယဝ်ႉဢိူဝ်ႈ။  သိုင်ႇသႃး(လၢၼ်ႉၶၢႆ) ဢၼ်ဢွၵ်ႇၸိုဝ်ႈသဵင်ယႂ်ႇၵေႃႈ ဢမ်ႇ ၸႂ်ႈ ၼင်ႇၵဝ်ႇသႄႈ။ ၵူၺ်းပဵၼ်သိုင်ႇၶၢႆၼမ်ႉၼဵင်ႈ မုင်ႉႁေႃႁိူၼ်းဢွၼ်ႇ ဢၼ်ပိုတ်ႇၽုၺ်ႇမႃးသိုပ်ႇသိုပ်ႇသၢၵ်ႈ သၢၵ်ႈၼၼ်ႉၵွၺ်းယဝ်ႉ။ ၵွပ်ႈၼႆ ၵူၼ်းၵေႃႈဢမ်ႇသုၵ်ႉသင်သႄႈ။ လွင်ႈႁၢင်ႈၶိူင်ႈတမ်းဝၢၼ်းသိုင်ႇသႃးၼႆ ၵေႃႈ ဢမ်ႇမီးတၢင်းလၢၵ်ႇလၢႆးပိူင်ၼၵ်ႉဢီႈသင်သႄႈ။ ၵူၺ်းပဵၼ်ဢၼ်သိုပ်ႇၸၼ်ဢွၵ်ႇတုပ်ႉ ၾူၺ်းတီႈၽၢႆႇ ၼႃႈႁိူၼ်းဢွင်ႈတီႈဢၼ်လွတ်ႈဝႆႉၼၼ်ႉသေ ႁဵတ်း (ၽုၺ်ႇ) ဢဝ်ဝႆႉၼၼ်ႉၵွၺ်းယဝ်ႉ။  လွင်ႈတၢင်းဢၼ်လႆႈ ပဵၼ်လွင်ႈထုၵ်ႇၸႂ်တေႃႇ သိုင်ႇၶၢႆဢွၼ်ႇၼႆႉတႄႉၸမ်း ၵွပ်ႈတီႈၽၢႆႇၼႃႈသိုင်ႇသႃးၼႆႉ မီးဝႆႉတူၼ်ႈမၢၵ်ႇၵႅင်း လူင် ဢၼ်ပၼ်လႆႈႁူမ်ႈငဝ်းထီႇလီၼၼ်ႉလႄႈယဝ်ႉ။ တီႈၽၢႆႇတႂ်ႈႁူမ်ႈငဝ်းလူင်ၼႆႉသမ်ႉ တမ်းဝႆႉပၼ်ၽိူၼ် လူင်သီႇၸဵင်ႇၼႃႈ ဢၼ်ၵိုၵ်းႁွမ်းပႃးတင်းတင်ႇယၢဝ်းပိုၼ်ႉၵႂၢင်ႈလူင်ၶဝ်သေဢိူဝ်ႈ။ လႆႈၼင်ႈၼႆၵေႃႈ ပဵၼ် ဢၼ်သၢင်ႇတေႃႇတေႉဢိူဝ်ႈ။

         “မေႃသွၼ်ၵဝ်ၼႆႉ တင်းၵိၼ်ၶဝ်ႈသေၵေႃႈ ၵႆႉၸၢင်ႊၵိၼ်ၵႃႇၾီႇဢိူဝ်ႈ။ တႃႇမေႃသွၼ်ၼႆႉသေ ဢဝ် ၽွင်ၵႃႇၾီႇဢၼ်မႃးတီႈပၢင်ႇဢူး (မေႇမဵဝ်ႉ)ၼၼ်ႉသေ ၼၢပ်ႈဝႆႉပၼ်တင်းၶေႃၶေႃဢိူဝ်ႈ။ ဢဝ်ဢၼ် ၼၼ်ႉ သေၽေႃႇ (ထႅဝ်ႉ) ၼႃ။

         ဢေးသႃႇၼႆႉ ပဵၼ်လုၵ်ႈႁဵၼ်းၵဝ်ၶႃႈဢိူဝ်ႈ ။ လႆႈပဵၼ်ႁိူၼ်းမႃးတင်းလုၵ်ႈၸၢႆး (တီႈ)ၸဝ်ႈသိုင်ႇသႃး ဢၼ်ၼႆႉဢိူဝ်ႈ။ ၶဝ်သွင်ၵေႃႉၼႆႉ ႁၼ်ၵၼ်တီႈႁူင်းႁဵၼ်းၸၼ်ႉၸွမ် ပီႊၼိူင်ႈၼၼ်ႉသေ ၊ သမ်ႉလႆႈၵၼ်ၵႂႃႇ ၼၼ်ႉၼႃႇ။ မိူဝ်ႈၸူဝ်ႊၶူပ်ႇ ယင်းပႆႇတၼ်းလႆႈ ႑႙- ပီႊတဵမ်လီၵွၼ်ႇၼၼ်ႉ ပေႃးလႆႈလုၵ်ႈဢွၼ်ႇသေဢိူဝ်ႈ။ ပိူဝ်ႈၼႆ ၸင်ႇဢမ်ႇသိုပ်ႇၶိုၼ်ႈႁဵၼ်းသေယဝ်ႉ မႃးၼၢမ်းၼႃႈတီႈသိုင်ႇၶၢႆၼမ်ႉၼဵင်ႈ ၼႆႉဢိူဝ်ႈ။

         “ႁိူၺ်း( - ) ဢေးသႃႇ။ လုၵ်ႈၸၢႆးဢွၼ်ႇမႂ်း လႆႈလၢႆလိူၼ်ယဝ်ႉလႃႇ”

         “ လႆႈၸဵတ်းလိူၼ်ပၢႆယဝ်ႉဢေႃႈ မေႃသွၼ်”

         “ ပေႃးၼႆ ပၼ်ၸိုဝ်ႈတၢင်ႇသဵင်မၼ်းယဝ်ဢိူဝ်ႈၼေႃႈ ”

         “ ၶႂ်ႈဝႃႈတေႃႇၵၼ်ၼႆႉယဝ်ႉ မေႃသွၼ်ဢိူၺ်း။ တေႃႇထိုင်ႇၸင်ႇၼႆႉတႄႉ ၸိုဝ်ႈသဵင်ဢၼ်တၢင်ႇပၼ်ဝႆႉ မၼ်ႈမၼ်ႈၼၼ်ႉပႆႇမႃးၵွၼ်ႇၶႃႈ။ တိုၵ်ႉလိူၵ်ႈဝႆႉယူႇဢေႃႈ။ ဢူႈထဝ်ႈၶဝ်တႄႉ တင်းတၢင်းႁၵ်ႉလူၼ်ႉတေႃႇ ၸၢႆးၸၢႆးသေ ပၼ်ဝႆႉၸိုဝ်ႈႁွင်ႉဝႃႈ  - ဢၢႆႈလူၼ်း ၼႆဢိူဝ်ႈ။ ယႃႊယႃႊၶဝ်တႄႉ တင်းဝႃႈပဵၼ်ဢေလၢၼ် တူၼ်ႈဢွၼ်ႇမၼ်းၼႆသေ သမ်ႉၶႂ်ႈပၼ်ၸိုဝ်ႈဝႃႈပဵၼ်- ႁုင်ႈဝၼ်းသႂ် ၼႆဝႃႈ။ ၸၢႆးၸၢႆးတႄႉ ပဵၼ်လုၵ်ႈၸၢႆး ဝၼ်းဢႃးတိတ်ႉဢိူဝ်ႈ။

         “ မႂ်းလူး။ မႂ်းသမ်ႉပၼ်ဝႆႉၸိုဝ်ႈလုၵ်ႈၸၢႆးဢွၼ်ႇမႂ်း ၸိူဝ်ႉႁိုဝ်”

         “ ဢၼ်ၶႃႈယိင်းပၼ်ဝႆႉ ၸိုဝ်ႈသဵင်မၼ်းတႄႉ - မီး ႓ - ၸိုဝ်ႈဢိူဝ်ႈ”

         “ ႁူး ၊ သမ်ႉပေႉမႃးၼမ်လႃႇ”

         ဢေးသႃႇၼႆႉ ႁူမ်ႊဝႃႈတွပ်ႇလၢတ်ႈတေႃႇ ၵႃႊဢၼ်ၵဝ်ၶႃႈထၢမ်ဝႆႉယူႇၼၼ်ႉသေတႃႉၵေႃႈ သမ်ႉ    ဢမ်ႇတူၺ်းတၢင်းၵဝ်ၶႃႈသႄႈ။ ၵုမ်ႇလဝ်ႇယွၵ်ႇတေႃႇလုၵ်ႈၸၢႆးဢွၼ်ႇမၼ်းဝႆႉဢိူဝ်ႈ။ ၸိတ်းသႂ်ႇတေႃႇဢႅင်ႈ ဢႅဝ်မၼ်းသေ - ပွတ်ႈပၼ်တီႈၾႃႇတိၼ်မၼ်း တင်းလွၺ်းလွၺ်းသေ- ။ ၸူၵ်းၵလိတ်းသႂ်ႇတေႃႇၵိင်ႇႁႄႉ မၼ်းၼႆၵေႃႈ ၶူဝ်ၶိၵ်းၶိၵ်းသေ ……… ၼၼ်ႉၼႃႇ။

         “ ၵွပ်ႈပဵၼ်လုၵ်ႈဝၼ်းဢႃးတိတ်ႉလႄႈ ၼင်ႇႁိုဝ်ပေႃးတေငၢမ်ႇတင်းဝၼ်းမိူဝ်ႈမၼ်းလီၼၼ်ႉ ၶႂ်ႈ ပၼ်ၸိုဝ်ႈဝႃႈ - ဢုမ်ႈၸူမ်း ၼႆဢေႃႈ။ ဢူႈၶဝ်သမ်ႉဝႃႈ ဢမ်ႇလႆႈၸႂ်ၼႆဝႃႈ။ မၼ်းသမ်ႉၶႂ်ႈပၼ်ဝႃႈ ဢွၼ်ႊဢၢမ်း ၼႆဝႃႈ။ ၸိုဝ်ႈလူင်ၼႆႉၵေႃႈ သမ်ႉသုမ်ႇႁူမ်ႇပူၼ်ႉၼႃႇ။ ၵမ်းၼႆႉတႄႉ တင်းလီႁၵ်ႉဢွၼ်ႇသေ ဢွၼ်ၵၼ်ႁွင်ႉ တေႃႇ ၸၢႆးၸၢႆးဝႆႉယူႇဝႃႈ - ဢိူဝ်ႈဢိူဝ်း ၼႆၵွၺ်းဢေႃႈ။ ”

         ဢေးသႃႇၼႆႉ ၼင်ႈလႅၼ်းတိၼ်မၼ်းဝႆႉတီႈၼိူဝ်ၽိူၼ်တင်ႇယၢဝ်းသေယဝ်ႉ သမ်ႉဢဝ်လုၵ်ႈၸၢႆး ဢွၼ်ႇမၼ်း ၼွၼ်းတၢင်ႇဝႆႉတီႈၼိူဝ်ၶႃလူင်မၼ်းၼၢင်းဢိူဝ်ႈ။ ယူႇၵမ်းၼိူင်ႈ သုတ်ႇၼူမ်ပၼ် တီႈၼႃႈ ၽၢၵ်ႇဢွၼ်ႇလုၵ်ႈၸၢႆးမၼ်းသေ။ ၵမ်းၼိူင်ႈမႃးသမ်ႉ ပဝ်ႇပၼ်တီႈတွင်ႉပုမ်မၼ်း ၿူး- ၿူး သေ ႁဵတ်းၼၼ် ယူႇၼၼ်ႉၼႃႇ။

         “ မေႃသွၼ်………။ ပၼ်ၸိုဝ်ႈႁႂ်ႈၸၢႆးၸၢႆးဢွၼ်ႇ ၸိုဝ်ႈၼိူင်ႈၶႃႈလေႃႇ……။”

         “ ဢမ်ႇမေႃပၼ်သင်သႄႈ ……ႁိူၺ်ႉ ”

         တင်းၾင်းထွမ်ႇတေႃႇ ၶေႃႈၵႂၢမ်းလၢတ်ႈတီႈဢေးသႃႇယူႇသေၵေႃႈ ၵဝ်ၶႃႈပဵၼ်ၵႂႃႇ ၸႂ်ဢၼ်ၶႂ်ႈႁူႉ တေႃႇလွင်ႈဢၼ်ၶိင်းႁဝ်း ၊ ဢွၵ်ႇႁဝ်း ၊ ဢူႈႁဝ်း ၊ မႄႈႁဝ်း ၊ ဢူႈဢၢဝ်၊ မႄႈဢႃ ႁဝ်းၶဝ် ႁဵတ်းႁိုဝ်ႁွင်ႉၸိုဝ်ႈ

သဵင်ၵဝ်မႃးၼၼ်ႉယူႇယဝ်ႉဢိူဝ်ႈ။

         “ ၵူၺ်းၵႃႊ ယၢမ်ႈလႆႈလူမႃးၼႂ်းလိၵ်ႈ ဢၼ်ပဵၼ်လၢႆးပၵ်းပိူင် ပၼ်ၸိုဝ်ႈသဵင်ဢၼ်ၼိူင်ႈ ဢၼ်မေႃ လူင်ပူႇသြႃႇသိုဝ်ႇလိၼ်ႉ တႅမ်ႈဝႆႉၼၼ်ႉယူႇဢိူဝ်ႈ။ ပဵၼ်လၢႆးတၢင်းဢဝ်ၵဝ်ႉငဝ်ႈတၢင်ႇယွတ်ႈသေ ပၼ်ၸိုဝ်ႈ သဵင်ၼၼ်ႉယဝ်ႉ။ ၵူၺ်းၼႃႇၵမ်းၼႆႉတႄႉ ပေႃးလိုမ်းၵႂႃႇယဝ်ႉဢိူဝ်ႈ။”

         ၵူၼ်းႁဵတ်းၵၢၼ်ဢွၼ်ႇ တီႈသိုင်ႇၶၢႆၶဝ် ၸိူဝ်းၼၼ်ႉၼႆၵေႃႈ ပၼ်ႇၸႂ်းဝႆႉယူႇတီႈႁိမ်းၵဝ်ၶႃႈယူႇ ဢိူဝ်ႈ။ ပေႃးမီးတၢင်းလူဝ်ႇသေဢၼ်ဢၼ်မႃးၼႆ ဢွၼ်ၵၼ်ပႂ်ႉဝႆႉ တႃႇလႆႈႁဵတ်းပၼ်ၼၼ်ႉယူႇဢိူဝ်ႈ။

         “ မိူဝ်ႈ ၶႃႈယိင်းတိုၵ်ႉၵေႃႉလဵၵ်ႉလဵၵ်ႉၼၼ်ႉတႄႉ တင်းႁိူၼ်းတင်းယေး ဢွၼ်ၵၼ်ႁွင်ႉဝႃႈ - မၢၵ်ႇ  ၽိတ်ႉ ၼႆတင်းႁၵ်ႉႁၵ်ႉပႅင်းပႅင်းယဝ်ႉဢေႃႈ။ ၽိူဝ်ႇယူႇၸွင်းၶိုၼ်ႈႁဵၼ်းမႃး ၸင်ႇဢဝ်ပဵၼ်ၵႂႃႇဢေးသႃႇ  သႅင်ၶမ်း ၼႆ ဢိူဝ်ႈ။ ၵူၺ်းၵႃႊ တႆးၵေႃႉႁဝ်းၶဝ်တႄႉ တိုၵ်ႉဢွၼ်ၵၼ်ႁွင်ႉယူႇဝႃႈ - မၢၵ်ႇၽိတ်ႉၼႆၵွၺ်း    ၼင်ႇၵဝ်ႇယဝ်ႉ။

         “ ႁဵတ်းသင်လႄႈ သမ်ႉဢွၼ်ၵၼ်ႁွင်ႉဝႃႈ - မၢၵ်ႇၽိတ်ႉၼႆလႃႇ ”

         “ ၶႃႈယိင်းၼႆႉ ၵိၼ်ၼူမ်းမႄႈ တေႃႇပေႃးထိုင်ထၢၼ်ႈလႆႈ ႓- ပီႊဢိူဝ်ႈ ၼႆဝႃႈ။ တႃႇတတ်းၼူမ်း ပႅတ်ႈ ၵေႃႈယၢပ်ႇၼႃႇၼႆဝႃႈ။ ၵွပ်ႈၼႆ ၵေႃႉပဵၼ်မႄႈၵဝ်ၶႃႈၵေႃႈ ၸင်ႇလႆႈဢဝ်တင်းမၢၵ်ႇၽိတ်ႉသေ ပွတ်ႈဝႆႉတိင်ႇ ၼူမ်းမၼ်းၼႆယဝ်ႉ။ ၸုပ်ႇၵိၼ်ၼူမ်းမိူဝ်ႈလႂ်ၵေႃႈ ၺႃးၽဵတ်းယူႇတိၵ်းတိၵ်းလႄႈ တင်းလွၺ်းလွၺ်း သေ ယိင်းၵေႃႈၸင်ႇဢဝ်ၶၢတ်ႇၼူမ်းၵႂႃႇလႆႈၼၼ်ႉၼႃႇ _______”

ၵွပ်ႈၼႆသေ ၸင်ႇဢွၼ်ၵၼ်ႁွင်ႉတေႃႇၶႃႈယိင်းဝႃႈ - မၢၵ်ႇၽိတ်ႉ (ၽဵတ်း) ၼၼ်ႉၼႃႇ။  ၵမ်းၼႆႉၸင်ႇဝူၼ်ႉ မႅၼ်ႈၺႃးယဝ်ႉဢိူဝ်ႈ။ တိင်ႇၼူမ်းဢွၼ်ႇၵေႃႉပဵၼ်မႄႈတေမႆႈယၢၵ်ႈပဵၼ်ၵႃႊႁိုဝ်ၼေႃ ____ ”

         ၵွပ်ႈၶေႃႈၵႂၢမ်းမၼ်းသေ ၵဝ်ၶႃႈၵေႃႈတင်းၵိၼ်ၶဝ်ႈဝႆႉယူႇသေၵေႃႈ ပဵၼ်ဢၼ်ယုမ်ႉမႅၼ်ႈၵႂႃႇယူႇ ယဝ်ႉ ဢိူဝ်ႈ။

         မိူဝ်ႈယၢမ်းၼင်ႇၼၼ်ၼၼ်ႉ လုၵ်ႈဢွၼ်ႇၵေႃႈ သမ်ႉႁႆႈဢွၵ်ႇသဵင်မႃး “ဢီးငႄး ၊ ဢီးငႄး ” ယဝ်ႉ။ ဢေးသႃႇသႅင်ၶမ်းၵေႃႈ လဝ်ႇဝွၼ်းပၼ်ယဝ်ႉ။ လုၵ်ႈဢွၼ်ႇတႄႉ ဢၼ်ႁႆႈဢမ်ႇၵိုတ်း။

         “ လုၵ်ႈဢွၼ်ႇၸၢႆးၼႆႉ တွင်ႉမႆႈၼူမ်းလႄႈဝႃႈ - မေႃသွၼ်ဢိူၺ်း တင်းဢုပ်ႇတင်းလၢတ်ႈယူႇသေ ၵေႃႈ ပူတ်းလိတ်ႉပႅတ်ႈမၢၵ်ႇတုမ်ႇသိူဝ်ႈ ဢၼ်မၼ်းၼုင်ႈဝႆႉယူႇၼၼ်ႉတေႃႇတေႁၼ်လႆႈဢမ်ႇႁၼ်လႆႈ ၼၼ်ႉသေယဝ်ႉ တိုၵ်းသွမ်ၼူမ်းပၼ်ယူႇၼၼ်ႉယဝ်ႉ။ လုၵ်ႈဢွၼ်ႇၵေႃႈ တင်းၸုပ်ႇၵိၼ်ၼူမ်းယူႇသေၵေႃႈ  သမ်ႉဢမ်ႇယူႇၼိမ်ၼိမ်သႄႈ။ ၵုမ်ႇတူင်ႉၸၼ်တီႈၼၼ်ႉတီႈၼႆႉဝႆႉယူႇ။ မၢၵ်ႇတုမ်ႇသိူဝ်ႈၵေႃႈ ဢဝ်လူတ်းၵႂႃႇ ပႅတ်ႈၽုတ်ႉၽုတ်ႉယူႇယဝ်ႉ။

         “ ၸၢႆးၸၢႆးၼႆႉ ႁဵတ်းၼႆယဝ်ႉ မေႃသွၼ်ဢိူၺ်း။ တင်းၵိၼ်ၼူမ်းယူႇၵေႃႈ တႃႇမိုဝ်းၶွၼ်ၼိူင်ႈၼႆႉ လူဝ်ႇလႆႈယိပ်းဝႆႉတဝ်ႈၼူမ်းထႅင်ႈၽၢႆႇၼိူင်ႈၸင်ႇဢိူဝ်ႈ။ ယိင်းၵေႃႈ ၵွပ်ႈပဵၼ်လုၵ်ႈၸၢႆးတူၼ်ငဝ်ႈလႄႈ မိူဝ်ႈ  ၸင်ႇတႄႇၼၼ်ႉတႄႉ ႁၢမ်ႉၶႂ်ႈဢၢႆဢၢႆဝႆႉယူႇဢိူဝ်ႈမေႃသွၼ်ၵေႃႈ။ ၵမ်းၼႆႉတႄႉ ဢမ်ႇၸၢင်ႊဢၢႆလႆႈယဝ်ႉသႄႈ။ ၵမ်းၼႆႉၼႆၵေႃႈ ဢၼ်ၵိၼ်ၼူမ်းၼၼ်ႉတႄႉ ဢိတ်းဢိတ်းၵွၺ်း။ ၸၢႆးၸၢႆးၼႆႉ ဢဝ်ႁိူၵ်ႇၶဵဝ်ႈမၼ်းသေ ၶိုတ်ႇ တေႃႇတိင်ႇတဝ်ႈၼူမ်းဝႆႉဢိူဝ်ႈ မေႃသွၼ်ၵေႃႈ။

         ဢေးသႃႇၼႆႉ ယွမ်ယွမ်သေးသေးဢွၼ်ႇၵွၺ်းလႄႈ တီႈၼႂ်းတႃၵဝ်ၶႃႈၼႆႉ ႁၼ်ဝႃႈၼင်ႇလုၵ်ႈ ဢွၼ်ႇၵေႃႉၼိူင်ႈ ယူႇၵွၺ်းယဝ်ႉ။ ၵမ်းၼႆႉၼႆၵေႃႈ လုၵ်ႈဢွၼ်ႇၼႆႉသမ်ႉ လဵင်ႉလုၵ်ႈဢွၼ်ႇသေယဝ်ႉ သမ်ႉပေႃး ၵွၼ်းပႂ်းလုၵ်ႈဢွၼ်ႇဝႆႉယူႇယဝ်ႉလႃႇၼႆသေ ဝူၼ်ႉၶႆႈၸႂ်ဝႆႉယူႇၼၼ်ႉၼႃႇ။ ၵူၺ်းၵႃႊ ဢေးသႃႇၼႆႉတႄႉ ပဵၼ်ဝႆႉ တင်းပိူင်သၢင်ႇတူင်ႉသၢင်ႈမႄႈၵူၼ်းၵေႃႉၼိူင်ႈတေႉတေႉၼၼ်ႉဝႆႉ တင်းတဵမ်ထူၼ်ႈယဝ်ႉ။ တီႈသူပ်းမၼ်းၼႆ ၵေႃႈ တင်းပၢႆႁွင်ႉၼေပၼ်ၵႂၢမ်းဝွၼ်းလဝ်ႇလုၵ်ႈဢွၼ်ႇ တီႈၼၼ်ႉပွတ်းၼိူင်ႈ တီႈၼႆႉ   ပွတ်းၼိူင်ႈသေၵွၼ်ႇ ယူႇဢိူဝ်ႈ။ ယူႇၵမ်းၼိူင်ႈမႃးၵေႃႈ လုၵ်ႈၸၢႆးဢွၼ်ႇမၼ်းဢဝ်ၼွၼ်းလပ်းၵႂႃႇသေ    ယဝ်ႉဢိူဝ်ႈ။

         ၵဝ်ၶႃႈၵေႃႈ တင်းၵိၼ်ၶဝ်ႈသေ ၊ တင်းၵိၼ်ၵႃႇၾီႇမႆႈမႆႈသေ ၊ တင်းတူၺ်းတေႃႇတၢင်းတူင်ႉသၢင်ႈ ဢေးသႃႇ သေ တင်းထွမ်ႇတေႃႇ ၶေႃႈၵႂၢမ်းဢၼ်မၼ်းလၢတ်ႈၼၼ်ႉသေ ……… ၵေႃႈ။ ၶိုၼ်းပဵၼ်ဝူၼ်ႉၶႆႈ ၸွမ်းၵႂႃႇတေႃႇလွင်ႈၸႂ်ၵေႃႉပဵၼ်မႄႈ ဢၼ်ဝႃႈၼႆႉ ပဵၼ်မဵဝ်းၸိူင်ႉၼင်ႇႁိုဝ်ၼေႃးၼႆၼၼ်ႉယဝ်ႉ။

         ပေႃးဝႃႈလုၵ်ႈၸၢႆးဢွၼ်ႇမၼ်းၼွၼ်းလပ်းလီၵႂႃႇယဝ်ႉၼႆၵေႃႈ ဢဝ်ၵႂႃႇပွၺ်ႇၼွၼ်းဝႆႉ တီႈၼႂ်းဢူႇ ဢွၼ်ႇသေယဝ်ႉဢိူဝ်ႈ။ ၶိုၼ်းၼူမ်ပၼ်တီႈၽႅၼ်ႇၼႃႈၽၢၵ်ႇလုၵ်ႈၸၢႆးဢွၼ်မၼ်း ဢၼ်ၼွၼ်းလပ်းမွၺ်ႈ လီဝႆႉၼၼ်ႉ တင်းယွမ်ႈယွမ်ႈဢွၼ်ႇသေဢိူဝ်ႈ။ ၶိုၼ်းၵူမ်ႈယၵ်ႉတူၺ်းဝႆႉယူႇတင်းသၢႆတႃၸိူဝ်ႉၸိုမ်းသေၵွၼ်ႇ ယဝ်ႉ။ လႆႈႁၼ်မႅၼ်ႈ ထၢတ်ႈၸႂ်ၵေႃႉပဵၼ်မႄႈၼၼ်ႉ ယူႇဝႆႉတင်းထၢင်ႇၸႅင်ႈလီငၢမ်းၼႃႇသၵ်းသၵ်းလႄႈ ၵႅၼ်ႇပဵၼ်ဢၼ် မီးၾၢင်ငဝ်းၶိုဝ်ႉၶိုၵ်ႉၼႃႇတေႉၼၼ်ႉယဝ်ႉ။ ယၢမ်းမိူဝ်ႈၼင်ႇၼၼ် တင်းဢၼ်ပၼ်တၢင်း သုတ်ႇၼူမ်ပၼ် တီႈၵႅမ်ႈၼႃႈဢွၼ်ႇလုၵ်ႈၸၢႆးမၼ်းသေၵေႃႈ တင်းဢမ်ႇၽႂ်ႇဢမ်ႇယိူင်းသင်တေႉသေ  ပဵၼ် သုတ်ႇၼူမ်သႂ်ႇတေႃႇတူးတူးဢွၼ်ႇလုၵ်ႈၸၢႆးမၼ်းပႃးၵႂႃႇသျုတ်ႉၼႆသေၵွၼ်ႇယဝ်ႉ။ ႁၵ်ႉတေႃႇလုၵ်ႈၸၢႆး ဢွၼ်ႇၵၢင်တဝ်ႈမၼ်းဝႆႉ ထိုင်ၼႂ်းတပ်းၼႂ်းဢူၵ်းၸႂ်တေႉယဝ်ႉဢိူဝ်ႈၼႆႉ။ (ယႃႇပေထၢင်ႇဝႃႈ လိူင်းဢိူဝ်ႈၼႆ ၼႃႈ ။ တူးတူးဢွၼ်ႇ ဢၼ်ဝႃႈၼႆႉ ပဵၼ်ၶိူင်ႈၸၢႆးဢွၼ်ႇ ဢၼ်ၵိူတ်ႇၵိုၵ်းပႃးလုၵ်ႈၸၢႆးဢွၼ်ႇမၼ်းယဝ်ႉလူး) ။ ယွၼ်ႉၵွပ်ႈလႅၼ်ႊသၢႆႁၼ်ဢွၼ်ႇဢၼ်ၼႆႉသေ တီႈၼႂ်းၸႂ်ၵဝ်ၶႃႈၼႆႉ လႆႈပဵၼ်ၵႂႃႇပႅတ်ႈၶလိုၵ်း ၼႆယူႇ ယဝ်ႉ။

         သႅၼ်ႇငိုၼ်း (ၸၢႆႇၵႃႊ) ပၼ်သေယဝ်ႉ မိူဝ်ႈဢၼ်ၶိုၼ်းဢွၵ်ႇမႃးၼၼ်ႉ တင်းၶီႇလူတ်ႉၶိုင်ႈသေၵေႃႈ- ၶုၵ်းၸႂ်လႆႈမႅၼ်ႈတေႃႇ  တၢင်းဝူၼ်ႉဢၼ်ဝႃႈ - မိူဝ်ႈၵဝ်ၵေႃႉလဵၵ်ႉလဵၵ်ႉၼၼ်ႉလူးၼႆသေ လႅၼ်ႈၵႂႃႇၶုၵ်းၸႂ်လႆႈ တေႃႇမႄႈၵဝ်ၶႃႈယူႇယဝ်ႉ။ ၸႂ်ဢၼ်ၶႂ်ႈထၢမ်တေႃႇ လွင်ႈတၢင်းမၼ်း ဢၼ်ၶႂ်ႈႁူႉၼၼ်ႉလႂ်ၵေႃႈပဵၼ်မႃးယဝ်ႉ ။ တႃႇဝၼ်းတင်းလႃႈဝၼ်း တေႃႇမိူဝ်ႈသွၼ်လိၵ်ႈဝႆႉယူႇၼၼ်ႉၵေႃႈ ၸႂ်ၵဝ်ၶႃႈၼႆႉ ဢဝ်ၽႅဝ်ဝႆႉယူႇတီႈ မႄႈ ၵဝ်ၶႃႈဝႆႉယူႇဢိူဝ်ႈ။ ၵွပ်ႈၼႆ ၽွင်းႁူဝ်ၶမ်ႈ ၸဵတ်းမူင်း ပေႃးဝႃႈၶၢဝ်းယၢမ်းသွၼ်လိၵ်ႈယဝ်ႉၵႂႃႇယဝ်ႉၼႆၵေႃႈ ဢမ်ႇၵႂႃႇတီႈဢွင်ႈဢၼ်သဵၼ်း(ၶဵၼ်း)ၵၼ်ဝႆႉ တင်းၸိူဝ်းတႆးၵေႃႉၶဝ်ၼၼ်ႉသေ ပွၵ်ႈဝၢႆႇမႃးၶိုၼ်းတၢင်း ႁိူၼ်းၵမ်းသိုဝ်ႈယူႇယဝ်ႉ။ ၵမ်ႈၼမ်ၼမ်တႄႉ ႁမ်ႉၶႂ်ႈၵူႊႁူဝ်ၶမ်ႈယဝ်ႉ တင်းၸိူဝ်းတႆးၵေႃႉသေၵေႃႉၵေႃႉ ဢၼ် ပဵၼ်မေႃသွၼ်ၼင်ႇၵၼ်ၶဝ်ၼၼ်ႉသေ ႁူပ်ႉထူပ်းပိၼ်ႇဝၢႆႇလဵင်ႉလူၵၼ်လႄႈ တႃႇ တႃႇၶဝ်ႈၶမ်ႈၼၼ်ႉ ဢမ်ႇ သူႈပဵၼ်ၵိၼ်တီႈႁိူၼ်းသႄႈ။ တေႃႇၽႅဝ်ႁိူၼ်းၼႆၵေႃႈ မိူဝ်ႈလႂ်ပေႃးၶမ်ႈ ႑႐ - မူင်းပၢႆၵႂႃႇ ၸင်ႇလႆႈၵႆႉၽႅဝ် ၶိုၼ်းၼၼ်ႉယဝ်ႉ။ (တႃႇမိူဝ်ႈၼႆႉတႄႉ) တေႃႇလုၵ်ႈၸၢႆးဢၼ်ပွၵ်ႈၶိုၼ်းၽႅဝ်ႁိူၼ်းမႃးၸဵမ်ၸဝ်ႉၼႆႉ ၵေႃႉပဵၼ် မႄႈ လႆႈပဵၼ်ဢၼ်ဢၢမ်းလူင်ဝႆႉယူႇယဝ်ႉဢိူဝ်ႈ။

         “ မႄႈ ။ ၵိၼ်ၶဝ်ႈယဝ်ႉယဝ်ႉႁႃႉ ………”

         ၵေႃႉပဵၼ်မႄႈ တင်းယုမ်ႉလူင်သေ ၶိုၼ်းတွပ်ႇမႃးဝႃႈ -

         “ ၵဝ် ဢမ်ႇၵိၼ်ၶဝ်ႈတႃႇၶမ်ႈၼႆႉ ပေႃးႁိုင်ၼႃႇယဝ်ႉဢိူဝ်ႈ မႂ်း။ ဢဝ် (ၵမ်ႊ)သိၼ် ၵူႊဝၼ်းဢိူဝ်ႈ။ လႆႈ သိၼ်ပၼ်ႈ (ၵမ်ႊလီ) ယဝ်ႉလေႃႇ”

         တေႃႇလွင်ႈတၢင်းၸိူဝ်းၼႆႉၼႆႈ ၵဝ်ၶႃႈဢမ်ႇတၼ်းႁူႉမႃး ။ ယူႇၼႂ်းၸူဝ်ႊပၢၼ်မေႃသွၼ် သွၼ်ပၼ် လိၵ်ႈသေ ၽိူဝ်ႇလႆႈၸိုဝ်ႈဢွၼ်ႇမႃးယဝ်ႉၼႆၵေႃႈ တႆးၵေႃႉတႆးသေႈၵေႃႈၸေးလီမႃးၼၼ်ႉၼႃႇ။ ၵူႊႁူဝ်    ၶမ်ႈ ၊ ၵူႊႁူဝ်ၶမ်ႈ ၵုမ်ႇပဵၼ်ၵႂႃႇတၢင်းၼၼ်ႉတၢင်းၼႆႉသေ။ မိူဝ်ႈလႂ် ပေႃးၸမ်ၶၢဝ်းယၢမ်းၼွၼ်းမႃး ၸင်ႇပွၵ်ႈမႃး ယဝ်ႉ။ ၵၢင်ၼႂ်ၼႆၵေႃႈ သမ်ႉလႆႈလုၵ်ႉၸဝ်ႉသေ - ၵႂႃႇသွၼ်လိၵ်ႈ။ လႆႈဝႃႈ- ယူႇတီႈႁိူၼ်းယူႇသေယဝ်ႉ ဢဝ်ၵႆဝႆႉ တင်းႁိူၼ်းၼၼ်ႉဢိူဝ်ႈ။ ၵဝ်ၶႃႈၼႆႉ ပဵၼ်ဝႆႉၼင်ႇၼႆလႄႈ-

         “ လုၵ်ႈၸၢႆး လႆႈၵိၼ်သင်မႃးယဝ်ႉလႃႇ”

         ၵဝ်ၶႃႈ သၼ်ႇႁူဝ်ၼေပၼ်ၵႂႃႇသေဢေႃႈ-

         လုၵ်ႈယိင်းဢိူၺ် - ဢၢႆႈၽူင်းပႆႇလႆႈၵိၼ်ၶဝ်ႈသင်မႃးၼႆဝႃႈ။ မႃးႁဝ်းၶပ်ႉၶိုင်ပၼ် တႃႇၶဝ်ႈၶမ်ႈမၼ်း သေဢၼ်ဢၼ်”

         မႄႈၵဝ်ၶႃႈ ႁွင်ႉလၢတ်ႈၼေတေႃႇၵေႃႉ ပဵၼ်မေးႁၵ်ႉၵဝ်ၶႃႈ ယိင်းၶိူဝ်းဢွၼ်ႇၼၼ်ႉသေဢိူဝ်ႈ။ ယၢမ်း မိူဝ်ႈတိုၵ်ႉလၢတ်ႈၵႂႃႇယူႇၼင်ႇၼၼ်ၼၼ်ႉ မႄႈၵဝ်ၶႃႈ ပေႃးၽႅဝ်ႁွတ်ႈၵႂႃႇ ၼႂ်းႁွင်ႈၽီးၾႆး (သိုင်ႇမိုဝ်ႉ)ဝႆႉယူႇ ယဝ်ႉ။ ၶိူဝ်းဢွၼ်ႇၵေႃႈ ႁၢင်ႈႁႅၼ်းပၼ်ၽိူၼ်ၶဝ်ႈၽၵ်းယဝ်ႉ။ မႄႈသမ်ႉၶိုင်ၼမ်ႉမႆႈပၼ်တႃႇၵဝ်ၶႃႈယဝ်ႉ။

         မိူဝ်ႈဢၼ် ၵဝ်ၶႃႈၼင်ႈၵိၼ်ၶဝ်ႈဝႆႉယူႇၼၼ်ႉ ၵေႃႉပဵၼ်မႄႈၵဝ်ၶႃႈသမ်ႉ ၼင်ႈတီႈႁိမ်းသေယဝ်ႈ တူၺ်းဝႆႉယူႇ တင်းယၵ်ႉယဵင်းၼၼ်ႉယဝ်ႉ။ တီႈႁိမ်းၸမ်မႄႈၼၼ်ႉၵေႃႈ ၶိူဝ်းဢွၼ်ႇၵေႃႈမီးဝႆႉယူႇယဝ်ႉ။

         “ ၵဝ်ၶႃႈ မီးတႃႇလၢတ်ႈတေႃႇမႄႈႁဝ်းလႄႈဢိူဝ်ႈ ___။ ဢၼ်ၶႂ်ႈထၢမ်တေႃႇၵေႃႈမီးယဝ်ႉ။ ၵွပ်ႈၼႆ  ၸင်ႇလႆႈပွၵ်ႈမႃးၶိုၼ်းႁိူၼ်းတင်းၸဝ်ႉၼႆႉယဝ်ႉ။”

         ၶေႃႈၵႂၢမ်းၶႃႈၼႆႉ လႅပ်ႈသၢင်ႇပဵၼ်ၵႂႃႇ တၢင်းလၢၵ်ႇလၢႆလူင် တေႃႇတီႈၼႂ်းႁူမႄႈၵဝ်ၶႃႈၼၼ်ႉယူႇယဝ်ႉ။ မႄႈၵေႃႈၸင်ႇဢဝ်တင်းတၢင်းတူၺ်းမႃးတေႃႇၵဝ်ၶႃႈၶိုၼ်း တင်းတၢင်းတူၺ်းသႂ်ႇ ၼင်ႇဝႃႈ ပဵၼ်ဢီႈ သင်လူင်ၼၼ်ႉဢိူဝ်ႈ။ ၵဝ်ၶႃႈၵေႃႈ ၶိုၼ်းလၢတ်ႈၼေပၼ်ၵႂႃႇ ၶပ်းၶပ်းပွင်ပွင်တေႃႇလွင်ႈတၢင်းဢေးသႃႇ သႅင်ၶမ်း ဢၼ်လႆႈႁၼ်မႃးမိူဝ်ႈၵၢင်ဝၼ်းၼၼ်ႉသေဢိူဝ်ႈ။ မႄႈၵေႃႈ တင်းယုမ်ႉလူင်သေယဝ်ႉ ၾင်းထွမ်ႇဝႆႉ ယူႇယဝ်ႉဢိူဝ်ႈ။

         “ မႄႈႁဝ်း ၶႂ်ႈႁူႉၵေႃႈ။ ဢေးသႃႇၼႆႉ တင်းပၼ်တၢင်းသုတ်ႇၼူမ်တေႃႇလုၵ်ႈၸၢႆးဢွၼ်ႇမၼ်းသေ ၵေႃႈ ပၢႆၼူမ်သႂ်ႇတူးတူးဢွၼ်ႇလုၵ်ႈၸၢႆးမၼ်း - သျုတ်ႉ ၼႆသေၵွၼ်ႇဢိူဝ်ႈ - မႄႈ။ မိူဝ်ႈၵဝ်ၶႃႈၵေႃႉလဵၵ်ႉလဵၵ်ႉ ၼၼ်ႉလူး ………။ မိူၼ်ၼႆၼင်ႇၵဝ်ႇၶႃႈႁႃႉ ………။

         ၵွပ်ႈၵႂၢမ်းလၢတ်ႈၵဝ်ၶႃႈသေယဝ်ႉ ၵေႃႉပဵၼ်မႄႈပေႃးၶူဝ်လူင်ၵႂႃႇတင်းထိုင်ဢူၵ်းထိုင်ၸႂ် ယဝ်ႉဢိူဝ်ႈ။

         “ ၸၢႆးၵဝ်ဢိူၺ်___။ ၵူႊဢၼ်ၵိူတ်ႇပဵၼ်လဵင်ႉမႃးလုၵ်ႈလၢင်းၸၢႆးယိင်းၵူႊၵေႃႉၼၼ်ႉ ၸဵမ်ၸွၵ်ႉ ၸဵမ်ၸဵင်ႇ ၵူႊဝၢင်ႈၵူႊငၢမ်ႈ ၵူႊငၢပ်ႇ ဢမ်ႇၵိုတ်း တင်းႁဵတ်းပၼ်မူတ်းသႂ်သႅၼ်ႈၸၢင်ႇသေၵေႃႈ ဢဝ်တင်း ႁႅင်းႁုင်ႈၸႂ်ၸေႃးလမ်းၼႂ်းတၢင်းဢၼ်ႁၵ်ႉၼၼ်ႉသေ ၼႂ်းၸႂ်ပဵၼ်မႃးၶိုၼ်ႉၶၢၼ်ႉသေယဝ်ႉ ပဵၼ်သုတ်ႇၼူမ် သႂ်ႇတီႈၼႃႈၽၢၵ်ႇသေလႂ် ၊ တီႈၵႅမ်ႈၼႃႈဢွၼ်ႇသေလႂ် ၊ တီႈသၼ်ၶူလင်ဢွၼ်ႇသေလႂ်။ မၢင်ႊၽဝ်ႇမၢင်ႊ လႂ်ၼႆၵေႃႈ ယင်းပၢႆသုတ်ႇၼူမ်သႂ်ႇ တီႈၶႆႇဢွၼ်ႇတူးတူးသေၵွၼ်ႇဢိူဝ်ႈ။ တေႃႇပွတ်းတွၼ်ႊတူၼ်တူဝ် ၵူႊၸၢႆး ၵူႊယိင်း လုၵ်ႈမႄႈၵူႊတီႈတီႈ ၊ တင်းတူဝ်ၼၼ်ႉ မႄႈယၢမ်ႈၼူမ်သုတ်ႇယူႇယဝ်ႉလေႃႇ။ ဢမ်ႇၸႂ်ႈ ၵွၺ်းတီႈၼႃႈၽၢၵ်ႇယဝ်ႉ၊ တေႃႇလုၵ်ႈလၢင်း ၸၢႆးယိင်းယေႈၵေႃႉယေႈၵေႃႉၼႆႉ မိူဝ်ႈဢၼ်ၶဝ်တႄႇမိင်ႇၶီႈ ဢႃႇဢွၵ်ႇမႃး ပွၵ်ႈၵမ်းဢွၼ်တၢင်းသုတ်းၼၼ်ႉၼႆ ၊ မႄႈဢဝ်မိုဝ်းတီႉသႂ်ႇ ၶီႈဢႃႇၼၼ်ႉသေယဝ်ႉ သမ်ႉဢဝ် ၶူႈလင်ႊ ၼူမ်တဵမ်းႁူႉတေႃႇဢၢႆႊသႅဝ်မၼ်းၼႆၵေႃႈ ပဵၼ်လၢႆလၢႆပွၵ်ႈၵွၼ်ႇယဝ်ႉဢိူဝ်ႈ။ တေႃႇၶီႈဢႃႇဢၼ်ꧠီႈ ဢွၵ်ႇမႃး ယွၼ်ႉၵွပ်ႈလႆႈၵိၼ်ၼူမ်းတီႈၵေႃႉပဵၼ်မႄႈၼၼ်ႉ ၵူႊၶီႈဢႃႇၸိူဝ်းၼၼ်ႉ ဢမ်ႇဢီႈယင်သေဢမ်ႇ ၵႃး ၼႂ်းၸႂ်ယင်းပၢႆပဵၼ် ဢၼ်ႁၢၼ်ႉၸႂ်ဝႆႉယူႇသေၵွၼ်ႇဢိူဝ်ႈ။ ၵမ်းၼႆႉၸင်ႇ မႂ်းမႃးထၢမ်ယူႇလွင်ႈတၢင်းၸိူဝ်း ၼႆႉၼေႃ_____။

         ႁူမ်ႊဝႃႈ ၵေႃႉပဵၼ်မႄႈ တွပ်ႇလၢတ်ႈပၼ်မႃး တင်းၽဵင်ႈၽဵင်ႈဢွၼ်ႇသေတႃႉၵေႃႈ တီႈၼႂ်းၸႂ်ၵဝ် ၶႃႈတႄႉ လႆႈပဵၼ်ဢၼ်တိူဝ်ႉဝၢတ်ႇၺႃးၵႂႃႇၼၼ်ႉ တေႉယူႇယဝ်ႉဢိူဝ်ႈ။

         တၢင်းႁၵ်ႉဢၼ်ဝႃႈၼႆႉ ပဵၼ်တႃႇပုၼ်ႈတူဝ်ၵဝ်ႇႁၢမ်ႉၼမ်ၼမ်သေ ပုၼ်ႈတႃႇမၼ်းတႄႉ ဢမ်ႇပေႃး ၶႂ်ႈပႃးသင်သႄႈ ____။

         တၢင်းႁၵ်ႉၽႂ်ႇ (မဵတ်ႈတႃႇ) ဢၼ်ဝႃႈၼၼ်ႉၸမ်း တႃႇပုၼ်ႈတူဝ်ၵဝ်ႇတႄႉဢေႇဢေႇသေ  တႃႇပုၼ်ႈ မၼ်းၼၼ်ႉၼမ်ၼမ်ဢိူဝ်ႈ___။

         တၢင်းႁၵ်ႉၼႆႉသမ်ႉ လွင်ႈဝၵ်ႉဢဝ်ၼႆႉၼမ်ၼမ် ၊ လွင်ႈပၼ်ႁႂ်ႈသမ်ႉဢေႇဢေႇယဝ်ႉ။

         တၢင်းႁၵ်ႉၽႂ်ႇ (မဵတ်ႈတႃႇ) သမ်ႉ လွင်ႈပၼ်ႁႂ်ႈၼႆႉ ၼမ်ၼမ်သေ လွင်ႈဢဝ်ၼႆသမ်ႉဢေႇဢေႇယဝ်ႉ။

         တၢင်းႁၵ်ႉၼႆၼၼ်ႉ လွင်ႈမႆႈလိူတ်ႇသမ်ႉၼမ်ၼမ်သေ ၊ လွင်ႈၵတ်းယဵၼ်သမ်ႉဢေႇဢေႇယဝ်ႉ။

         တၢင်းႁၵ်ႉၽႂ်ႇၼႆၼၼ်ႉ လွင်ႈၵတ်းယဵၼ်သမ်ႉၼမ်ၼမ်သေ ၊ လွင်ႈမႆႈလိူတ်ႇႁွၼ်ႉသမ်ႉ ဢူၼ်ႈ ဢူၼ်ႈဢွၼ်ႇဢွၼ်ႇယဝ်ႉ။

         တၢင်းႁၵ်ႉဢၼ်ဝႃႈၼႆႉ လွင်ႈတႃႇမူၼ်ႊသိူဝ်းၸႂ်တူဝ်ၵဝ်ႇသမ်ႉၼမ်ၼမ်သေ ၊ လွင်ႈမူၼ်ႊသိူဝ်း ပုၼ်ႈမၼ်းသမ်ႉ ၶႂ်ႈဢေႇဢေႇယဝ်ႉ။ 

         တၢင်းႁၵ်ႉၽႂ်ႇ (မဵတ်ႈတႃႇ) ဢၼ်ဝႃႈၼႆႉတႄႉ တႃႇလွင်ႈသိူဝ်းၸႂ်ပုၼ်ႈမၼ်းၼၼ်ႉၼမ်ၼမ်သေ တႃႇတူၺ်းတူဝ်ၵဝ်ႇတႄႉ မွၵ်ႈယူႇႁၢၼ်ႉၸႂ်ဝႆႉၼၼ်ႉၵွၺ်းယဝ်ႉ။

         တၢင်းႁၵ်ႉဢၼ်ဝႃႈၼႆႉ ပေႃးဢမ်ႇလႆႈၼႆ ၸင်းဢိူဝ်ႈ။ ပေႃးလႆႈၼႆၵေႃႈ သိူဝ်းၸႂ်ဝႆႉၼၼ်ႉၼႃႇ။

         လုၵ်ႈလၢင်းၸၢႆးယိင်းၶဝ်ၼႆႉ ႁၵ်ႉတေႃႇဢူႈမႄႈၶဝ်ဢိူဝ်ႈ။ ၵူၺ်းၵႃႊ ဢမ်ႇၸၢင်ႊမေႃဝႆႉ တၢင်းႁၵ်ႉၽႂ်ႇ တေႃႇသႄႈ။

         ၸိူဝ်းဢူႈမႄႈၶဝ်တႄႉ ႁၵ်ႉၵေႃႈႁၵ်ႉတေႃႇလုၵ်ႈလၢင်းၸၢႆးယိင်းၶဝ်သေယဝ်ႉ ၊ ၸႂ်ႁၵ်ႉၽႂ်ႇ (မဵတ်ႈတႃႇ) ၵေႃႈဝႆႉပၼ်လႆႈဢိူဝ်ႈ။

         ၵဝ်ၶႃႈလႆႈႁူႉႁၼ်မႅၼ်ႈၵႂႃႇ လွင်ႈတၢင်းၶေႃႈမၢႆ ဢၼ်ပႅၵ်ႇပိူင်ႈၵၼ် ဢွၼ်ႇ မၢင်ႊၽွင်ႈ ဢၼ်ပဵၼ်ဝႆႉ တင်းဢူၼ်ႈဢွၼ်ႇဢွၼ်ႇ တီႈတၢင်းႁၵ်ႉ လႄႈ တၢင်းႁၵ်ႉၽႂ်ႇၼၼ်ႉသေယဝ်ႉဢိူဝ်ႈ။

         မိူဝ်ႈယၢမ်းၼၼ် ၵဝ်ၶႃႈပေႃးလႆႈၸူဝ်ႊၶူပ်ႇယႂ်ႇၶၢဝ်ႉယဝ်ႉလူး ။ 

လုင်းၸၢႆးၾႃႈ (ၵဵပ်းႁွမ်တွမ်ႊတႅမ်ႈဝႆႉပၼ်)

<nowiki>*</nowiki> (႑႓: ႔႐) သုၵ်း ။ (႐႖. ႐႙ . ႒႐႒႔) လ.တ.လ - တ.လ.ၽ *

<nowiki>*</nowiki> ၽ . ၶ (ဝ. လ) - ႑႘. ႑႒ . ႒႐႒႐, (ၸူဝ်ႊၶၢဝ်းႁႃႊပွတ်ႇၶႅင်)*

[[Category:General Knowledge]]
[[Category:တၢင်းႁူႉ]]