လိၵ်ႈပိုတ်ႇပၼ်ပိုၼ်ႉႁူႉ မၢႆသီႇ/လမ်ႉၵတ်ႉမေႃသွၼ် ဢမ်ႇၸႂ်ႈလွင်ႈပူင်သွၼ်မဵဝ်းလဵဝ်ၵွၺ်း

တီႈပွတ်းတွၼ်ႊ ၾၢႆႇပူင်သွၼ်ၼႆ  ၵမ်းၼႆႉ လႆႈႁၼ်မီးမႃး လွင်ႈလႅၵ်ႈလၢႆႊၸူးၽၢႆႇလွင်ႈပူင်သွၼ် ဢၼ်ဝႆႉလုၵ်ႈႁဵၼ်းၶဝ် ပဵၼ်သုၼ်ၵၢင်ႊသေ ပူင်သွၼ်ၼၼ်ႉမႃးယဝ်ႉ။ ၼႂ်းၵႃႊၸိူဝ်းၼၼ်ႉၼႆႉ လႆႈႁၼ်ၾၢႆႇလၵ်းႁဵၼ်း ၶဝ်ၼႆၵေႃႈ ယုၵ်ႉထၢၼ်ႈမၼ်း ႁႂ်ႈသုင်ၶိုတ်းၵၢပ်ႈမႃးဝႆႉၼၼ်ႉယဝ်ႉ။ တေႃႇဢၼ်ၼႆႉၼႆႉ ၸိူဝ်းမေႃသွၼ် ဢၼ်ပူင်သွၼ် ပဵၼ်ဝႆႉ ၶဝ်ၸိူဝ်းၼၼ်ႉသမ်ႉ ဢဝ်တင်းလၢႆးပိူင်မဵဝ်းလႂ်သေ ပူင်သွၼ်ပၼ်ဝႆႉယူႇ ဢၼ်ဝႃႈၼၼ်ႉၵေႃႈ ပႃးၼႂ်း ၶေႃႈလမ်ႇလွင်ႈ မၼ်းမႃးဝႆႉယူႇယဝ်ႉ။ ၼႂ်းၵႃႊလွင်ႈတႄႇတင်ႈ ပူၵ်းပွင်ၸိုင်ႈမိူင်းၼၼ်ႉ မၼ်းပႃးဝႆႉၵူၼ်းၸိူဝ်း မီးပၺ်ႇၺႃႇ တၢင်းႁူႉမေႃၶဝ် ဝႆႉသေၵွၺ်းဢမ်ႇၵႃး၊ တီႈတႂ်ႈဢၼ်ဝႃႈ တၢင်းႁူႉမေႃပၺ်ႇၺႃႇၼႆၼၼ်ႉ မေႃသွၼ်ဢၼ်ၸိူဝ်း ပၼ်တၢင်းႁူႉမေႃႁႂ်ႈၶဝ်ၼႆႉ သမ်ႉပဵၼ်ဝႆႉငဝ်ႈပိုၼ်ႉႁၢၵ်ႈႁိၼ်လူင်မၼ်းယူႇယဝ်ႉ။ ပေႃးတင်းဝႃႈ တီႈၼႂ်းၸိူဝ်းမေႃသွၼ်ၸၢႆး၊ မေႃသွၼ်ယိင်းၶဝ် မၢင်ႊၸိူဝ်းၼႆႉ လႆႈမီးဝႆႉတၢင်းၸုတ်ႈယွမ်းႁႅင်းဢႄႇ တီႈၾၢႆႇလွင်ႈတိုဝ်းၵမ်ႊၶဝ်ၼႆ လုၵ်ႈႁဵၼ်းဢွၼ်ႇၶဝ်သမ်ႉ တေၸၢင်ႊယိူင်ႈဢဝ် ႁဵၼ်းၽိတ်းမႅၼ်ႈယူႇ  ဢမ်ႇႁၢင်ႉယဝ်ႉ။ ပေႃးၸွမ်းဢဝ်ၼင်ႇ ၾၢႆႇပၢႆးလႅင်ႊၸႂ်ၶဝ်ဝႃႈတႄႉ ၼႂ်းၵႃႊၶေႃႈမၢႆၸိူဝ်းဢၼ်ပဵၼ်ဝႆႉယူႇ မူၼ်ႉမႄးၼၼ်ႉဢိူဝ်ႈ။ ဢိင်လူၺ်ႈလွင်ႈၸိူဝ်းၼႆႉသေယဝ်ႉ  သမ်ႉလႆႈႁူႉဝႆႉၼင်ႇၼႆၽွင်ႈ ယဝ်ႉ။

လမ်ႉၵတ်ႉဢၼ်ထုၵ်ႇလႆႈမီး တႃႇမေႃသွၼ်လီၵေႃႉၼိူင်ႈၼႆႉ ပဵၼ်သင်လၢႆလၢႆ။ လွင်ႈတႃႇလဵပ်ႈႁဵၼ်းၶႃးၸႃး သွၼ်ဢဝ်ၾၢႆႇပၢႆးပၺ်ႇၺႃႇၼႆႉ  မၼ်းလမ်ႇလွင်ႈတႃႇ မေႃသွၼ်ၵေႃႉၼိူင်ႈတၢၼ်ႇႁိုဝ်။ ၸိူဝ်းၼႆႉၼႆႉ ပဵၼ်တႅၼ်းပိူင်လူင် မၼ်းယဝ်ႉ။

ၸဝ်ႈႁူႉမေႃၵူႊၾၢႆႇၾၢႆႇၶဝ်တႄႉ ဢွၼ်ၵၼ်တႅမ်ႈမၢႆၶဵၼ်ႇဢွၵ်ႇမႃး ၵူႊမဵဝ်းမဵဝ်းဢိူဝ်ႈ။ ပေႃးၵပ်းၵၢႆႇတင်း မေႃသွၼ်လီၵေႃႉၼိူင်ႈသေတႄႉ ဢိင်ၼိူဝ်ၶိူဝ်းၼႆႉမိူင်းၼႆႉ တင်းတၢင်းၶွင်ႈၶမ် ဢၼ်လႆႈႁူပ်ႉထူပ်းမႃး ၸွမ်းၼင်ႇတၢင်းတူဝ်ထူပ်းသေ ၸၢင်ႊဝႃႈၼေလႆႈၼင်ႇၼႆဢိူဝ်ႈ။ ၼႂ်းၵႃႊတင်းၼမ်လၢႆလူင်ၼၼ်ႉ-

မေႃသွၼ်ၵေႃႉၼိူင်ႈၼႆႉ တၵ်းတေလႆႈပဵၼ် ၸဝ်ႈတူၼ်လၵ်းၸဵင်တႅၵ်ႈၼၢမ်း ၼၼ်ႉဢိူဝ်ႈ။ တေလႆႈပဵၼ်ၽူႈၵေႃႉ ဢၼ်လဵပ်ႈႁဵၼ်း ၶႃးၸႃးသွၼ်ဢဝ်ဝႆႉ ၾၢႆႇပၢႆးႁူႉမေႃယူႇတႃႇသေႇၼၼ်ႉဢိူဝ်ႈ။ တေလႆႈပဵၼ်ၽူႈၵေႃႉ ဢၼ်လူလိၵ်ႈၽိုၼ်လၢႆးဝႆႉယူႇတႃႇသေႇၼၼ်ႉဢိူဝ်ႈ။ မိူဝ်ႈဢၼ်ပူင်သွၼ်ပၼ် လိၵ်ႈၼၼ်ႉၼႆ ၼင်ႇႁိုဝ်ပေႃးတေ ၶိုတ်းၵၢပ်ႈပၢၼ်လႆႈယူႇတႃႇသေႇၼၼ်ႉလႄႈ ၼင်ႇႁိုဝ်ၾိင်ႈတႅတ်ႈၶဝ်၊ တၢင်းႁပ်ႉႁၼ်ၶဝ်၊ ပၢႆးဝူၼ်ႉၼပ်ႉႁၼ်ၶဝ် ၸိူဝ်းၼႆႉတင်းသဵင်ႈ ပေႃးတေဢမ်ႇၶၢတ်ႇႁၢင်ႇတေႃႇ တင်းဢၼ်ပဵၼ်ဢွၵ်ႇမႃး ၸိူဝ်းၵမ်းလိုၼ်းၼၼ်ႉၵႂႃႇၵေႃႈ တေလႆႈလဵပ်ႈႁဵၼ်းၶႃးၸႃးဢဝ်ပၺ်ႇၺႃႇဝႆႉယူႇဢိူဝ်ႈ။ ပေႃးၶႃးၸႃးႁႃႁဵၼ်းဢဝ်ဝႆႉယူႇၼင်ႇၼႆ ၸင်ႇတေၸၢင်ႊပူင်သွၼ်ပၼ် ႁႂ်ႈလုၵ်ႈႁဵၼ်းၶဝ်လႆႈလီယဝ်ႉဢိူဝ်ႈ။ ၵူၺ်းၵႃႊမေႃသွၼ် မၢင်ႊၸိူဝ်းၸိူဝ်းၶဝ်သမ်ႉ ဢွၼ်ၵၼ်ထတ်းႁၼ်ယူႇဝႃႈ လမ်ႉၵတ်ႉၶဝ်ၼႆႉ တဵမ်ထူၼ်ႈဝႆႉယဝ်ႉဢိူဝ်ႈၼႆၼႆႉ ႁၢမ်ႉတိူဝ်းၼမ်ဢိူဝ်ႈ။ ၶႂ်ႈပဵၼ်ပၢႆးႁဵၼ်းဢၼ်လႂ်ၵေႃႈလီပေႉလႆႈယဝ်ႉ တဵမ်ထူၼ်ႈတႅပ်ႈလီယဝ်ႉၼႆ ဢမ်ႇမီး။ ယိုင်ႊလဵပ်ႈႁဵၼ်း ယိုင်ႊတေလႆႈႁၼ် ဢၼ်ထုၵ်ႇလီလႆႈႁူႉ ၶဝ်မီးမႃးထႅင်ႈ၊ ပွင်ႇဝႃႈ တိုၵ်ႉမီးဢၼ်ပႆႇႁူႉ၊ ဢၼ် ပႆႇႁူႉၼၼ်ႉသမ်ႉ ပဵၼ်ဝႆႉတႃႇသိုပ်ႇႁဵၼ်းႁူႉယူႇၼၼ်ႉယဝ်ႉ။ ၵၢပ်ႈပၢၼ်ယၢမ်းလဵဝ်ၼႆႉ ပေႃးဝႃႈ လႆႈ ႁူႉမႃးတၢၼ်ႇတၢၼ်ႇယဝ်ႉၼႆ  ဢၼ်တႅမ်ႇဝႆႉတၢၼ်ႇတၢၼ်ႇဢွၼ်ႇၼၼ်ႉ ဢဝ်ႁဵတ်းပဵၼ်တၢင်းႁၢၼ်ႉၸႂ်ပဵင်းပေႃးသေယဝ်ႉ ထၢင်ႇႁၼ်ၵႂႃႇဝႃႈ တဵမ်လီတေႉယဝ်ႉၼႆ ပႅတ်ႈဢိူဝ်ႈ။ ( တီႈတေႉမၼ်းၼႆႉ ၸၢင်ႊပဵၼ်ငူၼ်ႉသၢၼ်မဵဝ်းၼိူင်ႈ ပႅတ်ႈဢိူဝ်ႈၼႃႈ။)

ထႅင်ႈၶေႃႈၼိူင်ႈသမ်ႉ တေလႆႈပဵၼ် ၽူႈၵေႃႈဢၼ်မီး တၢင်းမေႃဝူၼ်ႉၶႆႈၸႂ်ဢိူဝ်ႈ။ မီးပၢႆးဝူၼ်ႉႁၼ်လႆႈၼၼ်ႉဢိူဝ်ႈ။ တူဝ်ယၢင်ႇမၼ်း- မိူၼ်ၼင်ႇ လွင်ႈတၢင်းၸူဝ်ႊပၢၼ်လႂ်၊ လွင်ႈမူႇမုၵ်ႉၸုမ်းၽုင်ၵေႃၶဝ်လႂ်၊ ၸိူဝ်းၼႆႉသေ တေလႆႈမီးလမ်ႉၵတ်ႉဢၼ်ၸၢင်ႊဝူၼ်ႉသၢင် မုင်ႈႁၼ်လႆႈ ၼၼ်ႉဢိူဝ်ႈ။

တူဝ်ယၢင်ႇ ဢၼ်ၸိူဝ်းၵပ်ႈၵၢႆႇဝႆႉ ၾၢႆႇတွၼ်ႊၸႂ်လႄႈ ၾၢႆႇပွတ်းတွၼ်ႊမၢႆမီႈ(ပၵ်းပိူင်) ၶဝ်ၸိူဝ်းၼႆႉ မၼ်းလမ်ႇလွင်ႈတႃႇမေႃသွၼ်ၵေႃႈၼိူင်ႈၵႃႊႁိုဝ်လႃႇပေႃးဝႃႈၼႆ-

ဢၼ်သွၼ်ပၼ်လိၵ်ႈႁူင်းႁဵၼ်းၵွၺ်းၼႆႉတႄႉ ပႆႇၸႂ်ႈမေႃသွၼ်ဢၼ်သွၼ်ပၼ်ပၺ်ႇၺႃႇၵွၼ်ႇ။ ၼႆႉလၢတ်ႈ ၼေပၼ်ယူႇ တႃႇသေႇဝႆႉယဝ်ႉ။ ပိူင်ၾၢင်ႁၢင်ႊငဝ်း မေႃသွၼ်ၵေႃႉၼိူင်ႈၼႆႉ တၵ်းတေလႆႈၸႅင်ႈၼႄပၼ်ဝႆႉ ပိူင်သၢင်ႇ ႁၢင်ႊၾၢင် ၽူႈလီၵူၼ်းလူင်ၵေႃႉၼိူင်ႈဝႆႉယူႇဢိူဝ်ႈ။ ၼႆႉတႄႉ ပဵၼ်ၾၢႆႇပွတ်းတွၼ်ႊတူဝ်ႁၢင်ႊ ပေႃးၾၢႆႇဢၼ်ၵပ်းၵၢႆႇတင်းပၢႆးၸႂ် ဢၼ်ထုၵ်ႇပဵၼ်တူဝ်ယၢင်ႇလၵ်းၸဵင်ၼၼ်ႉတႄႉ တၵ်းတေလႆႈပဵၼ်လၵ်းၸဵင် တူဝ်ယၢင်ႇတႃႇမူႇမုၵ်ႉၸုမ်းၵေႃ ၸိူဝ်းတူင်ႇဝိူင်းၵူၼ်းၵွၼ်ႇဢိူဝ်ႈ။ ပေႃးၽၢႆႇတူဝ်ယၢင်ႇလၵ်းၸဵင်တွၼ်ႊၸႂ်ၼႆႉ ဢဝ်ၽိတ်းပိူင်ႈႁိူင်ႈၵႂႃႇၸိုင် မၼ်းတေၸၢင်ႊႁၼ်ၵႂႃႇဝႃႈ ၵုင်ႇၵုၼ်းၸဝ်ႈၵေးၸူးႁႃႈပိူင် ဢၼ်ဢမ်ႇသုတ်းဢမ်ႇတိူၵ်ႈၼႆႉ ပဵၼ်ၵႂႃႇပႅတ်ႈ ၽူႈၶဵၼ်လူင်ႁႃႈယိူင်ႈၵွၼ်ႇယဝ်ႉဢိူဝ်ႈ။

မေႃသွၼ်ၼႆႉ ပေႃးၾၢႆႇမၢႆမီႈပၵ်းပိူင်မႃးၼႆၵေႃႈ တၵ်းတေလႆႈပဵၼ် ဢၼ်တူဝ်ယၢင်ႇလၵ်းၸဵင် ဝႆႉယူႇဢိူဝ်ႈ။ ပေႃးတီႈတွၼ်ႊၾၢႆႇမၢႆႇမီႈၼႆ တႄႇဢဝ်တီႈဢၼ် မေႃသွၼ်ၶဝ် ၼပ်ႉယမ်ထိုင်တေႃႇၶၢဝ်းယၢမ်းယူႇႁိုဝ်၊ မိူဝ်ႈဢုပ်ႇ လၢတ်ႈၸႃၸိူဝ်းၼၼ်ႉ ၸွင်ႇလူၼ်ႉပူၼ်ႉၶွပ်ႇလႅၼ်ႊမၼ်းယူႇႁိုဝ်၊ ၸွင်ႇၸၢင်ႊမေႃၸႂ်ႉတိုဝ်းႁဵတ်းၽိတ်းပူၼ်ႉပႅၼ်လူၼ်ႉလိူဝ်တေႃႇ ပုၼ်ႈၽွၼ်းဢၼ်ပၼ်ဝႆႉၼၼ်ႉႁိုဝ်။ ၶေႃႈၵႂၢမ်းလၢႆးၸႂ်ႉ ဢၼ်မေႃသွၼ်ၵႆႉဝႃႈၼၼ်ႉ သင်ႁၢဝ်ႈႁၢႆႉလိူင်းၸိူင်းဝႆႉၼႆ  မၼ်းဢမ်ႇပဵၼ်လၵ်းၸဵင် တူဝ်ယၢင်ႇတႃႇလုၵ်ႈဢွၼ်ႇၶဝ် ဢၼ်လႆႈၶၢမ်ႇဝႃႈၼၼ်ႉသႄႈ။ မိူဝ်ႈလႂ်ပေႃး တေလႆႈလၢတ်ႈမႃး သွၼ်ၼေမႃး တင်းဢူၼ်ႈဢွၼ်ႇ ႁႂ်ႈလႆႈယဵၼ်ႇငႄႈယဝ်ႉၼႆသမ်ႉ တေႃႈၵေႃႉဢွၼ်ၼႃႈမၼ်း ယင်းဢမ်ႇဢူၼ်ႈဢွၼ်သင်၊ ဢမ်ႇပဵၼ်တူဝ်ယၢင်ႇသင် ဢွၼ်လီသင်မႃးလႄႈ တႃႇႁႂ်ႈဢွၵ်ႇမီးမႃးလႆႈ လုၵ်ႈဢွၼ်ႇဢၼ်ယဵၼ်ႇ ငႄႈလၵ်းလႅမ် ဢၼ်ဝႃႈၼၼ်ႉ ၸၢင်ႊမီးတၢင်းၶွင်ႈၶမ်ယဝ်ႉလေႃႇ။

ၼွၵ်ႈသေဢၼ် ၾၢႆႇပူင်သွၼ်ၼၼ်ႉ မေႃသွၼ်ၼႆႉ ထုၵ်ႇလီလႆႈႁူႉဝႆႉ တၢင်းယၢပ်ႇၽိုတ်ႇလုၵ်ႈႁဵၼ်းၶဝ် ဢၼ်မီးဝႆႉၼၼ်ႉ တေႃႇမွၵ်ႈလႂ်လႃႇ။ တႃႇႁႂ်ႈႁူၺ်ႈတွမ်ႊလႆႈ တီႈၼိူဝ်လုၵ်ႈဢွၼ်ႇႁဵၼ်းၶဝ် လီလီၼၼ်ႉ တေလႆႈမီးသင်လၢႆလၢႆ။

မေႃသွၼ်ၼႆႉ တေလႆႈမေႃၾင်းထွမ်ႇတေႃႇ တၢင်းၶွင်ႈၶမ် ၸိူဝ်းၵပ်းၵၢႆႇၾၢႆႇပၢႆးၸႂ်လႄႈ ၾၢႆႇပၢႆးၵၼ်ႊၵူၼ်း တီႈလုၵ်ႈဢွၼ်ႇၶဝ်ၼၼ်ႉ တင်းသဵင်ႈသဵင်ႈယူႇဢိူဝ်ႈ။ ထွမ်ႇငိၼ်းပၼ်သေယဝ်ႉ ၼင်ႇဢၼ်ထုၵ်ႇလီ လႆႈပဵၼ် ၸိူဝ်းၼၼ်ႉၵေႃႈ တေလႆႈၸီႉၸႅင်ႈပၼ် သင်ႇသွၼ်မူၼ်ႉမႄးပၼ်ယူႇဢိူဝ်ႈ။ ၼင်ႇႁိုဝ်လုၵ်ႈႁဵၼ်းဢွၼ်ႇၶဝ် ပေႃးတေၸၢင်ႊယဵၼ်ႇငႄႈ လၵ်းလႅမ်မႃးၼၼ်ႉလႂ်၊ ၽိင်ႈတိုဝ်းၵမ်ႊၶဝ် ပေႃးတေလီလိူဝ်သေ မေႃႁဵတ်းၵေႃႉဢၼ်လႆႈ တိူဝ်းလီမႃးၼၼ်ႉၶဝ်လႂ်ၵေႃႈ တေလႆႈၽိုၵ်းသၢင်ႈပၼ်ႁႂ်ႈလႆႈဢိူဝ်ႈ။ မေႃသွၼ်ၼႆႉ တေလႆႈပဵၼ်ၵေႃႉဢၼ် မေႃႁူၺ်းတွမ်ႊသူၼ်းတုမ်ႊလွင်ႈၽွမ်ႉႁူႉၵၼ်ၼၼ်ႉဢိူဝ်ႈ။ တေႃႇလုၵ်ႈဢွၼ်ႇဢၼ်ပိူင်ႈတၢင်းၵႂႃႇၼၼ်ႉၵေႃႈ တေလႆႈမေႃၼေ တၢင်းပၼ်ႁႂ်ႈၶဝ် ပေႃးၸၢင်ႊပႆၸွမ်းလႆႈ ၼိူဝ်တၢင်းၸိုဝ်ႈၸႂ်ႈၼၼ်ႉမႃးဢိူဝ်ႈ။ ပေႃးၵပ်းၵၢႆႇတင်း ၾၢႆႇၽိင်ႈတိုဝ်းၵမ်ႊ မႃးၼႆ ပေႃးဝႃႈတေၸီႉၸႅင်ႈ ပၼ်တၢင်းယဝ်ႉၼႆၵေႃႈ ႁႂ်ႈတူဝ်ၵဝ်ႇၼႆၵေႃႈ ပဵၼ်ဝႆႉဢၼ် တင်းတိုဝ်းၵမ်ႊၽိင်ႈလီ ဝႆႉသေ ၵမ်း ၼႆႉၵေႃႈ လမ်ႇလွင်ႈယူႇၼင်ႇၵဝ်ႇဢိူဝ်ႈ။

ႁူင်းႁဵၼ်းၼႆႉ ၸၢင်ႊမီးလႆႈလၢႆလၢႆမဵဝ်းယူႇ။ ႁူင်းႁဵၼ်းႁူဝ်ႁိူၼ်း၊ ႁူဝ်ႁဵၼ်းၸိူဝ်ႉၸၢတ်ႈ၊ ႁူင်းႁဵၼ်းၸၢဝ်းသႃႇ သၼႃႇၼႆ ၸၢင်ႊမီးပဵၼ်လၢႆမဵဝ်းဝႆႉယူႇ။ ၵူၺ်းၼႃႇ ပေႃးပဵၼ် ဢၼ်ဝႆႉတၢင်းယိူင်းဢၢၼ်း ပၢႆးပၺ်ႇၺႃႇသေ တႄႇတင်ႈၼႆတႄႉ တေၸၢင်ႊႁႄႉၵင်ႈလႆႈ ႁူင်းႁဵၼ်းၵူၼ်းၼွၵ်ႈမိူင်းၶဝ် မႃးသၢင်ႈၼၼ်ႉလႆႈယူႇယဝ်ႉ။ ပေႃးမေႃသွၼ်ၸိူဝ်းၼႆႉ ၽိူမ်ႉထႅမ်ပၼ် တၢင်းပူင်သွၼ်ၶဝ်ၼၼ်ႉ ႁႂ်ႈပႃးတင်းၽိင်ႈတိုဝ်းၵမ်ႊလီ ၸိူဝ်းၼႆႉလႆႈၼႆ တေလီလိူဝ်လီလႆႈယူႇယဝ်ႉ။ ၾၢႆႇသိုဝ်ႇၶၢဝ်ႇၶဝ်ၼႆၵေႃႈ ၼင်ႇႁိုဝ်ပေႃးတေႁူႉႁၼ် ၵႂၢင်ႈၶႂၢင်လိူဝ်မႃးၼၼ်ႉ လွင်ႈတိတ်းတေႃႇ တင်းၵူၼ်းမိူင်း၊ တၢင်းႁူႉၸမ်ၸႂ်ၵၼ်တင်းၵူၼ်းမိူင်း ပၼ်ပိုၼ်ႉႁူႉၾၢႆႇလိၵ်ႈၾၢႆႇလၢႆးၶဝ်၊ ၾၢႆႇတၢၼ်ႈၶႆႊ မွၵ်ႇလၢတ်ႈ ၶဝ်ၸိူဝ်းၼႆႉၵေႃႈ လူဝ်ႇၵႆႉၵႆႉလႆႈႁဵတ်းပၼ် ယူႇၵွၼ်ႇယဝ်ႉဢိူဝ်ႈ။

လုင်းၸၢႆးၾႃႈ ( ၵဵပ်းႁွမ်တွမ်ႊတႅမ်ႈ)

(႑႒:႐႕) သဝ်။ ႐႗.႐႘.႒႐႒႑,( လႉတႉလ - တႉလႉၽ)(႑႒)

← လိုၼ်း · လမ်းၼႂ်း · ထႅင်ႈ→